¿Ñee nannuʼ ni la?
Aparte de ni ná Biblia, ¿xiruʼ rusihuinni dxandíʼ guyuu ca israelita de esclavu Egipto?
Biblia cayabi laanu, despué de ziné ca madianita que José Egipto, biree Jacob ne familia stiʼ de Canaán ne yendézacaʼ Egipto. Yendézacabe Gosén, ti región ni nuu gaxha de ra raca dividir guiiguʼ Nilo ne riaba lu nisadóʼ Mediterráneo (Gén. 47:1, 6). Bidale ca israelita ne gúcacaʼ nadipaʼ. Nga runi bidxibi ca egipciu ne bíʼnicaʼ laacabe esclavu sticaʼ (Éx. 1:7-14).
Tiempu riʼ, nuu caadxi comentarista ni qué runi cré ni riníʼ Biblia de laani ne nácabe cadi dxandíʼ bizaacani. Peru nuu prueba ni rusihuinni guyuu binni guca esclavu Egipto dxiqué ne binibiáʼcabe laaca casi semita. *
Huadxela ca arqueólogo caadxi lugar ra guleza binni dxiqué, ladu guiáʼ de guidxi Egipto. John Bimson, ti hombre ni nanna de Biblia guníʼ bidxélacabe jma de gande lugar raqué, ra guleza ca binni ni runibiáʼcabe casi semita. Ne egiptólogo James Hoffmeier bizeeteʼ: «Zándaca biaʼ lu ca iza 1800 ne 1540 ante de ca dxi stinu, beeda stale binni semita de ca guidxihuiiniʼ stiʼ Asia occidental, bedandézacaʼ Egipto». Ne guniʼbe: «Laaca tiempu que nga “bibani ca patriarca” nga runi biaʼsi ca dxi que ca nga bizaaca ni ruzeeteʼ libru stiʼ Génesis».
Huadxélacabe xcaadxi prueba ladu gueteʼ de Egipto. Bidxélacabe ti papiro neza ra biʼniʼ mandar ca medo (biaʼ lu ca iza 2000 ne 1600 ante de ca dxi stinu). Luni zeeda lá caadxi binni ni guyuu de esclavu ra lidxi ti binni ni guleza neza raqué. Jma de cuarenta lá que nácacani semita. Ca esclavu que bíʼnicaʼ dxiiñaʼ de cocineru, gudíbacabe lari ne bíʼnicabe dxiiñaʼ de pión. Hoffmeier bizeeteʼ: «Cumu bidxélacabe prueba guleza jma de cuarenta binni semita lugar ni láʼ Tebaida [ladu gueteʼ de Egipto], nga rusihuinni zándaca guleza stale binni semita guidubi Egipto, jmaruʼ si lu región ni nuu gaxha de ra raca dividir guiiguʼ Nilo ne riaba lu nisadóʼ Mediterráneo».
Arqueólogo David Rohl bicaa «ruluíʼ de lu Biblia biree lá» ca esclavu ni zeeda lu lista que. Lu papiro que riete caadxi lá casigá lá Isacar, Aser ne Sifrá (Éx. 1:3, 4, 15). Pur nga David Rohl guníʼ: «Ndiʼ rusihuinni dxichi dxandíʼ guca ca israelita esclavu Egipto».
Sicaríʼ guníʼ Bimson, ti hombre ni nanna de Biblia: «Nuu prueba ni rusihuinni dxandíʼ ca relatu ni zeeda lu Biblia ni caníʼ guca ca israelita que esclavu ne bireecaʼ de Egipto».
^ párrafo 4 Diidxaʼ semita ca zeedani de Sem, tobi de ca guionnaʼ xiiñiʼ Noé. Zándaca lade ca xiiñiʼ Sem nga zeeda ca elamita, ca asiriu, ca primé caldeu, ca hebreu, ca binni de Siria ne xcaadxi tribu árabe.
