1-3. Ximodo bidii Jesús ni gó stale binni gaxha de guidxi Betsaida (biiyaʼ dibuju ni zeeda ra ruzulú tema riʼ).

 BIXUIʼLÚ ni bizaaca riʼ (biindaʼ Mateo 14:14-21). Ante gaca Pascua lu iza 32 que, guyé Jesús ne ca discípulo stiʼ ti lugar ra gastiʼ binni ni nuu gaxha de Betsaida, ti guidxi huiiniʼ ni riaana guriá nisadóʼ stiʼ Galilea. Ora yendabe raqué, bidxiña biaʼ gaayuʼ mil hombre laabe, ne laaca beeda stale gunaa ne baʼduhuiiniʼ.

² Ora biʼyaʼ Jesús guiráʼ ca binni que biabe laacaʼ, ngue runi bisiándabe guiráʼ ca binni huará ni nuu raqué ne bizulú gúdxibe laacaʼ xi chiguni Reinu stiʼ Dios. Ne ora biʼyaʼ ca discípulo stibe maʼ zixhinni la? gúdxicaʼ laabe gábibe ca binni que checaʼ ndaaniʼ ca guidxi ni nuu gaxha de raqué para sicaʼ ni gocaʼ. Para rábibe laacaʼ: «Laudii ni go cabe laatu». Zándaca qué nidxela ca discípulo que xi ñábicaʼ laabe, purtiʼ huaxiéʼ guendaró zinecaʼ: gaayuʼ pan ne chupa si bendahuiiniʼ.

³ Cumu biá Jesús ca binni que la? ngue runi bíʼnibe ti milagru, ne laasi ni nga milagru ni ruzeeteʼ guidapaʼ hombre ni bicaa ca Evangeliu (Mar. 6:35-44; Luc. 9:10-17; Juan 6:1-13). Jesús gudxi ca discípulo stiʼ gábicaʼ guiráʼ binni que cuicaʼ lu ca guixihuiiniʼ nuu raqué pur grupu, caadxi de 50 ne xcaadxi de 100. Ne despué de guníʼnebe Dios, bizulú gundaabe ca pan que ne ca benda que. Ne lugar de niguiizibe cani, «bidii be cani ca discípulo que para gudiizi cani lú ca binni que». Cadi dxandíʼ guendaridxagayaa ngue gudó guiráʼ ca binni que dede bidxá ndaanicaʼ la? Racá ridúʼyanu biquiiñeʼ Jesús ca discípulo stiʼ, neca huaxieʼcaʼ, para gunda biyaanaʼ guiráʼ ca binni que. *

4. 1) Xi jma gucuá ique Jesús, ne xiñee. 2) Xi zazíʼdinu lu tema riʼ ne lu stobi ca.

⁴ Peru ni jma gudixhe ique Jesús nga gusiidiʼ ca  discípulo stiʼ ni cá lu Stiidxaʼ Bixhoze. Nánnabe zugaandacaʼ ti guendanabani ni qué zaluxe pa qué gusaana de guiziidicaʼ de Dios (Juan 6:26, 27; 17:3). Ne cásica biquiiñebe pan ne benda para bidiibe ni gudó stale binni, zaqueca guleebe tiempu para bisiidibe ca discípulo stibe (Mar. 6:34). Nánnabe cadi xadxí zabánibe lu Guidxilayú riʼ ne napa xidé guibiguétabe guibáʼ (Mat. 16:21; Juan 14:12). Yanna, ximodo gusiidibe ca discípulo stibe de Bixhózebe ora maʼ qué guínnibe yaʼ. Zúnibe cásica bíʼnibe dxi biyaanabe guiráʼ ca binni que: zaquiiñebe chupa chonna si binni para guyaanabe stale. Tuu nga ca binni ni iquiiñebe yaʼ. Guidúʼyanu ximodo biquiiñebe chupa chonna binni lu primé siglu para bisiidibe guiráʼ ca discípulo ni bibí pur espíritu santu. Lu sti tema ca zacábinu ti guendarinabadiidxaʼ ni nabé risaca para laanu: ximodo zanda gánnanu tuu nga ca binni ni caquiiñeʼ Cristu para gusiidicaʼ laanu de Dios ca dxi riʼ.

5, 6. 1) Xii nga ti cosa risaca biʼniʼ Jesús chupa iza ante gatiʼ. 2) Ximodo gucané Jesús ca apóstol stiʼ para gúnicaʼ ti dxiiñaʼ chigusaananebe laacaʼ gátisibe.

⁵ Guiráʼ binni ni naca xaíque stiʼ ti familia, runi stipa pur cadi guiaadxaʼ ni iquiiñeʼ binnilidxi, pa gueeda gatiʼ. Zacaca biʼniʼ Jesús, cumu nánnabe zácabe Xaíque stiʼ guiráʼ ca xpínnibe la? bisiidiʼ chaahuibe ca discípulo stibe de Dios ti gánnacaʼ xi gúnicaʼ ora maʼ qué guínnibe ndaaniʼ Guidxilayú (Efes. 1:22). Chupa iza ante gátibe, bíʼnibe ti cosa nabé risaca. Gulibe chupa chonna de ca binni ni zaquiiñebe para gusiidicaʼ stale binni de Dios. Guidúʼyanu xi bizaaca.

⁶ Biʼniʼ orársibe guidubi gueelaʼ, bitagulisaabe ca discípulo stibe ne gulibe 12 ládecaʼ (Luc. 6:12-16). De raqué guzanebe ca apóstol stibe chupa iza para bisiidibe laacaʼ né guiráʼ ni guniʼbe ne cani bíʼnibe. Laabe nánnabe caquiiñeʼ guiziidirucaʼ, ngue runi biiyarube laacaʼ casi «discípulu» stibe (Mat. 11:1; 20:17). Bidiibe conseju sicarú laacaʼ ne bisiidibe laacaʼ ximodo gucheechecaʼ diidxaʼ jma jneza (Mat. 10:1-42; 20:20-23; Luc. 8:1; 9:52-55). Ne bíʼnibe cani ti gánnacaʼ ximodo gúnicaʼ dxiiñaʼ risaca ni chigusaananebe laacaʼ ora gátibe ne guibiguétabe guibáʼ.

7. Ximodo bisihuinni Jesús gunáʼ nga dxiiñaʼ jma risaca naquiiñeʼ guni ca apóstol stiʼ.

⁷ Xi dxiiñaʼ chiguni ca apóstol que yaʼ. Ante gaca saa Pentecostés lu iza 33, bihuinni laacabe nga cani zazániruʼ lade ca xpinni Jesús (Hech. 1:20). Yanna, xii nga ni jma zacá íquecabe gúnicabe yaʼ. Biasa si Jesús de lade gueʼtuʼ, gúdxibe apóstol Pedru caadxi diidxaʼ ni bisihuinni xipeʼ nga dxiiñaʼ chigúnicabe (biindaʼ Juan 21:1, 2, 15-17). Nezalú xcaadxi apóstol gúdxibe Pedru: «Gupa ca dendxu huiini stinneʼ». Zacá bisihuínnibe ziuu ca apóstol que lade caadxi binni ni chiguiquiiñebe para gusiidicaʼ stale binni de Dios. ¡Nga rusihuinni pabiáʼ nadxii Jesús ca «dendxu huiini» stiʼ! *

8. Ximodo gunna ca binni ni guca discípulo lu Pentecostés que tuu nga caquiiñeʼ Cristu para gusiidiʼ laacaʼ de Dios.

⁸ Dede lu Pentecostés stiʼ iza 33, biasa si Cristu de lade gueʼtuʼ, biquiiñebe ca apóstol stibe para gacanecaʼ xcaadxi discípulo ni bibí pur espíritu santu (biindaʼ Hechos 2:41, 42). Ca judíu ne cani cadi judíu ni bibí pur espíritu santu dxi que, bidiicaʼ cuenta ca apóstol que nga cani caquiiñeʼ Jesús para gacané laacaʼ. Ngue runi, nagueendaca «yenanda cabe ni bisiidi ca apóstol» que. Ti erudito  na diidxaʼ griegu ni biquiiñecabe para «yenanda cabe» riníʼ ni «qué liica nixélecabe de ni caziidicabe ne gudixhe íquecabe gúnicabe ti cosa si». Guiráʼ ca binni ni nacubi guca discípulo ca dxi que caquiiñeʼ guiziidicaʼ de Dios ne nánnacaʼ tuu nga ca binni ni zanda gusiidiʼ laacaʼ. Ngue runi, biʼniʼ crécabe ora maʼ cusiene ca apóstol guiráʼ ni guníʼ ne ni biʼniʼ Jesús ne ra caníʼ Stiidxaʼ Dios de laa (Hech. 2:22-36). *

9. Ximodo bisihuinni ca apóstol qué liica nusaana de nusiidicaʼ ca xpinni Jesús.

⁹ Qué liica nusaana ca apóstol que dxiiñaʼ gucuaacaʼ de gusiidicaʼ ca xpinni Jesús. Guidúʼyanu ximodo biʼniʼ chaahuicabe ti guendanagana ni ñándaca nuchiá ca primé xpinni Cristu. Ca dxi que bidxiichi ca viuda ni riníʼ diidxaʼ griegu purtiʼ cadi cacaacaʼ ni tiidinecaʼ dxi casi cacaa ca viuda ni riníʼ diidxaʼ hebreu. Ximodo biʼniʼ chaahuiʼ ca apóstol guendanagana que yaʼ. Gulícabe gadxe hombre ni zanda guni dxiiñaʼ que jneza para gúʼyacaʼ guicaa ca viuda que biaʼ caquiiñeʼ cada tobi de laacaʼ. Dxi biʼniʼ Jesús milagru para biyaanaʼ stale binni, ca apóstol que nga gudiizicaʼ guendaró lu guiráʼ ca binni que, peru yanna bidiicabe cuenta jma caquiiñeʼ gacanécabe ca xpinni Cristu guiziidicaʼ de Dios. Ngue runi, jma gucuá íquecabe güícabe stiidxaʼ Dios (Hech. 6:1-6).

10. Ximodo biquiiñeʼ Jesús ca apóstol ne ca binnigola ni guyuu Jerusalén dxiqué.

¹⁰ Para dxi gunda iza 49, gucané xcaadxi binnigola ni nuu xpiaaniʼ ca apóstol que (biindaʼ Hechos 15:1, 2). «Ca apóstol ne ca hermanu gola» beeda gácacaʼ ti grupu ni zaniruʼ lade ca xpinni Cristu. Jesús, Xaíque stiʼ ca binni ridagulisaa, biquiiñeʼ grupu riʼ para gusiene ca cosa ni naquiiñeʼ guiziidiʼ ca xpinni, laaca caguixhe grupu riʼ modo guireeche diidxaʼ ne guʼyaʼ guiziidiʼ binni de Reinu stiʼ Dios (Hech. 15:6-29; 21:17-19; Col. 1:18).

11, 12. 1) Ximodo nánnanu guyuulaʼdxiʼ Jiobá modo gudixhe Cristu guiziidiʼ ca xpinni ni bibani lu primé siglu que de Dios. 2) Xiñee nagueenda bidii ca discípulo que cuenta tuu ngue caquiiñeʼ Cristu para gusiidiʼ laacaʼ.

¹¹ Ñee guyuulaʼdxiʼ Jiobá modo gudixhe Cristu guiziidiʼ ca xpinni ni bibani lu primé siglu que de Dios la? Guyuuláʼdxibe pue. Libru stiʼ Hechos cayabi laanu: «Oraque biree ze cabe [apóstol Pablu ne ca xcompañeru]. Ne irá guidxi ra udiʼdi cabe byuíʼ né cabe ca binni que ni gudixhe ca apóstol ne ca hermanu gola  ni nuu Jerusalén guni ca xpinni Cristu. Zacá jma bizuhuaa chaahui ca xpinni Cristu, ne ze dxi jma zidale caʼ» (Hech. 16:4, 5). Cumu bizuubacabe stiidxaʼ grupu huiiniʼ ni zaniruʼ ni guyuu Jerusalén que la? bidale ca binni ridagulisaa. Cadi dxandíʼ guyuulaʼdxiʼ Jiobá modo gudixhe Cristu guiziidiʼ ca neza binni ridagulisaa de Dios la? Nga runi, pa nápanu ndaayaʼ stiʼ Dios zanda chuʼnu tobi si ne zaroobaʼ xquídxibe (Prov. 10:22; 1 Cor. 3:6, 7).

¹² Maʼ bidúʼyanu ximodo bisiidiʼ Jesús ca xpinni: biquiiñebe chupa chonna si binni para biyaanabe stale. Nagueenda bidii ca discípulo que cuenta tuu ngue caquiiñebe para gusiidibe laacaʼ. Ne gunda bisihuinni ca primé apóstol ni guyuu lade grupu huiiniʼ ni bisaana Jesús Jerusalén, laacaʼ nga ca binni ni caguu Dios ndaayaʼ. Hechos 5:12 na: «Biquiiñe Dios ca apóstol para biʼni stale milagru, ne bisihuinni enda nandxóʼ sti lade ca binni que». * Ngue runi, gastiʼ razón para guinabadiidxaʼ cani nacubi caziidiʼ de Dios tuu ngue caquiiñeʼ Cristu para gusiidiʼ ca dendxuʼ stiʼ. Peru bizaaca xiixa ra ziluxe primé siglu que.

13, 14. 1) Xi maca guníʼ Jesús zazaaca ca binni ridagulisaa, ne padxí guca ni guniʼbe. 2) Tuu nga ca binni ni bicaalú xquidxi Dios (biiyaʼ nota 5 ni zeeda ra biluxe tema riʼ).

¹³ Maca guníʼ Jesús ziuu tu zucaalú ca neza binni ridagulisaa. Ne cadi guiaandaʼ lii xi guca lu ejemplu ra guníʼ Jesús de «trigu» ne «guiʼxhiʼ malu» que. Raqué bizeetebe beeda ti binni ni bisaba guiʼxhiʼ malu (cani cadi dxandíʼ xpinni Cristu) despué de bisábacabe trigu (ca xpinni Cristu ni bibí). De raqué guniʼbe zaniisi cani juntu dede ora guidxiña dxi guiasa cosecha, ne zaca nga «dxi iluxe guidxilayú» (Mat. 13:24-30, 36-43). Qué nindaa bizaaca ni guníʼ Jesús que. *

¹⁴ Lu primé siglu que guyuu chupa chonna binni ni bidxiideche Dios, peru ca apóstol ni bizuubaʼ stiidxaʼ Jesús gucanecaʼ para cadi guireeche guiráʼ ni cadi jneza cusiidiʼ ca binni que (2 Tes. 2:3, 6, 7). Peru dxi guti últimu de ca apóstol que, bidale guiʼxhiʼ malu —laacabe nga ca binni ni bidxiideche Dios—, ne juntu biroobané ni trigu que lu stale siglu. Ca dxi que nga jma bidale guiʼxhiʼ malu ne bixiéʼ trigu. Qué ñuu nin ti grupu ni ñanda niquiiñeʼ Cristu para nusiidiʼ ca xpinni de Dios. Peru zuchaa ngue ra tiidiʼ tiempu. Padxí gaca nga yaʼ.

15, 16. Xi guleendú ca Binni Ruundaʼ Biblia pur ni bíʼndacaʼ, ne xi zándaca guinabadiidxanu.

¹⁵ Dxi mayaca iruuguʼ trigu ne guiʼxhiʼ malu que, bihuinni stale binni ni riuulaʼdxiʼ guiziidiʼ de Stiidxaʼ Dios. Lu ca iza stiʼ 1870, guyuu ti grupu huiiniʼ de binni ni bicaa ique ganna xipeʼ nga rusiidiʼ Biblia, peru gupa xidé bixélecabe de guiʼxhiʼ malu que, ca religión ne ca secta ni na zinanda Cristu. Grupu huiiniʼ riʼ, dxiqué biree lácabe Binni Ruundaʼ Biblia, bíʼnicabe stale oración ne biyúbicabe de guidubi ladxidóʼcabe guiziidicabe xipeʼ nga ni rusiidiʼ Biblia ne gudixhe íquecabe chinándacabe ni nani (Mat. 11:25).

¹⁶ Guiráʼ ni biindaʼ chaahuicabe que nabé gucaneni laacabe. Ca Binni Ruundaʼ Biblia que bisihuínnicaʼ guiráʼ ni cadi jneza cusiidiʼ stale religión ne gudiizicabe libru ne revista para gusiidicabe binni xipeʼ nga rusiidiʼ Biblia. Stale de ca binni ni racalaʼdxiʼ ganna xi rusiidiʼ Biblia, bidiicaʼ cuenta laacabe nga cusiidicabe ni dxandíʼ biindasicaʼ ca libru ne  ca revista stícabe. Nga runi, galán guinabadiidxanu: ñee ca Binni Ruundaʼ Biblia que nga gulí Jesús para gudii ni caquiiñeʼ ca xpinni lu ca iza gudiʼdiʼ ante de 1914 la? Coʼ. Xiñee yaʼ. Purtiʼ caroobaruʼ trigu ne guiʼxhiʼ malu que, ne caʼruʼ guihuinni tuu nga ca binni ni chiguiquiiñeʼ Jesús para gusiidiʼ binni de Dios. Caʼruʼ diʼ guidxiña dxi guixeleʼ cani dxandíʼ xpinni Cristu, cani zeeda gaca casi trigu, de cani cadi dxandíʼ xpinni Cristu, ni zeeda gaca casi guiʼxhiʼ malu.

17. Gunáʼ nga ca cosa nabé risaca bizulú bizaaca lu iza 1914.

¹⁷ Casi bizíʼdinu lu tema ni gudídinu que, lu iza 1914 nga bizulú cadopa cosecha que. Iza que bizulú bizaaca stale cosa nabé risaca. Guca Jesús Rey ne bizulú ca últimu dxi nabáninu riʼ (Apoc. 11:15). Dede iza 1914 hasta ra bizulú iza 1919, beeda Cristu ne Bixhoze para gúʼyacaʼ ximodo nuu yuʼduʼ stiʼ Dios ne gusiacaʼ ni (Mal. 3:1-4). * Ne lu iza 1919 bizulú bitópacabe trigu. Ñee tiempu riʼ nga cuí Jesús tu grupu guiaana para gudii ni caquiiñeʼ ca xpinni la? ¡Yanna nga laani!

18. Xi guníʼ Jesús zuni ca dxi riʼ, ne xi gunabadiidxaʼ binni dxi bizulú ca últimu dxi nabáninu riʼ.

¹⁸ Ora guníʼ Jesús xi zazaaca ora mayaca guiluxe guidxilayú malu riʼ, bizeetebe zabibe tu «gudii ni iquiiñe» ca xpínnibe (Mat. 24:45-47). Tuu nga iquiiñebe yaʼ. Cásica bíʼnibe lu primé siglu que, zaquiiñebe chupa chonna si binni para guyaanabe stale. Nga runi, dxi bizulú ca últimu dxi que guyuu tu gunabadiidxaʼ tuu nga ca binni si ni chiguiquiiñeʼ Jesús. Lu sti tema ca zacábinu guendarinabadiidxaʼ riʼ ne zadúʼyanu xcaadxi cosa ni guníʼ Jesús lu ca diidxaʼ riguixhená stiʼ.