Nabé guyuu apóstol Pablo cuidadu para cadi guniná propaganda ni riquiiñeʼ Binidxabaʼ laa, peru xcaadxi xpinni Cristu ni bibaninebe dxiqué qué nudiicaʼ cuenta de peligru que. Casi, ndaaniʼ guidxi Corinto la? guyuu tu laa biʼniʼ sentir zuhuaa dxiichiʼ lu stiidxaʼ Dios ne guníʼ íquecaʼ naguidxi nuu fe sticaʼ ne qué ziuu dxi gucheecaʼ (1 Cor. 10:12). Ngue runi, gudixhená apóstol Pablo laacabe ora guníʼ: «Cadxibe chuʼ tu usiguii laatu casi bisiguii beenda que Eva, quite ique tu ne ma cadi chi nanda tu Cristu de idubi ladxidóʼ to» (2 Cor. 11:3).

Ca diidxaʼ guníʼ apóstol Pablo ca rusiidiʼ cani laanu naquiiñeʼ gatananu ne cadi gápanu confianza laca laanu. Para cadi guniná propaganda ni riquiiñeʼ Binidxabaʼ xquendabiaaninu la? naquiiñeʼ guiénenu pabiáʼ peligroso cani ne naquiiñeʼ gápanu laanu.

Nuu propaganda ni rucheeche información ni cadi dxandíʼ ne cadi jneza para guni controlar modo riníʼ ique binni ne ni runi. Lu propaganda riʼ nuu «gusiguiicabe, guchécabe lú binni, gusihuínnicabe ruluíʼ si dxandíʼ ni riníʼcabe ne ni rúnicabe, quítecabe binni para gucaacabe laacaʼ gúnicaʼ xiixa, guni controlárcabe xquendabiaaniʼ binni». Luni laaca nuu «maña napa binni para guni cosa dxabaʼ, ca cosa ni qué raca jneza ne ca cosa ni runiná» (Propaganda and Persuasion).

¿Xiñee naca propaganda riʼ ti peligru yaʼ? Purtiʼ zeeda gaca ni casi gas ni napa venenu ni qué zanda guʼyaʼ binni ne qué rudii cuenta pa cayeʼ xhoʼ stini ora ricaa bi. Qué gánnanu pa né laani cagúbanu ra cacaanu bi ne chaahuiʼ chaahuiʼ runi envenenar ni conciencia stinu.  Ti sociólogo láʼ Vance Packard ná stale de laanu rigubayú ni «ne qué lica riníʼ íquenu pabiáʼ riguite ni laanu». Sti binni ni biʼndaʼ de tema riʼ ná, cásica hombre zaqueca gunaa nacaʼ propaganda riʼ nga «rucaa laacaʼ gúnicaʼ guendahuati» ne pur laani huayuuticabe grupu de binni, huayaca guerra, racananaláʼdxicabe sti raza, racananaláʼdxisaa ca religión ca ne xcaadxi cosa ni rizaaca sin ganna binni xi razón raca cani (Easily Led—A History of Propaganda).

Pa randa riquiiñeʼ binni ndiʼ para quiteʼ laanu, ¿cadi dxandíʼ jmaruʼ si cadi nagana raca para Binidxabaʼ guni ni la? Dede dxi guyuu binni guidxilayú cuguubiáʼsibe ximodo laacaʼ. Ne cumu lu nabe nuu guidxilayú riʼ la? zanda iquiiñebe intiica si de cani nuu luni para gusiguiibe guiráʼ ladu (1 Juan 5:19; Juan 8:44). Maʼ biseegube xpiaaniʼ stale binni dede ná Biblia caguítebe binni lu idubi guidxilayú (Apoc. 12:9; 2 Cor. 4:4). ¿Ximodo gudxíʼlunu cani riquiiñebe para gucaalube laanu yaʼ?

Jesús bisiidiʼ ti modo cadi nagana para gudxíʼlunu propaganda riʼ. Laabe guniʼbe: «Zanna tu ni dxandíʼ, ne zaladi tu ra cá tu yaga» (Juan 8:31, 32). Peru, lu ti guerra la? nácabe ni dxandíʼ ca nga ruyúbicabe guiniti primé, purtiʼ ti grupu ca rizá riníʼ ni cadi dxandíʼ para quiteʼ sti grupu ca. Nga runi ca soldadu ca caquiiñeʼ guiene chaahuicaʼ gunáʼ nga ni dxandíʼ para cadi chuʼ tu quiteʼ laacaʼ. Laanu laaca caquiiñeʼ gúninu zacaca para quiteʼ enemigu stinu laanu. Ne Jiobá cudii laanu Biblia para guiene chaahuinu gunáʼ nga ni dxandíʼ. Luni zeeda guiráʼ ni caquiiñenu para gudxíʼlunu propaganda stiʼ Binidxabaʼ para quiteʼ binni (2 Tim. 3:16, 17).

Peru nanna Binidxabaʼ, maestru stiʼ guiráʼ propaganda, nga. Nga runi riquiiñebe guiráʼ ni nuu lu guidxilayú riʼ para gucaabe binni chuʼ xhiiñaʼ ti cadi gúʼndacaʼ Biblia ne cadi guni estudiarcaʼ ni. ¡Cadi guiábaluʼ lu trampa ca! (Efes. 6:11). Naquiiñeʼ gúninu stipa pur gácanu binni ni guiene chaahuiʼ ni dxandíʼ (Efes. 3:18). Guníʼ ique ni guníʼ ti maestru láʼ Noam Chomsky: «Guirutiʼ zanda gudxigaʼ ni dxandíʼ ca ndaaniʼ íquenu. Laca laanu nga naquiiñeʼ guyúbinu ni». Nga runi, galán guyúbinu ni dxandíʼ ca laasinu ra gúninu ni biʼniʼ ca binni de Berea, laacaʼ «irá dxi ma cuyubi ca lu Xquiʼchi Dios pa jneza ni caziidi ca» (Hech. 17:11).

 Cadi guiaandaʼ laanu, racalaʼdxiʼ Binidxabaʼ chuʼ xhiiñanu lu xcaadxi cosa ne cadi guiníʼ ique chaahuinu para gúninu xiixa. ¿Xiñee yaʼ? Purtiʼ ti libru ná, ora qué ricaa binni tiempu para guiníʼ ique chaahuiʼ, jma nagueenda rinanda propaganda (Media and Society in the Twentieth Century). Nga runi cadi casi zeluʼ guni creluʼ guiráʼ ni gábicabe lii (Prov. 14:15). Biquiiñeʼ capacidad ni maʼ bidii Dios lii para guiníʼ íqueluʼ ne para chuʼluʼ razón ti ganda chuʼluʼ seguru dxandíʼ ni caziidiluʼ (Prov. 2:10-15; Rom. 12:1, 2).

Cani riguixhe modo naquiiñeʼ tinde ti ejércitu laaca riquiiñecaʼ propaganda para quítecaʼ ca enemigu sticaʼ. Zándaca ruyúbicabe modo tíndesaa ca soldadu stiʼ ca xhenemígucabe o guixélecaʼ de lu grupu sticaʼ. Ti general alemán bidii cuenta gunáʼ nga tobi de ca razón guyuu para biniti xquidxi lu Primera Guerra Mundial, laabe nabe «ni biquiiñeʼ ca xhenemígucabe que bini huati ni ca binni que cásica runi huati ti beendaʼ ti coneju». Zacagá runi Binidxabaʼ para cadi chuʼ congregación tobi si ne cuee gana laanu. Zanda cuʼbe guendanagana lade ca hermanu o gúnibe xiixa para gucaabe laacaʼ guiníʼ íquecaʼ bininácabe laacaʼ o bíʼnicabe laacaʼ xiixa ni cadi jneza para si guxhélebe laacaʼ de organización sti Jiobá.

¡Cadi gudiiluʼ lugar quítecabe lii! Bidii lugar gabi Stiidxaʼ Dios lii xi guʼnuʼ. Para chuʼnu tobi si la? Biblia riguu gana laanu guni perdonársaanu ne guni chaahuinu guendanagana gapanenu stobi nagueendaca (Mat. 5:23, 24; Col. 3:13, 14). Laaca nayaguieʼ modo cayabi ni laanu pabiáʼ peligroso nga guixélenu de congregación (Prov. 18:1). ¿Xiñee qué guʼnuʼ ti prueba para gúʼyaluʼ pa cadi málasi zinándaluʼ propaganda stiʼ Binidxabaʼ? Guníʼ ique padxí últimu biaje rábiluʼ bininácabe lii. Yanna gunabadiidxaʼ laca lii: «¿Ximodo bineʼ sentir yaʼ? ¿Ñee bisihuinneʼ riníʼ iqueʼ casi riníʼ ique binni guidxilayú la? o casi riníʼ ique Dios?» (Gál. 5:16-26; Efes. 2:2, 3).

Ti soldadu ni guniti confianza comandante stiʼ, qué zanda diʼ tinde galán. Nga runi, cani runi ca propaganda ca ruyúbicaʼ modo gucaacaʼ ca soldadu gusaanacaʼ grupu sticaʼ. Ne ndiʼ nga ca diidxaʼ riníʼcabe: «Cadi naquiiñeʼ diʼ  gápatu confianza ca xaíque stitu» o «¡Modo zinécabe laatu ca la? zalúxetu!». Ne rihuínnica nexhenácabe purtiʼ riquiiñecabe intiica si cosa cadi jneza guni ca xhenemígucabe para guluíʼcabe dxandíʼ ni riníʼcabe. Zacaca runi Binidxabaʼ. Puru maʼ cuyubi modo guixieeʼ confianza nápanu ca hombre ni riquiiñeʼ Jiobá para sániruʼ ndaaniʼ xquidxi.

¿Ximodo zanda gápaluʼ lii yaʼ? Gudixhe ique cadi guixéleluʼ de organización stiʼ Jiobá ne chuʼluʼ pur ca binni ni maʼ bisaanabe gabi laanu xi gúninu neca imperfectu laacaʼ (1 Tes. 5:12, 13). Cadi gudiiluʼ lugar quiteʼ ca apóstata lii o xcaadxi enemigu ni rucaalú organización riʼ, neca ruluíʼ dxandíʼ cani guiníʼcabe (2 Tes. 2:2; Tito 1:10). Yenanda conseju bidiicabe Timoteo: cadi guixéleluʼ de cani dxandíʼ bisiidicabe lii ne cadi guiaandaʼ lii paraa biziidiluʼ cani (2 Tim. 3:14, 15). ¿Cadi raʼbuʼ nuu stale prueba ni cusihuinni zanda gápanu confianza mozo ni nuu xpiaaniʼ, ni huaquiiñeʼ Jiobá lu ti gayuaa iza ni maʼ gudiʼdiʼ ca para gusiidiʼ laanu ni dxandíʼ la? (Mat. 24:45-47; Heb. 13:7, 17).

Cadi guiaandaʼ lii, laaca riquiiñeʼ Binidxabaʼ sti modo para gucaalú laapenu. Nuu tiru riquiiñebe guendaridxibi, «tobi de ca propaganda ni jma maʼ xadxí riquiiñebe para quítebe binni» (Easily Led—A History of Propaganda). Ti maestru británico láʼ Philip Taylor guníʼ, gunda gupa ca asiriu que ca enemigu sticaʼ ndaaniʼ nacaʼ ra «biquiiñecaʼ xiixa ni bichibi laacabe ne propaganda». Zacaca nga zuni Binidxabaʼ, zucaabe lii guidxíbiluʼ binni, guidxíbiluʼ sanándacabe lii, guendaguti o intiica sti cosa ni guchibi lii ne gucaabe lii gusaanaluʼ de gúniluʼ ni ná Jiobá (Is. 8:12; Jer. 42:11; Heb. 2:15).

¿Ñee zudiiluʼ lugar iquiiñeʼ Binidxabaʼ guendaridxibi ca para cuee gana lii o para gucaa lii gucheeneluʼ Jiobá la? Jesús guníʼ: «Cadi idxibi tu ni zanda guuti cuerpu si stitu ne ma qué zanda ru guni gastiʼ» (Luc. 12:4). Qué chuʼ ora guinabadiidxanu pa zapa Jiobá laanu casi maʼ bidii stiidxaʼ, pa zudii laanu «enda nandxóʼ stiʼ» ne pa zacané laanu cadi guidxíbinu ne cadi guchéʼnenu laa (2 Cor. 4:7-9; 1 Ped. 3:14).

Dxandíʼ, zándaca gatigá zadxíbiluʼ o ziuuluʼ naguunduʼ. Peru, bietenalaʼdxiʼ ca diidxaʼ gudxi Jiobá Josué: «Ñee cadi maʼ gudxeʼ lii la? Guca nadxibalú ne nadipaʼ. Cadi guidxíbiluʼ ne cadi gacadítiluʼ purtiʼ Jiobá, Dios stiluʼ, ziné lii ra tiica cheluʼ» (Jos. 1:9). Ora nuu xiixa ni cayuniná lii nagueendaca biʼniʼ orar Jiobá ne gudxi laabe guiráʼ ni riguu xizaa lii. Zanda chuʼluʼ seguru «zaguixhe dxí» Dios ladxidoʼloʼ ne zaguixhedxí xquendabiaaniluʼ ti ganda gucaanaluʼ cani riquiiñeʼ Binidxabaʼ para quiteʼ binni (Filip. 4:6, 7, 13).

¿Ñee rietenalaʼdxuʼ xi propaganda ngue biquiiñeʼ rabsaqué biseendaʼ rey stiʼ Asiria para gucaalú xquidxi Dios la? Sicarigá guniʼbe: «Gastiʼ qué zanda gapaʼ laatu de Asiria. Nin Jiobá, Dios stitu, qué zanda gulá laatu». Ne laaca qué nituí lube ora guniʼbe: «Laapebe biseendabe laadu para gunitiludu lugar riʼ». Jiobá guluu gana rey stiʼ Judá né ca diidxaʼ riʼ: «Cadi guchibi ca diidxaʼ binadiágaluʼ ca lii, cani guníʼ ca hombre runi xhiiñaʼ rey stiʼ Asiria ca para guiniʼcaʼ mal de naa» (2 Rey. 18:22-25; 19:6). Despué biseendabe ti ángel ni biiti 185,000 asiriu ti gueelaʼ si (2 Rey. 19:35).

¿Ñee huayuuyaluʼ xiixa película ra rihuinni cadi cudii tobi de cani caree luni que cuenta pa naguíxhecabe ti trampa laa la? ¿Ñee bidii gana lii nucaaluʼ ridxi laabe: «¡Cadi gulaʼbuʼ laacabe, ti trampa ni!» la? Guníʼ ique cayuuyaʼ ca ángel laanu ne cayábicaʼ laanu: «¡Cadi quiteʼ Binidxabaʼ lii!».

Cadi gulaʼbuʼ propaganda stiʼ Binidxabaʼ (Prov. 26:24, 25). Bicaadiaga Jiobá ne cadi gusaana de gápaluʼ confianza laabe (Prov. 3:5-7). Gucuaa invitación ni cudiibe lii né stale guendarannaxhii: «Guluu xpiaanuʼ xiiñehuiineʼ ne bisiecheʼ ladxiduáʼ» (Prov. 27:11). Pa gúniluʼ ni la? ziaapaʼ xquendabiaaniluʼ ne zuni ganarluʼ guendaridinde riʼ.