1. Guendaxheelaʼ

Gadxé gadxé peʼ nga ni riníʼ ique binni de guendaxheelaʼ, ne gadxé gadxé peʼ nga ni riníʼ binni xi caquiiñeʼ ca ni maʼ bichaganáʼ para guibánicaʼ nayecheʼ.

NI RINÍʼ NI: Dios gudixhestí guendaxheelaʼ. Nga runi nánnabe xi caquiiñeʼ ca ni maʼ bichaganáʼ para guibánicaʼ nayecheʼ (Marcos 10:​6-9). Hombre ne gunaa ca zabánicaʼ jma nayecheʼ pa guuyacaʼ xi caquiiñeʼ xheelacaʼ ne cadi ni caquiiñeʼ si ca. Zusihuinni hombre ca nadxii xheelaʼ ra gapa laabe ne guni tratar laabe galán. Zusihuinni gunaa ca runi respetar xheelaʼ ra guni apoyar laabe ne ra gapa respetu laabe pur modo riníʼ.

RACANÉ CA CONSEJU STIʼ BIBLIA LAANU: Quang ne Thi nga ti guendaxheelaʼ de guidxi Vietnam, huaxiéʼ galán nabánicabe purtiʼ qué ganda guibánicabe nayecheʼ. Quang la? qué lica rusihuinni cariñu. Laabe guniʼbe: «Qué rulabeʼ ni runi sentir Thi ne stale biaje bisitueʼ lube». Gucalaʼdxiʼ Thi ñaca divorciar de Quang. Thi guníʼ: «Bineʼ sentir maʼ qué zanda gapaʼ confianza laabe ne maʼ qué zanda guneʼ respetar laabe».

Ra gudiʼdiʼ tiempu, bizulú biindaʼ Quang ne Thi Biblia ne bíʼnicaʼ ni ná Efesios 5:33. ¿Xi bizaaca pur ni bíʼnicabe riʼ yaʼ? Sicaríʼ guníʼ Quang: «Gucané ca diidxaʼ riʼ naa guuyaʼ caquiiñeʼ gacaʼ nachaʼhuiʼ né xheelaʼ ne gusihuinneʼ nadxieeʼ laa. Ne laaca bieneʼ caquiiñeʼ gapaʼ laabe, gudieeʼ ni caquiiñebe ne cadi gunenaʼyaʼ ladxidoʼbe. Ora runeʼ stipa guneʼ ca ni bizeeteʼ riʼ la? ruuyaʼ rannaxhii ne runi respetar xheelaʼ naa». Ne Thi bizeeteʼ: «Ora runeʼ stipa chinandaʼ ni ná Efesios 5:33 rusihuinneʼ jma runeʼ respetar xheelaʼ ne runeʼ sentir jma nadxiibe naa, cayápabe naa ne jma ratadxí ladxiduáʼ».

 2. Modo raca llevarnu binni

Stale biaje cadi jneza modo runi tratárcabe xcaadxi pur raza stiʼ, pur guidxi stiʼ, pur modo rihuinni, pur naca muxeʼ o pur religión ni napa.

NI RINÍʼ NI: Ora guidúʼndanu Biblia rizíʼdinu cadi jneza gaca nanaláʼdxinu binni pur raza stiʼ, cadi jneza gaca nanaláʼdxinu binni purtiʼ naca muxeʼ (homofobia) o purtiʼ zeeda de stiʼ guidxi (xenofobia). Sínuque ni rusiidini laanu nga guni respetarnu guiráʼ binni, intiica raza laa, intiica guidxi stiʼ, pa pobre laa o pa napa bueltu (Hechos 10:34). Ne pa qué runi crenu ni runi cré xcaadxi binni o pa qué riuuláʼdxinu modo nabánicabe la? caquiiñeʼ gácanu nachaʼhuiʼ né laacabe ne guni respetarnu laacabe (Mateo 7:12).

RACANÉ CA CONSEJU STIʼ BIBLIA LAANU: Ti hombre láʼ Daniel bisiidicabe laa zeeda gaca ca binni de Asia ti peligru para guidxi stibe, ngue runi guca nanaláʼdxibe tutiica si binni ni zeeda de guidxi ca, dede ridindenebe laacaʼ nezalú binni. Sicaríʼ guniʼbe: «Riníʼ iqueʼ jneza ngue ni cayuneʼ purtiʼ rabeʼ nadxieeʼ guidxi stinneʼ. Qué lica riuu ora guiníʼ iqueʼ pa cadi jneza ngue ni runeʼ né ni riníʼ iqueʼ».

Despué, biziidiʼ Daniel ni zeeda lu Biblia. Ne sicaríʼ guniʼbe: «Bichaa modo riníʼ iqueʼ purtiʼ para Dios la? tobi si nga guiráʼ binni gastiʼ naca xi guidxi laacaʼ. Naa laaca biziideʼ guuyaʼ laacabe casi ruuyaʼ Dios laacabe». Yanna, ora gunibiáʼ Daniel ti binni, ¿xi riníʼ íquebe yaʼ? Sicaríʼ guniʼbe: «¡Maʼ qué lica rulabeʼ nga, qué lica riníʼ iqueʼ padé laabe! Nadxieeʼ guiráʼ clase binni ne napaʼ xhamiguaʼ de guiráʼ laadu».

 3. Bueltu

Para guibani binni nayecheʼ né guibani galán despué, stale de laacaʼ ruyúbicaʼ gácacaʼ ricu.

NI RINÍʼ NI: Dxandíʼ, racané bueltu ca laanu lu xquendanabáninu peru cadi laadini nga racané ni laanu guibáninu nayecheʼ ne guibáninu galán despué (Proverbios 18:11; 23:​4, 5). Ni dxandíʼ nga pa racaláʼdxinu guibáninu nayecheʼ ne guibáninu galán despué la? caquiiñeʼ chinándanu ca conseju ni cudii Dios laanu lu Biblia (1 Timoteo 6:​17-19).

RACANÉ CA CONSEJU STIʼ BIBLIA LAANU: Ti hombre láʼ Cardo de guidxi Indonesia gudixhe ique gaca ricu, ne gúcabe ricu. Laabe guniʼbe: «Yezayaʼ ra gupaʼ gana, gusieeʼ stale cosa de luju, carru ne yoo. . . Gupaʼ guiráʼ ni riuulaʼdxiʼ binni gapa». Peru ti dxi sti dxi zeeni. Sicaríʼ guniʼbe: «Gudxítecabe naa ne guláʼnacabe stinneʼ, guiráʼ bueltu bineʼ ganar biaʼ ca dxi bineʼ dxiiñaʼ ti ratuhuiiniʼ zeʼ guirani. Bineʼ dxiiñaʼ biaʼ dxi bibaneʼ para gacaʼ ricu peru despué gastiʼ qué ñananiáʼ, bineʼ sentir guirutiʼ nacaʼ».

Gudixhe ique Cardo chinanda ca conseju ni rudii Biblia de bueltu. Ne yanna, lugar de guicá íquebe gápabe stale bueltu la? maʼ gudixhe íquebe guibaninebe huaxiéʼ cosa. Sicaríʼ guniʼbe: «Bidieeʼ cuenta jma risaca nga gúninu ni ná Dios lu xquendanabáninu. Yanna maʼ gastiʼ qué ribee xcaandaʼ ne jma maʼ nayecheʼ nabaneʼ».

 4. Ca relación sexual

Gadxé gadxé ni riníʼ binni de ca relación sexual.

NI RINÍʼ NI: Biblia nga rabi laanu xii nga ni jma jneza guni binni sin guchee pa racalaʼdxiʼ gapa relación sexual. Ora riete diidxaʼ «pecadu sexual» laaca riniʼni gapa binni nadxii, guni practicar tuuxa prostitución, gapa chupa binni ni caʼruʼ guichaganáʼ relación sexual, gaca tuuxa muxeʼ o gapa tuuxa relación sexual né maniʼ (1 Corintios 6:​9, 10). Naca ca relación sexual ca ti regalu stiʼ Dios para si ti hombre ne ti gunaa ni maʼ bidii stiidxacaʼ ne maʼ bichaganacaʼ nezalú ley (Proverbios 5:​18, 19).

RACANÉ CA CONSEJU STIʼ BIBLIA LAANU: Kylie, ti gunaa ni nabeza Australia, guníʼ: «Dxi soltera naa, riníʼ iqueʼ pa gapaʼ relación sexual zaqué nga zuneʼ sentir nadxiicabe naa né qué zacanaʼyaʼ. Peru gadxé peʼ ni bizaacaʼ, nuu biaje nuaaʼ galán ne nuu biaje coʼ ne gucaná ladxiduáʼ».

Ra gudiʼdiʼ dxi bizulú Kylie cayuni estudiar Biblia ne gudixhe ique chinanda guiráʼ conseju ni rudii Biblia ra riete de ca relación sexual ca. Sicaríʼ guniʼbe: «Yanna maʼ biiyaʼ pa chinanda binni guiráʼ conseju stiʼ Dios qué zadiʼdiʼ lu yuubaʼ ne gastiʼ qué zuniná laa. Cumu maʼ nabaneʼ modo ná Jehová la? maʼ runeʼ sentir qué zacanaʼyaʼ ne nadxii binni naa. Cumu racané ca conseju ni rudii Biblia la? ruuyaʼ rápani naa para cadi gacaná ladxiduáʼ».