Guizáʼ bixidxeʼ óraque. Qué niníʼ iqueʼ pa napa xhamiguaʼ religión, ngue runi gunabadiidxaʼ laabe. «¿Xi nánnaluʼ de lu Biblia yaʼ?». Qué niniʼbe gastiʼ. Peru despué gúdxibe naa testigu stiʼ Jehová jñaabe ne bisiidiʼ laabe caadxi cosa. Cumu gucalaʼdxeʼ gánnaruaʼ jma la? ngue runi gudxeʼ laabe gábibe naa xiruʼ nánnabe.

Maʼ huaxhinni biaanadu raqué cayuidu diidxaʼ. Xhamiguaʼ que bisiene naa Biblia rusiidiʼ Binidxabaʼ nga cayuni mandar Guidxilayú riʼ (Juan 14:30). Zándaca lii maʼ nánnaluʼ ndiʼ, peru cumu naa qué ñannaʼ ni la? ngue runi guizáʼ bidxagayaaʼ ora gúdxibe ni naa. Gatigá binadiagaʼ ni cayuni mandar Guidxilayú riʼ nga ti Dios nachaʼhuiʼ ne ni runi jneza. Peru pur ni cayuuyaʼ que la? bisihuínnini cadi jneza ngue ni binadiagaʼ. Neca tiempu que napaʼ 26 iza, guyuu stale cosa ni guluu naa xizaa ne pur laacani dede qué ñanda ñaseʼ.

Guca bixhozeʼ piloto stiʼ Fuerza Aérea stiʼ Estados Unidos. Ngue runi dede dxi nahuiineʼ nannaʼ intiica si ora zanda guizaaca ti guerra. Nuu ejércitu que listu para ora guzulú ti guerra. Tiempu canazayaʼ universidad ndaaniʼ guidxi California, guca guerra ndaaniʼ guidxi Vietnam. Guyaaʼ ca marcha ni biʼniʼ ca estudiante que. Ne raqué guzananda policía laadu ne bichacaʼ gas lacrimógeno laadu. Qué ñanda nidúʼyadu galán ne guca nagana para laadu guicaadu bi laga cuxooñedu de laacaʼ. Guizáʼ nagana guca tiempu que. Biiticabe ca políticu ne guyuu protesta ne guendaridinde. Gadxé gadxé ni guníʼ ique binni dxiqué ne pur ngue qué ñannaʼ xi ñuneʼ.

Lu iza 1970 yeguneʼ dxiiñaʼ costa ni nuu ladu guiáʼ de Alaska, raqué bineʼ ganar stale bueltu. Despué guyaaʼ Londres (Inglaterra), ne guziéʼ ti moto ne guyaaʼ ladu gueteʼ ne qué niguixhe iqueʼ paraa chindayaʼ. Gudiʼdiʼ si beeu yendayaʼ África. Neza ziaa que binebiaʼyaʼ stale binni ni  laaca qué guidxela xi guni pur ca guendanagana ni nuu.

Guiráʼ ni maʼ biiyaʼ ne ni binadiagaʼ bicaa ni naa guiníʼ iqueʼ dxandíʼ ngue ni rusiidiʼ Biblia ora riníʼ ti espíritu malu ngue cayuni mandar Guidxilayú riʼ. Peru gucalaʼdxeʼ gannaʼ xi cayuni Dios pa cadi laa cayuni mandar guidxilayú riʼ.

Chupa chonna beeu despué, biziideʼ ni. Gudiʼdiʼ si iza binebiaʼyaʼ stale hombre ne gunaa ni cayuni ni ná Dios ni dxandíʼ neca cadxaagalucaʼ guendanagana ne guizáʼ gunnaxhieeʼ laacaʼ.

Dxi biguetaʼ Londres, gunieniaʼ jñaa xhamiguaʼ ne bidiibe naa ti Biblia. Gudiʼdiʼ si tiempu guyaaʼ Ámsterdam (Países Bajos). Ti dxi cayuundaʼ Biblia xaʼnaʼ ti poste ra nuu biaaniʼ. Gudiʼdiʼ ti Testigu raqué ne gudxi naa pa zacané naa guieneʼ ni ná Biblia. Despué dxi nuaaʼ ndaaniʼ guidxi Dublín (Irlanda), guyaaʼ ra sucursal stiʼ ca testigu stiʼ Jehová. Bixhidxenaʼyaʼ ra puertaʼ stini ne guluucabe naa, raqué binebiaʼyaʼ Arthur Matthews, ti hermanu ni napa experiencia. Gudxeʼ laabe racalaʼdxeʼ guneʼ estudiar Biblia ne laabe gúdxibe naa zudiibe estudiu naa.

Guizáʼ riuuladxeʼ ni caziideʼ que ne ruundaʼ guiráʼ libru ne revista ni ribee ca Testigu. Laaca ruundaʼ Biblia. Guizáʼ bidxagayaaʼ ora biiyaʼ cacabi ca xcuidihuiiniʼ pregunta ni qué ganda guidxela ca binni ni nanna stale, casi xiñee nuu cosa malu, tuu nga Dios ne paraa rié ca binni ni maʼ guti. Guiráʼ ca xhamiguaʼ Testigu laacaʼ purtiʼ ca Testigu si nga runebiaʼyaʼ ndaaniʼ guidxi que. Gucanécabe naa gannaxhieeʼ Jehová ne chuulaʼdxeʼ guneʼ ni nabe.

Guyuaanisaʼ lu iza 1972. Ti iza despué gucaʼ precursor ne bineʼ servir ndaaniʼ ti congregaciónhuiiniʼ ni nuu Newry (Irlanda del Norte). Bineʼ rentar ti yoohuiiniʼ de guié ni nuu lade dani. Cumu gaxha de raqué nuu caadxi vaca la? ngue runi riguneʼ ensayar discursu stinneʼ nezalucaʼ. Laga cuzuiicame ni cayócame, ruluíʼ cucaadiágacame naa. Nin mu qué riníʼcame, peru gucané ngue naa guneʼ practicar guinieeʼ nezalú ti auditorio. Lu iza 1974 biʼniʼ nombrárcabe naa precursor especial, Nigel Pitt nga guca compañeru stinneʼ ne nácarube xhamiguaʼ de yanna.

Tiempu que, nuu guendaridinde ndaaniʼ guidxi Irlanda del Norte. Caadxi binni dede guniʼcaʼ nácani ti «guidxi ra riaba bomba ne ra riree tiru». Nabé ridinde binni lu calle,  ruuticabe binni de balazu ne rati binni purtiʼ riaba bomba. Ne bizaaca ca ndiʼ purtiʼ gudinde binni pur religión ne pur política. Peru ca binni de sti religión ne ca católico nánnacaʼ qué riuu ca Testigu lu política, ngue runi gunda biʼniʼ predicardu sin chuʼ tu gucueeza laadu. Guyuu biaje gudxi ca binni ni biʼniʼ predicardu laadu cadi chuudu xiixa lugar purtiʼ chiguizaaca xiixa cosa malu raqué.

Neca zaqué guyuu biaje bidxaagaludu guendanagana ra guyuu xquendanabánidu ra naxoo. Ti dxi bineʼ predicarniaʼ ti hermanu láʼ Dennis Carrigan, ni laaca naca precursor, yeguni predicardu ndaaniʼ ti guidxi ni nuu gaxha. Gastiʼ Testigu lugar que, ne deruʼ ti biaje guyuudu raqué. Ti gunaa guníʼ nácadu soldadu de Gran Bretaña ni canagundaachiʼ guidxi que, zándaca guniʼbe zaqué purtiʼ qué rinidu casi ca binni de Irlanda. Guizáʼ bidxíbidu, nánnadu neca gácadu nachaʼhuiʼ né ca soldadu que, zanda gueeda guuticabe laadu o gucuaagucabe lu xíbidu. Naa siaʼ ne Dennis zuhuaʼdu cabézadu autobús, ne guizáʼ nananda raqué. Despué bidúʼyadu bidxiña ti carru ra nuu gunaa ni guníʼ laadu que ne bireebe guníʼnebe guiropaʼ hombre ni dxiʼbaʼ ndaaniʼ carru que ne culuíʼnabe laadu. Despué nabé chaahuiʼ bidxiña ca hombre que laadu ne gunabadiidxacaʼ laadu pora riree autobús que. Ora bedandá autobús que guniʼnécabe chofer que, peru qué ñanda ñunadiágadu xi caníʼcabe. Laasidu dxíbadu ndaaniʼ autobús que, ngue runi guníʼ íquedu zabeecabe laadu ndaaniʼ guidxi que para gúnicabe laadu xiixa. Peru qué nizaaca gastiʼ. Ora bieteʼ ndaaniʼ autobús que gunabadiidxaʼ chofer que: «¿Xi racalaʼdxiʼ ca hombre ca pue?». Laabe gúdxibe laadu: «Cadi guizaaláʼdxitu, maʼ gudxeʼ laacabe tu laatu. Qué zazaacatu gastiʼ».

Lu iza 1976, lu ti asamblea de distrito a ni guca guidxi Dublín, binebiaʼyaʼ Pauline Lomax, ti precursora especial de Inglaterra ni guyé ndaaniʼ guidxi que para asamblea. Nácabe ti hermana espiritual, nachaʼhuiʼ ne humilde. Laabe ne bizáʼnabe Ray biziidicabe de Jehová dxi nahuiinicabe. Ti iza despué bichaganadu ne cayuni servirdu de precursor especial ndaaniʼ guidxi Ballymena (Irlanda del Norte).

Guyuu ti tiempu bínidu dxiiñaʼ lu circuito ndaaniʼ guidxi Belfast, Londonderry ne xcaadxi lugar nabé peligroso. Tiempu que biʼniʼ cré ca hermanu riʼ ni bisiidiʼ ca religión laacaʼ, guca nanaláʼdxicaʼ binni ne bíʼnicaʼ menu laacabe, peru guizáʼ bidxagayaadu bidúʼyadu pabiáʼ naguidxi fe stiʼ ca hermanu riʼ purtiʼ para gunda bíʼnicabe ni ná Jehová la? gupa xidé bisaanacabe ca cosa ca. Bidúʼyadu caguu Jehová ndaayaʼ laacabe ne cayapa laacabe.

Chii iza guyuaaʼ Irlanda. Ne lu iza 1981 biʼniʼ invitárcabe laadu clase 72 stiʼ Escuela de Galaad. Despué de bindúʼxedu scuela que biseendacabe laadu Sierra Leona (África Occidental).

Gulezadu ndaaniʼ ti yoo né 11 misioneru ni nabé guca xhamígudu. Gúpadu ti guzina, chonna taza bañu, chupa regadera, ti teléfono, ti lavadora ne ti secadora. Nabé rié biaaniʼ raqué. Dxaʼ huaga ique yoo que ne ndaaniʼ bodega que riuu beendaʼ.

Neca guyuu cosa ni biaadxaʼ laadu, guizáʼ guyuuláʼdxidu guni predicardu. Ca binni de raqué  runi respetarcaʼ Biblia ne rucaadiágacaʼ laadu. Bidiʼdu estudiu stale binni ne stale de laacaʼ guyuunísacaʼ. Ca binni de raqué gúdxicaʼ naa «señor Robert» ne Pauline la? «señora Robert». Peru despué guizáʼ bineniáʼ sucursal dxiiñaʼ, ngue runi maʼ huaxiéʼ bineʼ predicar pur ngue bizulú binni gudxi Pauline «señora Pauline» ne naa la? gúdxicabe naa «señor Pauline». Guizáʼ guyuube nayecheʼ óraque.

Stale de ca hermanu que pobre laacaʼ, peru qué nusaana Jehová de nudii ni caquiiñecabe, ne guyuu biaje dede bidxagayaacaʼ (Mat. 6:33). Rietenalaʼdxeʼ ti hermana, maʼ bueltu si ni tidiné dxi napa para goné ca xiiñiʼ. Bidii hermana que bueltu ni napa ti hermanu ni huará ni caquiiñeʼ siʼ medicina purtiʼ napa ti guendahuará ni láʼ malaria. Ne dxiqueca, guyé ti gunaa ra lídxibe ne gudixe laabe para uguudabe ique. Gatigá biiyaʼ modo gucané Jehová laacabe.

Guyuʼdu Sierra Leona gaʼ iza. Peru despué biseendacabe laadu Betel ni nuu Nigeria, naroʼbaʼ sucursal que. Bineruáʼ dxiiñaʼ de oficina ni bineʼ Sierra Leona, peru Pauline maʼ gadxé ni guca tocar laa guni. Dxiqué biʼniʼ predicarbe 130 hora guiráʼ beeu ne gúpabe estudiante ni biʼniʼ progresar yanna maʼ nuube ndaaniʼ ti cuartu ra riguíbacabe lari guidubi dxi. Guca nagana para laabe guiaabe ni, peru despué biénebe guizáʼ riecheʼ ca hermanu pur dxiiñaʼ ni rúnibe que ne bíʼnibe stipa cuʼbe gana xcaadxi betelita.

Huaxiéʼ runibiaʼdu cultura stiʼ ca binni de Nigeria, ngue runi naquiiñeʼ guizíʼdidu stale de laani. Rietenalaʼdxeʼ ti dxi yené ti hermanu ti hermana ni deruʼ yendá Betel ra oficina stinneʼ. Bidieeʼ nayaʼ hermana que peru laabe bizuxíbibe xañeeʼ. Qué nidxelaʼ xi ñuneʼ, ne oraqueca bietenalaʼdxeʼ ni ná Hechos 10:25, 26 ne Apocalipsis 19:10. Guníʼ iqueʼ: «¿Xi guneʼ yaʼ? ¿Zabeʼ laabe xiixa la?». Peru raqueca guníʼ iqueʼ: «Pa biʼniʼ invitárcabe laabe Betel la? nánnabe xi rusiidiʼ Biblia».

Neca qué nidxelaʼ xi ñuneʼ la? gunieniaruaʼ laacabe, ne despué bineʼ investigar de ni bizaaca que. Despué gunnaʼ zinanda hermana que costumbre ni raca ndaaniʼ caadxi guidxi stiʼ Nigeria. Laaca ruzuxibi ca hombre ne qué rúnicabe ni para guni adorárcabe tuuxa, sínuque rúnicabe ni para gusihuínnicabe respetu. Dede lu Biblia riete guyuu tu laa biʼniʼ ni (1 Sam. 24:8). ¡Galán si nga qué ninieeʼ xiixa ni ñuniná hermana que!

 Binibiaʼdu stale hermanu de Nigeria ni bisihuinni napa fe dede dxi gúticaʼ. Tobi de laacabe nga Isaiah Adagbona. b Biziidibe de Jehová dede dxi nahuiinibe ne despué gudxi ca doctor laabe nápabe lepra. Biseendacabe laabe ti lugar ra nabeza binni ni napa lepra ne laasibe Testigu raqué. Neca bicaalú binni laabe, gucanebe jma de 30 binni ni napa lepra gácacaʼ Testigu ne gucanebe chuʼ ti congregación lugar que.

Lu iza 1996 biseendacabe laadu Kenia para chiguni servirdu Betel. Maʼ xadxí qué huayaaʼ ndaaniʼ guidxi que dede dxi gunieniaʼ xhamiguaʼ que de Biblia casi bizeeteʼ ni ra bizuluáʼ historia stinneʼ. Ndaaniʼ Betel que nabé rié caadxi migu lácame cercopiteco verde. Ne ribaʼnacame cuananaxhi stiʼ ca hermana. Ti dxi bisaanaxeleʼ ti hermana ventana stiʼ, ora biguétabe biiyabe nuu stale migu ndaaniʼ xcuártube cayocaʼ guendaró stibe. Biguáʼ hermana que ridxi ne biree guxooñeʼ de ra cuartu stiʼ, ca migu que laaca biguaʼcaʼ ridxi ne bidxíbicaʼ ne bireecaʼ ra ventana que ne zecaʼ.

Naa ne Pauline bizulú gucanedu ti congregación ni riníʼ idioma suajili. Qué nindaa gúdxicabe naa guneʼ conducir Guendaridagulisaa ra Riuundaʼ Biblia (ni yanna láʼ Reunión ra riuundaʼ Biblia). Peru ni dxandíʼ la? huaxiéʼ nannaʼ guinieeʼ suajili. Bineʼ estudiar chaahueʼ ndaa ni raca tocar naa para ganda guundaʼ ca pregunta que jneza. Peru pa guicabi tuuxa hermanu xiixa ni maʼ cadi cá lu párrafo que la? qué rieneʼ laa. Dede qué ridxelaʼ xi guneʼ ne runeʼ sentir mal pur ca hermanu que. Peru guizáʼ bidxagayaaʼ pabiáʼ gúpacabe paciencia naa ne qué nireecabe gana naa.

Bireʼdu de Kenia ante gusaʼdu ti iza. Lu iza 1997 biʼniʼ invitárcabe laadu chuudu Betel ni nuu Brooklyn (Nueva York). Yanna cayuni servirdu ndaaniʼ ti guidxi ra nabani binni galán ni zanda gaca ti guendanagana para ca hermanu (Prov. 30:8, 9). Peru laaca nápacabe stale fe. Qué riquiiñecabe tiempu ne bueltu stícabe para gácacabe ricu, sínuque para gacanécabe ca dxiiñaʼ ni runi organización stiʼ Jehová.

Lu ca iza ni maʼ gudiʼdiʼ ca maʼ bidúʼyadu rusihuinni ca hermanu nápacaʼ fe neca gadxé gadxé modo nabánicaʼ. Casi guidxi Irlanda, neca nuu guendaridinde, napa ca hermanu fe. África la? neca pobre binni ne nuucaʼ zitu, peru nadxii ca hermanu Jehová. Ne Estados Unidos, neca nabánicaʼ galán, peru rúnicaʼ ni ná Jehová. Guizáʼ riecheʼ Jehová ora guʼyaʼ pabiáʼ nadxii ca xpinni laa neca gadxé gadxé guendanagana nápacaʼ.

Nagueenda maʼ gudiʼdiʼ ca iza ca casi ná Job 7:6, jma nagueenda gudiʼdiʼ ca ni «que aguxaʼ stiʼ ti binni ni riguiba». Yanna maʼ nuudu ra central mundial ni nuu Warwick (Nueva York), ne cayuninedu dxiiñaʼ binni ni nadxiisaa. Riuuláʼdxidu ne riéchedu gúnidu biaʼ gándatiʼ para gacanedu Rey stinu, Jesucristu, ni maʼ cadi candaa zaguu ndaayaʼ ca ni ruzuubaʼ diidxaʼ (Mat. 25:34).