DXI guca primé guendaridinde lu guidubi naca Guidxilayú, iza 1914, stale binni bidii cuenta qué ziuu ca Binni Ruundaʼ Biblia lu guendaridinde que (Is. 2:2-4; Juan 18:36; Efes. 6:12). Xi bizaaca ca xpinni Dios de guidxi Gran Bretaña pur ngue yaʼ.

Primé Ley stiʼ Serviciu Militar ni guyuu Gran Bretaña lu iza 1916 nga gudíxhecabe cheʼ guiráʼ ca hombre ni caʼruʼ guichaganáʼ ni napa 18 hasta 40 iza lu guerra. Ley que na binni si ni qué zanda cheʼ lu guerra nga ni ruchiiñaʼ xquendabiaaniʼ laa. Laaca gulí gobiernu stiʼ guidxi que caadxi juez para gúʼyacaʼ tuu nga ca binni ni qué zabídxicabe laacaʼ para checaʼ lu guerra ne xi zanda gúnicaʼ.

Nin qué nindaa biseguyoocabe biaʼ cuarenta Binni Ruundaʼ Biblia ndaaniʼ lidxi guiibaʼ ni napa ca soldadu que ne biseendacabe xhono lu ejércitu ni cadindené Francia. Cumu cadi jneza ni biʼniʼ gobiernu que la? ca xpinni Cristu de Gran Bretaña bicaacaʼ ti carta ra nuu primé ministru ni láʼ Herbert Asquith ra cusihuínnicaʼ cadi cayuuláʼdxicaʼ xiñee biseguyoocabe ca xpinni Cristu que ne lu ni zeeda 5,500 firma stiʼ ca binni ni nuu pur laacabe.

Despué gúnnacabe zati xhono xpinni Cristu ni biseendacabe Francia para chitinde que purtiʼ qué ninacaʼ ninaazecaʼ guiibaʼ. Peru ora zuhuaa ca xpinni Cristu que nezalú ca soldadu para gáticaʼ, guníʼ ca binni que jma jneza guseguyoocaʼ laacabe chii iza. Ngue runi, bidxiguétacabe laacaʼ Inglaterra ne guluucabe laacaʼ ndaaniʼ lidxi guiibaʼ stiʼ guidxi que.

Cumu caʼruʼ guiluxe guerra que la? gupa xidé biseendacaacabe ca hombre ni maʼ bichaganáʼ para chitíndecaʼ. Tobi de cani biseendacaacabe nga Henry Hudson, ti doctor ni ruundaʼ Biblia. Cumu qué ninabe ninaazebe guiibaʼ la? yenécabe laabe nezalú caadxi juez ni nuu Manchester (Inglaterra) ne ni gúnicabe laabe raqué zahuinni xi gúnicabe né xcaadxi xpinni Cristu. Dxi gunda 3 stiʼ agosto 1916, ca juez que guniʼcaʼ nápabe donda ne bicaacaʼ laabe quíxebe ti multa ne bidxiguétacaʼ laabe lu naʼ ejercitu. Laga cazaaca ngue, ndaaniʼ guidxi Edimburgo (Escocia) cayuni juzgárcabe James Frederick Scott de 25 iza, ti colportor (zacá binibiáʼcabe ca precursor dxiqué), raqué guníʼ ca juez qué gápabe donda. Gobiernu que gunabaʼ guni juzgárcabe laabe sti biaje peru despué maʼ qué nizaalaʼdxiʼ ni bizaaca James, sínuque jma bizaalaʼdxiʼ guʼyaʼ ni cazaaca ndaaniʼ guidxi Londres ra cayuni juzgárcabe ti xpinni Cristu ni láʼ Herbert Kipps. Ca juez que guniʼcaʼ napa xpinni Cristu riʼ donda, bicaacaʼ laabe quíxebe ti multa ne bidxiguétacaʼ laabe lu naʼ ejercitu. Ne cásica bíʼnicabe laabe que nga chigúnicabe né xcaadxi xpinni Cristu.

Para dxi gunda beeu septiembre 1916, maʼ gunabaʼ 264 xpinni Cristu cadi gácacaʼ soldadu. Gaayuʼ de laacabe qué ñaca soldadu ne 154 bicaacabe laacaʼ gúnicaʼ «xcaadxi dxiiñaʼ risaca para guidxi que», ne 23 de laacaʼ guyuucaʼ lade ca soldadu ni qué rié lu guerra. Sti 82 biseendacabe laacaʼ lade ejércitu, peru cumu qué ninacaʼ ninaazecaʼ guiibaʼ la? biʼniʼ juzgárcabe laacaʼ ra raca juzgar ca soldadu  ne bideguyoocaʼ. Stale binni qué ñuulaʼdxiʼ modo bíʼnicabe ca xpinni Cristu riʼ, ngue runi gobiernu gulee laacabe de raqué ne biseendaʼ laacabe sti lugar para gúnicabe xcaadxi dxiiñaʼ.

Edgar Clay ne Pryce Hughes, ni beeda gaca binni ni ruuyaʼ dxiiñaʼ raca Betel ni nuu Gran Bretaña, guirópacabe bíʼnicabe dxiiñaʼ ndaaniʼ ti presa ni nuu guidxi Gales. Ne Herbert Senior, tobi de ca xhono xpinni Cristu ni bibiguetaʼ de Francia, biseguyoocabe laa ndaaniʼ lidxi guiibaʼ ni nuu Wakefield (Yorkshire, Inglaterra). Ne xcaadxi xpinni Cristu biseendacabe laacaʼ para gúnicaʼ dxiiñaʼ naná ndaaniʼ lidxi guiibaʼ ni nuu Dartmoor (Devon, Inglaterra), ti lugar ra nabé gucanácabe, ne raqué guyuu stale xpinni Cristu ni qué niná ninaazeʼ guiibaʼ purtiʼ ruchiiñaʼ xquendabiaaniʼ laa.

Frank Platt, ti Binni Ruundaʼ Biblia ni guyuu lade ca soldadu ni qué rié lu guerra, nabé bininácabe laa purtiʼ qué niná nidinde ora biseendacabe laa lu guerra. Atkinson Padgett, ti hombre ni biziidiʼ de Dios despué de guca soldadu laaca bininá ca xaíque stiʼ laa purtiʼ qué niná nidinde lu guerra.

Neca ca xpinni Cristu riʼ qué ñene chaahuicaʼ xiñee cadi naquiiñeʼ checaʼ lu guerra, bíʼnicaʼ stipa pur gusiéchecaʼ ladxidóʼ Jiobá. Galán chinándanu ejemplu stiʼ ca xpinni Cristu ni bieeteʼ lu tema riʼ, purtiʼ laacaʼ bisihuínnicaʼ qué nusaana de ñúnicaʼ ni na Jiobá neca bidxaagalucaʼ «enda naná» (Apoc. 3:10). (Cani naguu chaahuiʼ xquidxi Dios guidxi Gran Bretaña.)