1, 2. Xiñee bisaana Jiobá Saúl. (Biiyaʼ dibuju ni zeeda ra ruzulú tema riʼ).

DXI gulí Jiobá Saúl para gaca rey la? nácabe ti hombre ni nanna nuu cosa ni qué zanda guni (1 Samuel 9:1, 2, 21; 10:20-24). Peru despué de guca nombrarbe rey, bidxiibabe laca laabe. Ti biaje, gucuaalisaa ti ejércitu de mil filisteu para gucaalucaʼ ca israelita. Naquiiñeʼ nibeza Saúl ñedandá profeta Samuel ra nuu para ñuni ti sacrificiu para Jiobá. Peru guca lúgube ora bíʼyabe cadxibi ca israelita que ne stale de laacaʼ cusaanacaʼ laabe. Ngue runi maʼ qué nibeza Saúl ñedandá Samuel ne biʼniʼ sacrificiu que, neca qué gapa derechu guni ni. Qué ñuulaʼdxiʼ Jiobá ni bíʼnibe que (1 Samuel 13:5-9).

² Ora bedandá Samuel ra nuu Saúl, gudindené laabe purtiʼ qué nuzuubabe stiidxaʼ Jiobá. Peru lugar de niniʼbe dxandíʼ bicheebe, laga bireené Saúl pretextu ne dede bigaaniʼ donda xcaadxi binni pur ni biʼniʼ que (1 Samuel 13:10-14). Dede dxi que bizulube bidxiibabe laca laabe. Ngue runi bisaana Jiobá laabe ne gudxi laabe maʼ que zácarube rey (1 Samuel 15:22, 23).  Ora bizulú Saúl la? biʼniʼ ni jneza, peru despué biʼniʼ cosa malu ne triste modo biluxe (1 Samuel 31:1-6).

3. a) Xi riníʼ ique stale binni zazaaca pa gusihuinni modestia. b) Xi zacábinu lu tema riʼ.

³ Tiempu riʼ, stale binni riníʼ qué zanda cueendú gastiʼ pa guiníʼ ique nuu cosa ni qué zanda guni. Riuuláʼdxicaʼ gusihuínnicaʼ tu nácacaʼ o ni nápacaʼ para guluiʼcaʼ jma risácacaʼ que xcaadxi binni. Casi ti hombre ni nabé runibiáʼ binni, ni naca actor ne políticu guníʼ: «Diidxaʼ modestia ca cadi para naa diáʼ ni ne ribezaʼ qué chuʼ dxi gusaana de gaca ni zacá». Yanna, xiñee risaca nga gápanu modestia, laanu ca xpinni Cristo yaʼ. Ximodo rusihuinni binni napa modestia ne ximodo nga rusihuinni binni qué gapa ni yaʼ. Lu tema riʼ zacábinu ca guendarinabadiidxaʼ riʼ. Ne lu stobi ca zadúʼyanu xi gúninu para cadi gusaana de gápanu modestia dede né ora gácani nagana para laanu.

4. Ximodo nga runi binni xiixa ni gudxiibaʼ laca laa.

⁴ Biblia ruzeeteʼ ti binni ni rudxiibaʼ laca laa o ruchá bi yanni la? qué gapa modestia. Biblia ná: «Ora rudxiibaʼ tobi laca laa la? rituí lú despué, peru ti binni nuu xpiaaniʼ la? nanna nuu cosa ni qué zanda guni» (Proverbios 11:2). Gunabaʼ David Jiobá gacané laa, ora guníʼ sicaríʼ: «Bicueeza siervu stiluʼ para cadi guni xiixa ni gudxiibaʼ laca laa» (Salmo 19:13). Ximodo nga runi binni xiixa ni gudxiibaʼ laca laa yaʼ. Nga nga guni binni xiixa neca qué gapa derechu guni ni, ne zándaca rúnicabe ni purtiʼ rudxiibacabe laacabe o purtiʼ qué gápacabe paciencia. Zándaca huayuu ora gúninu zacá purtiʼ binni ruchee laanu. Peru pa qué gusaana binni de guni ni la? zuchiichicaʼ Jiobá, casi biʼniʼ rey Saúl. Salmo 119:21 ná ridindené Jiobá cani runi xiixa ni gudxiibaʼ laca laa. Xiñee rúnibe ni yaʼ.

5. Xiñee nabé naxoo nga guchá binni bi yanni.

⁵ Nabé naxoo nga guchá binni bi yanni. Xiñee yaʼ. Primé la? rusihuínninu qué gápanu respetu Jiobá, Dios stinu ne ni runi mandar laanu. Guiropa, purtiʼ zápanenu xcaadxi binni guendanagana pa gúninu xiixa ni qué gápanu derechu gúninu (Proverbios 13:10). Ne guionna, purtiʼ zándaca zatuí lunu ora gudii xcaadxi binni cuenta bíninu xiixa para si guchanu bi yánninu (Lucas 14:8, 9). Nga runi, napa Jiobá razón ora rabi laanu gápanu modestia.

6, 7. Ximodo rusihuinni binni napa modestia ora qué rudxiibaʼ laca laa.

⁶ Para cadi gudxíʼbanu laca laanu la? naquiiñeʼ gápanu modestia. Ti xpinni Cristo ni qué rudxiibaʼ laca laa la? qué ruchá bi yanni, sínuque riníʼ ique jma risaca xcaadxi que laa (Filipenses 2:3). Ti binni ni qué rudxiibaʼ laca laa la? laaca rusihuinni napa modestia, nanna nuu cosa ni qué zanda guni ne ora guchee riníʼ dxandíʼ biʼniʼ ni. Laaca riná gucaadiaga ni gabi xcaadxi binni laa ne riziidiʼ de laacabe. Ne ca binni ni qué rudxiibaʼ laca laa nga ca binni ni riuulaʼdxiʼ Jiobá modo laacaʼ.

⁷ Biblia ruzeeteʼ ti binni ni napa modestia nga tuuxa ni runibiáʼ laca laa ne nanna nuu cosa ni qué zanda guni o qué gapa permisu guni ni. Ne nga nga ni racané binni ca guni respetar xcaadxi binni ne gaca nachaʼhuiʼ ora guni tratar laacabe.

8. Pa qué racaláʼdxinu gusaana de gácanu ti binni ni napa modestia, ximodo nga cadi naquiiñeʼ guiníʼ íquenu o xi cadi naquiiñeʼ gúninu.

⁸ Pa qué gápanu cuidadu la? zándaca guzulú guchanu bi yánninu sin gudiʼnu cuenta. Ximodo nga yaʼ. Zándaca guzulú  guiníʼ íquenu jma risácanu que xcaadxi purtiʼ nápanu xiixa privilegiu ndaaniʼ congregación o purtiʼ napa ca xhamígunu ni (Romanos 12:16). O zándaca guzulú gúninu xiixa para si guyadxí binni laanu (1 Timoteo 2:9, 10). Dede zándaca maʼ guzulú gábinu xcaadxi binni xi gúnicaʼ o xi cadi naquiiñeʼ gúnicaʼ (1 Corintios 4:6).

9. Xiñee nuu binni ruzulú ruchá bi yanni. Bizeeteʼ ti ejemplu zeeda lu Biblia.

⁹ Pa qué gucueezanu ca cosa cadi jneza ni riuuláʼdxinu gúninu, zándaca guni laacani maʼ guchanu bi yánninu. Stale tu laa ruchá bi yanni purtiʼ qué rucueeza de gapa envidia, ridaa xiana o ruyubi gusisácacabe laa. Ngapeʼ nga ni bizaaca caadxi binni ni ruzeeteʼ Biblia, casi Absalón, Uzías ne Nabucodonosor. Bisiene chaahuiʼ Jiobá laacabe cadi naquiiñeʼ gudxiibacabe laca laacabe (2 Samuel 15:1-6; 18:9-17; 2 Crónicas 26:16-21; Daniel 5:18-21).

10. Xiñee cadi naquiiñeʼ guni juzgarnu ni cá ique xcaadxi binni guni. Bizeeteʼ ti ejemplu zeeda lu Biblia.

¹⁰ Zándaca nuuruʼ xcaadxi cosa ni rucaa binni cadi gusihuinni modestia. Guiníʼ íquenu ejemplu stiʼ Abimélec ne stiʼ Pedro (Génesis 20:2-7; Mateo 26:31-35). Ñee bichácabe bi yánnicabe la? Ñee nuu xiixa ni qué ñánnacabe la? O bíʼnicabe xiixa sin niníʼ íquecabe. Cumu qué zanda gánnanu xi nuu ndaaniʼ ladxidóʼ xcaadxi binni la? cadi naquiiñeʼ guni juzgarnu ni cá íquecabe gúnicabe (biindaʼ Santiago 4:12).

11. Xi rusisaca ti xpinni Cristo ni napa modestia.

¹¹ Ti xpinni Cristo ni napa modestia la? rusisaca lugar ni napa ndaaniʼ xquidxi Dios. Cumu nexhechaahuiʼ guiráʼ ni runi Jiobá la? guiranu bidiibe ti lugar ndaaniʼ congregación. Nga runi riquiiñebe guiranu. Bidii Jiobá laanu gracia para gúninu xiixa ne rudiibe lugar laanu cuinu modo iquiiñenu cani. Pa nácanu binni ni nanna nuu cosa ni qué zanda guni la? zaquiiñenu ca gracia ni nápanu casi riuuláʼdxibe (Romanos 12:4-8). Ribeza Jiobá iquiiñenu cani para gusisácanu laa ne para gacanenu xcaadxi binni (biindaʼ 1 Pedro 4:10).

12, 13. Xi naquiiñeʼ guietenaláʼdxinu pa guchaa caadxi cosa lu xquendanabáninu ra cayúninu xhiiñaʼ Jiobá.

¹² Ra tiidiʼ tiempu, zándaca zuchaa modo rúninu xhiiñaʼ Jiobá. Casi Jesús la? maʼ huachaa stale cosa lu xquendanabánibe. Primé la? laasibe né Bixhózebe gulézacabe (Proverbios 8:22). De raqué maʼ gucanebe Bixhózebe para guyáʼ ca ángel, universu ne binni (Colosenses 1:16). Despué biseendaʼ Bixhózebe laabe lu Guidxilayú. Raríʼ gúlebe casi rale ti binni ne biniisibe (Filipenses 2:7). Gútisibe bibiguétabe guibáʼ, ne lu iza 1914 gúcabe rey lu Reinu stiʼ Dios (Hebreos 2:9). Ne guiluxe si guni mandarbe casi Rey ti mil iza, zudxiguétabe Reinu ca Bixhózebe. Oracaruʼ nga maʼ Dios «aca xaíque sti irá» cosa, o guni mandarbe guiráʼ ni nabani lu universu (1 Corintios 15:28).

¹³ Laanu laaca ziuu ora zuchaa xiixa lu xquendanabáninu. Zándaca guchaa cani rúninu pur xiixa ni gudixhe íquenu. Casi pa dxiqué solteru laanu peru gudixhe íquenu guichagananu. O zándaca yanna maʼ nápanu xiiñinu. Zándaca ra gudiʼdiʼ iza gudixhe íquenu guchaʼnu modo nabáninu para gúninu xhiiñaʼ Jiobá de tiempu completu. Peru nuu tiru ruchaa cani pur xiixa ni guizaaca lu xquendanabáninu. Zándaca yanna jma maʼ zúninu xhiiñaʼ Jiobá o zándaca coʼ. Peru cadi guizaaláʼdxinu nga, pa nahuiininu o pa maʼ  huaniisinu, pa nazaacanu o pa huaranu, nanna Jiobá ximodo gúninu xhiiñaʼ jma galán. Qué rinábabe laanu gúninu biaʼ qué zanda gúninu. Lugar de nga, riéchebe purtiʼ cayúninu biaʼ gándatiʼ lu xhiiñabe (Hebreos 6:10).

14. Xiñee ziuʼnu nayecheʼ né dxiiñaʼ guicaanu pa nápanu modestia.

¹⁴ Né stale guendanayecheʼ biʼniʼ Jesús guiráʼ dxiiñaʼ bidii Bixhoze laa, laanu laaca naquiiñeʼ gúninu zacá (Proverbios 8:30, 31). Pa nácanu binni ni napa modestia, ziuʼnu nayecheʼ ora guicaanu xiixa dxiiñaʼ o xiixa privilegiu ndaaniʼ congregación. Qué zuyadxinu dxiiñaʼ cacaa xcaadxi. Lugar de nga, ziuʼnu nayecheʼ né lugar nápanu ndaaniʼ xquidxi Dios purtiʼ nánnanu laabe bidiibe ni laanu. Pa nácanu binni ni nanna nuu cosa ni qué zanda guni la? zuni respetarnu ca hermanu ne zacanenu laacaʼ né stale guendanayecheʼ. Ne zusisácanu laacabe purtiʼ nánnanu laaca bidii Dios laacabe ti lugar ndaaniʼ xquidxi (Romanos 12:10).

15. Xi rusiidiʼ ejemplu stiʼ Gedeón laanu.

¹⁵ Gedeón guca ti hombre ni nanna nuu cosa ni qué zanda guni, ne bisaana ti ejemplu galán para laanu. Ti biaje gudxi Jiobá laabe gulabe guidxi Israel de ca madianita, ca xhenemígucaʼ. Xi biʼniʼ Gedeón óraque yaʼ. Laabe guniʼbe familia stibe nga ni jma nahuiiniʼ de lade tribu stibe ne laabe nga ni jma huaxiéʼ risaca de lade ca xiiñiʼ bixhózebe (Jueces 6:15). Neca zaqué, gupa Gedeón confianza Dios ne biʼniʼ dxiiñaʼ bidiibe laa. Biyúbibe guiene chaahuibe  xi racalaʼdxiʼ Jiobá gúnibe ne gunábabe laa guluíʼ laabe ximodo gúnibe ni (Jueces 6:36-40). Dxandíʼ guca Gedeón ti hombre nadipaʼ ne nadxibalú, peru laaca gúcabe ti hombre nuu xpiaaniʼ ne nabé guyuube cuidadu ora chigúnibe xiixa (Jueces 6:11, 27). Dxi gucalaʼdxiʼ binni ñuni mandarbe laacaʼ la? qué ninabe. Bíʼnisibe dxiiñaʼ bidii Jiobá laabe, bibiguétabe ra lídxibe (Jueces 8:22, 23, 29).

16, 17. Xi guiráʼ nga ruuyaʼ ti xpinni Cristo ni napa modestia pa racalaʼdxiʼ guiniisi en sentidu espiritual.

¹⁶ Ñee cusihuinni tuuxa qué gapa modestia ora guicaa xiixa dxiiñaʼ ndaaniʼ congregación o gacalaʼdxiʼ gacané ca hermanu la? Coʼ. Biblia ná galán nga guyúbinu modo gúninu jma lu xhiiñaʼ Jiobá ne modo gacanenu ca hermanu, ne guiniisinu en sentidu espiritual (1 Timoteo 4:13-15). Peru para guiniisinu en sentidu espiritual cadi caquiiñeʼ diʼ guicaanu sti dxiiñaʼ ndaaniʼ congregación. Guiranu nga naquiiñeʼ gucháʼrunu modo laanu ti guibáninu casi nabani ti xpinni Cristo ne iquiiñenu ca gracia ni maʼ bidii Jiobá laanu jma jneza. Pa gúninu zacá, zúninu xhiiñaʼ Jiobá jma galán ne zacanenu xcaadxi binni.

¹⁷ Ti xpinni Cristo ni napa modestia, ruuyaʼ chaahuiʼ xi ribézacabe guni né dxiiñaʼ cudiicabe laa ante guicaa ni. Runi orarbe Jiobá pur dxiiñaʼ chigúnibe ca ne riníʼ ique chaahuibe pa zanda gúnibe ni. Zándaca jma galán guinabadiidxabe laca laabe pa záparube tiempu ne stipa para gúnibe xcaadxi cosa risaca. Pa rábibe coʼ la? zándaca caquiiñeʼ gudiibe lugar gacané xcaadxi hermanu laabe né dxiiñaʼ ni gúnibe. Ti xpinni Cristo ni napa modestia, despué de maʼ guníʼ ique chaahuiʼ de dxiiñaʼ ni cudiicabe laa, zándaca zudii cuenta qué zanda guni ni jneza. Pa nácanu ti binni ni napa modestia la? nuu tiru zaninu qué zúninu xiixa dxiiñaʼ.

18. a) Pa nápanu modestia, xi zúninu ora gudiicabe laanu sti dxiiñaʼ. b) Ximodo racané Romanos 12:3 laanu gácanu binni ni napa modestia.

¹⁸ Racalaʼdxiʼ Jiobá gusihuínninu modestia ora sánenu laa (Miqueas 6:8). Nga runi, pa gudiicabe laanu sti dxiiñaʼ la? gúninu casi biʼniʼ Gedeón ne guinábanu Jiobá gacané laanu ne guluíʼ laanu ximodo gúninu ni. Guiníʼ ique chaahuinu xi racalaʼdxiʼ Jiobá gabi laanu né Biblia ne organización stiʼ. Cadi guiaandaʼ laanu, guiráʼ ni rúninu para Jiobá randa rúninu cani purtiʼ qué rudxiibabe laca laabe ne racanebe laanu, ne cadi pur ca gracia ni nápanu nga rúninu cani (Salmo 18:35). Pa nápanu modestia la? qué zudxíʼbanu laanu jma que biaʼ nácanu (biindaʼ Romanos 12:3).

19. Xiñee naquiiñeʼ gusihuínninu modestia.

¹⁹ Casi maʼ bidúʼyanu ca, naquiiñeʼ gusihuínninu modestia purtiʼ nánnanu Jiobá si nga naquiiñeʼ gusisácanu, ne purtiʼ laa nga bizáʼ guiráʼ ni nuu ne laa nga Dios ni jma nandxóʼ (Apocalipsis 4:11). Pa nápanu modestia la? zacané ni laanu chuʼnu nayecheʼ né biaʼ ganda gúninu lu xhiiñaʼ Jiobá. Laaca zacané ni laanu guni respetarnu sentimientu stiʼ xcaadxi hermanu ne ni riníʼ íquecaʼ, ne zacá ziuʼnu tobi si né laacaʼ. Pa nápanu modestia la? qué ziuʼnu lu guendanagana naroʼbaʼ purtiʼ zaníʼ ique chaahuinu ante gúninu xiixa. Ne Jiobá nabé riuulaʼdxiʼ modo naca ca binni ni rusihuinni modestia. Ndiʼ nga ca razón ni racané laanu guiénenu xiñee risaca nga gusihuinni ca xpinni Dios modestia. Lu sti tema ca zazíʼdinu xi gúninu para cadi gusaana de gápanu modestia dede né ora gaca nagana para laanu gúninu ni.