RACA biaʼ chii iza guleza Gregorio ne Marilou ndaaniʼ guidxi Manila, dxi nápacaʼ biaʼ treinta iza. Gúcacabe precursor regular ne laaca gúpacabe ti dxiiñaʼ ni bíʼnicabe guidubi dxi. Gunda bíʼnicabe dxiiñaʼ ne gúcacabe precursor neca nagana gúcani para laacabe. Bíʼnicabe Marilou gerente ndaaniʼ bancu ra bíʼnibe dxiiñaʼ. Laabe guniʼbe: «Pur dxiiñaʼ gúpadu que galán modo bibánidu». Ne dxandíʼ nabé cayuni ganárcabe bueltu ngue runi gudixhe íquecabe gucuícabe lídxicabe modo racaláʼdxicabe ti lugar ra nabeza puru binni ricu ni riaana 19 kilómetru, neza ra rindani gubidxa ndaaniʼ guidxi Manila. Biʼniʼ firmárcabe ti contratu né ti compañiá para gucuí ni ne biaanacabe quíxecabe ni cada beeu dede guizaa chii iza.

Marilou guníʼ: «Dxiiñaʼ bidiicabe naa que nabé guleeni stale tiempu ne bisidxágani naa, ngue runi chaahuidugá maʼ qué ñapaʼ gana ñuneʼ jma lu xhiiñaʼ Dios. Bineʼ sentir casi ora cabanaʼ Jiobá xiixa». Laabe guníʼrube: «Maʼ qué ñanda ñuneʼ xhiiñaʼ Jiobá biaʼ bineʼ ni ante». Cumu cadi galán modo cayuni sentir Gregorio ne Marilou pur modo nuucaʼ la? byuíʼcabe diidxaʼ ne biiyacabe xi cayúnicabe lu xquendanabánicabe.  Sicaríʼ guníʼ Gregorio: «Racaláʼdxidu guchaʼdu modo nabánidu peru qué gánnadu ximodo gúnidu ni. Ngue runi, gunidu ximodo gúnidu jma lu xhiiñaʼ Jiobá, ne jmaruʼ si purtiʼ qué gápadu xiiñidu ne gunábadu laabe guluiʼbe laadu xi gúnidu».

Ca dxi que bicaadiágacabe stale libana ni caguu gana ca xpinni Cristu chigacanecaʼ ra caquiiñeʼ tu gucheeche diidxaʼ. Sicaríʼ guníʼ Gregorio: «Ora binadiágadu ca libana que biʼniʼ sentirdu casi ñaca cacabi Jiobá ca oración stidu». Guirópacabe gunábacabe Dios gacané laacabe gápacabe jma fe ti gácacabe nadxibalú para quixhe íquecabe gúnicabe ni jma jneza. Tobi de ca guendanagana ni gúpacabe nga yoo ni cucuícabe que. Purtiʼ mápeca zinécabe chonna iza de caguíxecabe ni. Xi gúnicabe yanna yaʼ. Sicaríʼ guníʼ Marilou: «Pa guchiadu contratu bininedu ca binni que la? zunítidu bueltu ni maʼ gudíxedu que, ne maʼ stálepeʼ bueltu ngue bidiʼdu. Peru raqué nga bidúʼyadu gunáʼ nga ni jma naquiiñeʼ gúnidu, ni na Jiobá la? o ni racaláʼdxidu». Laacabe guníʼ íquecabe ca diidxaʼ bicaa apóstol Pablu ra na «bisaana irá xixé ni para» biʼniʼ xhiiñaʼ Dios, ne ngue bicaa laacabe guchiácabe contratu que, gusaanacabe xhiiñacabe, gutoocabe stale de cani nápacabe, ne yendézacabe lu tobi de ca isla stiʼ Palawan, ni riaana biaʼ 480 kilómetru ladu gueteʼ de guidxi Manila (Filip. 3:8).

Ante chindeza Gregorio ne Marilou lu isla que maca gudixhe íquecaʼ guibánicaʼ né ni iquiiñesicaʼ. Peru óraruʼ yendácabe raqué nga bidiicabe cuenta jma huaxiéʼ nga ni zaquiiñecabe para guibánicabe raqué. Sicaríʼ guníʼ Marilou: «Guizáʼ bidxagayaadu ora bedandadu raríʼ. Gastiʼ biaaniʼ ne gastiʼ ca aparatu ni riquiiñeʼ binni ndaaniʼ lidxi. Purtiʼ lugar de niquiiñedu ti traste ni ricá lu biaaniʼ para gaguiʼ arroz la? gupa xidé yetópadu yaga para gaguiʼ xquendarodo. Ne ni jma bibanáʼ nga chisiéʼ ndaaniʼ ca tienda roʼ, chidoʼdo sti ladu ne xcaadxi cosa ni nuu ndaaniʼ guidxi». Peru qué nusiaandacabe xiñee yendézacabe raqué ne qué nindaa maʼ biaacabe raqué. Sicaríʼ guníʼ Marilou: «Yanna guizáʼ maʼ riuuladxeʼ guuyaʼ guiráʼ lugar sicarú nuu raríʼ, riuuladxeʼ guuyaʼ ora maʼ cuzaaniʼ ca beleguí huaxhinni. Ne ni jma riuuladxeʼ nga guuyaʼ pabiáʼ nayecheʼ riuu binni ora guinínedu laaca de Dios. Raríʼ maʼ bizíʼdidu guibánidu nayecheʼ ratiisi ne sica tiisi» (Filip. 4:12).

Sicaríʼ guníʼ Gregorio: «Dxi bedandadu raríʼ nuu tapa si Testigu. Guizáʼ biéchecabe dxi bizuluáʼ bidieeʼ libana guiráʼ semana ne bixhidxeʼ guitarra para guidúʼndadu ca diidxaʼ riuundaʼ». Lu ti iza, maʼ biiyaʼ Gregorio ne xheelaʼ guca grupu huiiniʼ que ti neza binni ridagulisaa de 24 xpinni Cristu. Ne Gregorio guníʼ ni runi sentircaʼ: «Modo bisihuinni ca xpinni Cristu que nadxiicaʼ laadu yendani de ndaaniʼ ladxidoʼdo». Yanna, ra maʼ nápacabe xhoopaʼ iza de nabézacabe zitu de xquídxicabe, guníʼcabe ca diidxaʼ riʼ: «Ti cosa ni jma rusiecheʼ laadu nga guidúʼyadu chuʼ stale binni ndaaniʼ xquidxi Dios. Ne nga nga ni huacaa laadu guni sentirdu jma galán».

Biaʼ chonna mil de cani rucheecheʼ diidxaʼ, maʼ yendézacaʼ ca lugar ra jma caquiiñeʼ tu gucheeche diidxaʼ ndaaniʼ guidxi Filipinas. Gaayuʼ gayuaa gunaa ni caʼruʼ guichaganáʼ nuu ládecabe. Tobi de laacabe nga Karen.

Karen napa biaʼ 25 iza ne biniisibe ndaaniʼ guidxi Baggao (Cagayán). Dede dxi jma nahuiinibe maca ricá íquebe gúnibe jma lu xhiiñaʼ Dios. Laabe guniʼbe: «Cumu nannaʼ maʼ cadi candaa zanitilú ca cosa malu riʼ la? rabeʼ stale binni nga caquiiñeʼ gunadiaga cani chiguni Reinu stiʼ Dios, ngue runi racalaʼdxeʼ chigacaniáʼ ra jma caquiiñeʼ tu gucheecheʼ diidxaʼ». Chupa chonna binnilídxibe gúdxicaʼ laabe lugar de chebe zitu para gucheechebe diidxaʼ la? jma galán chebe scuela roʼ. Peru gunábabe Jiobá gacané laabe para gánnabe xi gúnibe ne laaca guníʼnebe ca xpinni Cristu ni cucheeche diidxaʼ ca lugar ni nuu zitu de ndaaniʼ guidxi. Ne dxi maʼ nápabe 18 iza yendézabe ti lugar ni riaana 64 kilómetru de ralídxibe.

Ca binni ridagulisaa ni nuu ra yendá Karen, rucheechecaʼ diidxaʼ ndaaniʼ ca dani ni riaana neza ra nuu costa del Pacífico. Sicaríʼ guníʼ Karen ora bietenalaʼdxiʼ ni bizaaca: «Guzadu chonna gubidxa para yendadu guidxi Baggao, ra nuu neza binni ridagulisaa ni chigacaniáʼ que. Gudxíbadu dani ne biétedu, ne laaca gudídidu guiiguʼ jma de treinta biaje». Ne laaca guniʼbe: «Rizadu xhoopaʼ hora para chindadu ra nuu chupa chonna binni ni ridúʼndanedu Biblia, ne riaanadu ralídxicabe huaxhinni. Sti dxi que rizadu xhi xhoopaʼ hora para guibiguétadu». Xi huabeendube pur cani cayúnibe ca yaʼ. Sicaríʼ guníʼ Karen dede cuxidxi huiiniʼ: «Nuu biaje nabé riuubaʼ ñeeʼ, peru maʼ cayacaniáʼ 18 binni guiziidiʼ de Biblia. Dxandipeʼ maʼ biiyaʼ pabiáʼ nachaʼhuiʼ Jiobá» (Sal. 34:8).

Sukhi, ti gunaa de Estados Unidos ni za de ca binni hindú ni napa jma de 40 iza ne caʼruʼ guichaganáʼ, yendeza Filipinas. Xi bicaa laabe chindézabe raqué yaʼ. Lu iza 2011 guyebe ti guendaridagulisaa de chupa gubidxa, raqué gudiʼdiʼ ti guendaxheelaʼ ni guníʼ bitoocaʼ stale de ni nápacaʼ para chigucheechecaʼ diidxaʼ Méjicu. Sicaríʼ guníʼ Sukhi: «Ni guníʼcabe que bicaa naa quixhe iqueʼ guneʼ xiixa ni qué huayuu dxí guiníʼ iqueʼ». Ora gúnnabe caquiiñeʼ tu gucheeche diidxaʼ ti lugar riníʼcabe diidxaʼ panjabí ndaaniʼ guidxi Filipinas la? guníʼ íquebe chindézabe raqué. Peru ñee bidxaagalube guendanagana la?

Sicaríʼ guníʼ Sukhi: «Nabé nagana guca para naa guuyaʼ xi naquiiñeʼ guiaananiáʼ ne xi gutuaaʼ. Ne despué de gulezaʼ trece iza stubeʼ ndaaniʼ apartamentu stinneʼ, yendezaniáʼ binnilidxeʼ ne raqué qué ñapaʼ guiráʼ ni gupaʼ ante. Neca nagana guca ni para naa, peru biziideʼ guibaneniáʼ ni caquiiñesiáʼ». Xi guendanagana bidxaagalube dxi yendabe Filipinas yaʼ. Laabe guniʼbe: «Nabé bidxibeʼ ca manihuiiniʼ casi maniʼ chuga ne laaca bibanaʼ, ca nga nga ni jma nagana guca para naa. Peru biziideʼ guneʼ cré zacané Jiobá naa».  Xi guleendube yaʼ. Dede cuxidxi huiiniʼ Sukhi guníʼ sicaríʼ: «Jiobá cayabi laanu: “Laaguuyaʼ pa qué zundaateʼ ndaayaʼ luguiatu”. ¡Ne dxandíʼ ni na ca diidxaʼ ca! Purtiʼ ora chigucheecheʼ diidxaʼ rabi binni naa guibiguetaʼ purtiʼ nuuruʼ ni guinabadiidxacaʼ naa. Nabé riecheʼ ne runeʼ sentir galán gacaniáʼ binni gunibiáʼ Jiobá» (Mal. 3:10). Ne laaca guniʼbe: «Ni jma nagana guca para naa nga quixheʼ iqueʼ chindezaʼ sti lugar. Dxi maʼ yendezaʼ raqué, biiyaʼ ximodo gucané Jiobá naa lu guiráʼ cosa».

Sime, ti xpinni Cristu de guidxi Filipinas ni napa biaʼ 40 iza ne maʼ bichaganáʼ, yeguni dxiiñaʼ ndaaniʼ tobi de ca guidxi ni nuu Oriente Medio, ne galán gudíxecabe laabe raqué. Ca dxi nuube raqué, ti binnigola ni riganna ca binni ridagulisaa gucané laabe ne zaqueca gucané ti libana ni bidii tobi de ca binnigola ni nuu lu grupu ni zaniruʼ ndaaniʼ xquidxi Dios laabe para gúnibe xhiiñaʼ Jiobá primé lu xquendanabánibe. Sicaríʼ guníʼ Sime: «Ridxibeʼ ora guiníʼ iqueʼ chigusaanaʼ dxiiñaʼ stinneʼ». Neca zaqué bisaanabe dxiiñaʼ stibe ne bibiguétabe Filipinas. Yanna Sime ne Haidee xheelabe cayúnicabe ni na Jiobá ndaaniʼ guidxi Davao del Sur, ti lugar ni nuu ladu gueteʼ stiʼ guidxi ca, ra caquiiñeʼ tu gucheeche diidxaʼ. Sicaríʼ guníʼ Sime: «Cumu dxiqué bidxibeʼ gusaanaʼ dxiiñaʼ stinneʼ la? guizáʼ nayecheʼ riuaaʼ yanna purtiʼ maʼ qué runeʼ sentir zacá ne purtiʼ maʼ runeʼ xhiiñaʼ Jiobá primé lu xquendanabaneʼ. ¡Gástiruʼ sti cosa jma galán qué guni binni ni na Jiobá de guidubi ladxidóʼ!».

Ramilo ne Juliet, ti guendaxheelaʼ ni napa jma de 30 iza ne nácacaʼ precursor. Ora gúnnacabe nuu ti neza binni ridagulisaa ni riaana biaʼ 30 kilómetru de ra nabézacabe ne caquiiñeʼ tu gacané laacaʼ guireeche diidxaʼ la? gudixhe íquecabe chigacanécabe laacaʼ. Nga runi, guiráʼ semana riécabe guendaridagulisaa ne rigucheechecabe diidxaʼ lugar que neca cayaba nisaguié. Ne para chindácabe raqué riécabe lu ti motocicleta neca cadi galán nuu carretera ladu que ne naquiiñeʼ tiidicabe lu ti puente ni nanda si lu bi la? qué raca arrepentírcabe pur gudixhe íquecabe gacanécabe lugar que. Sicaríʼ guníʼ Ramilo: «Guirópadu rusíʼdidu 11 binni de Biblia. Neca naquiiñeʼ gusaana binni caadxi cosa ni riuulaʼdxiʼ para ganda chigacané sti lugar la? nabé galán runi sentir ora guni ni» (1 Cor. 15:58).

Ñee ñuuláʼdxiluʼ ñánnaluʼ xi caquiiñeʼ gúniluʼ para chigacaneluʼ ra caquiiñeʼ tu gucheeche diidxaʼ ndaaniʼ xquídxiluʼ o ndaaniʼ sti guidxi la? Pa cá íqueluʼ gúniluʼ zacá guniʼné binnigola ni riganna ca binni ridagulisaa ne biindaʼ tema ni láʼ: «Ñee zanda tiidiluʼ Macedonia la?» ni biree lu Xhiiñaʼ Reinu ni Rúninu agosto 2011.