1, 2. 1) Tuu nga ti testigu. 2) Xii nga ni qué huayabi cani rutiidiʼ noticia binni. 3) Xiñee qué riquiiñeʼ Jiobá ca binni ni rutiidiʼ noticia.

TUU nga ti Testigu. Ti diccionariu na sicaríʼ: «Ti binni ni biʼyaʼ xiixa cosa ne guníʼ de laani». Casi ndaaniʼ Pietermaritzburg, ti guidxi stiʼ sudáfrica, nuu ti periódicu ni láʼ The Witness (testigu) ni ziné jma de ti gayuaa sesenta iza de caree. Biáʼsipeʼ nga gudíxhecabe lá periódicu ca zacá, purtiʼ riníʼ ni cásipeʼ modo guca ca cosa ca lu guidxilayú. Hombre ni riníʼ xi guicá lu periódicu ca guníʼ puru si ni dxandíʼ nga chiguicá luni.

² Triste guininu ni, peru lu ca noticia ca stale biaje qué riniʼcaʼ ximódopeʼ bizaaca xiixa cosa. Ne laaca qué riníʼcabe ni dxandíʼ de Dios ne cani maʼ biʼniʼ. Peru cumu naca Jiobá ti Dios ni jma napa poder ne runi mandar guibáʼ ne lu guidubi naca Guidxilayú la? cadi caquiiñebe de ca binni ni rutiidiʼ noticia para guiníʼ de laabe. Sicaríʼ gúdxibe profeta Ezequiel gucaa: «Ca guidxi roʼ ca nápacaʼ xidé gánnacaʼ naa nga Jiobá» (Ezeq. 39:7). Napa Jiobá biaʼ xhono millón de Testigu, ne laacaʼ rusiidicaʼ binni de laabe, xi guiráʼ maʼ bíʼnibe pur ca xpínnibe dxiqué ne xi cayúnibe yanna. Guiráʼ ca Testigu stibe laaca riniʼcaʼ xi chiguni Dios para cuʼ ndaayaʼ binni. Lu Isaías 43:10 na: «Laatu nga ca testigu stinneʼ, na Jiobá, ne xpinneʼ ni maʼ gulieeʼ». Ora rusisácanu dxiiñaʼ de gucheechenu diidxaʼ, rusihuínninu nácanu testigu stiʼ Jiobá.

3, 4. 1) Padxí bidxaa lá ca Binni Ruundaʼ Biblia, ne xi biʼniʼ sentírcabe. (Biiyaʼ foto ni zeeda ra ruzulú tema riʼ.) 2) Gunáʼ nga ca guendarinabadiidxaʼ ni zacábinu.

 ³ Nabé risaca para laanu nga guiree lanu testigu stiʼ Jiobá, purtiʼ laabe nga Dios ni «qué ziuu dxi guiaana dxí [...] de guni mandar», ne laaca nabe: «Ndiʼ nga laʼyaʼ ne qué ziuu dxi guiaandaʼ ni, qué ziuu dxi gusaana de gusisácacabe ni» (1 Tim. 1:17; Éx. 3:15; laaca zanda gúʼndaluʼ Eclesiastés 2:16). Ca Binni Ruundaʼ Biblia biree lacaʼ testigu stiʼ Jiobá lu iza 1931, ne despué biree chupa chonna carta lu revista riʼ ra cudiicabe xquíxepeʼ. Ti neza binni ridagulisaa ni nuu Canadá bicaa: «Guizáʼ biéchedu ora gúnnadu maʼ nácadu testigu stiʼ Jiobá. Maʼ gudixhe íquedu gúnidu ni riuulaʼdxiʼ Jiobá ti gusisácadu labe o xlabe».

⁴ Ximodo rusihuínninu risaca para laanu gácanu testigu stiʼ Jiobá. Ñee ñanda nusiéneluʼ xiñee gulee lá Jiobá laanu Testigu stiʼ ora ridúʼndanu lu libru stiʼ Isaías la? Lu tema riʼ zacábinu ca guendarinabadiidxaʼ ca.

5, 6. 1) Ximodo nga beeda gaca ca israelita ni napa xiiñiʼ testigu stiʼ Jiobá. 2) Xiruʼ gudxi Jiobá ca israelita ni napa xiiñiʼ guni. 3) Xiñee naquiiñeʼ guni ca xpinni Cristu ni napa xiiñiʼ zacaca ca dxi riʼ.

⁵ Ca israelita ni bibani ca dxi stiʼ Isaías gúcacaʼ «testigu» stiʼ Jiobá, ne guidubi guidxi que beeda gaca xpínnibe (Is. 43:10). Ti modo bisihuinni ca israelita que nácacaʼ testigu stiʼ Jiobá nga ora rusiidicaʼ ca xiiñicaʼ ni biʼniʼ Dios pur ca bixhozególacaʼ. Guzéʼtenu ti ejemplu, tobi de ca cosa ni biʼniʼ mandar Dios laacabe gúnicabe guiráʼ iza ora gaca Pascua que nga ni na ca diidxaʼ riʼ: «Ora gabi xiiñitu laatu: “Xii nga ni rúnitu ora runi adorartu zacá pue”, óraque naquiiñeʼ guiniʼtu: “Ruutidu ti maniʼ lu pascua para Jiobá purtiʼ laabe qué ñuube ra lidxi ca xiiñiʼ  Israel ndaaniʼ guidxi Egipto dxi biseendabe plaga luguiáʼ ca egipciu, peru bilabe lídxinu”» (Éx. 12:26, 27). Zándaca ca israelita que bisiénecaʼ ca xiiñicaʼ qué niná faraón de guidxi Egipto nudii lugar niguni adorar ca israelita que Jiobá lu desiertu ora gunabaʼ Moisés ni laa primé biaje. Faraón que guníʼ: «Tuu nga Jiobá, para guzuubaʼ stiidxaʼ ne guseendaʼ Israel yaʼ» (Éx. 5:2). Laaca zanda gusiidicabe ca xiiñicabe bisihuinni Jiobá tuu nga laa ora biseendaʼ 10 plaga ni bininá Egipto, ne ca israelita gudíʼdicaʼ nisadóʼ Xiñáʼ que. Laabe nga Dios ni jma napa poder ne qué ziuu dxi gusaana de gácabe ni. Guidxi Israel biiyaʼ Jiobá nga Dios ni dxandíʼ ne runi guiráʼ ni riníʼ, ne zacá nga beeda gácacaʼ testigu stibe.

⁶ Ca israelita ni risaca para laacaʼ gácacaʼ testigu stiʼ Jiobá la? rábicaʼ ca xiiñicaʼ ne ca esclavu sticaʼ pabiáʼ sicarú guiráʼ cosa ni biʼniʼ Jiobá pur laacaʼ. Ne laaca risaca para laacabe gusiidicabe ca xiiñicabe guibánicaʼ nayá ne gúnicabe ni na ca ley stiʼ Jiobá lu xquendanabánicabe. Jiobá guníʼ: «Naa nacaʼ nayaguiéʼ, zacaca laatu naquiiñeʼ gácatu nayaguiéʼ» (Lev. 19:2; Deut. 6:6, 7). Zacaca nga naquiiñeʼ guni ca xpinni Cristu ni napa xiiñiʼ yanna, laaca naquiiñeʼ gusiidicaʼ ca xiiñicaʼ guibánicaʼ nayá nezalú Jiobá ti ganda gusisácacaʼ lá Dios. Biblia na: «Bicaadiaga xiiñehuiineʼ, ora uguu jneza bixhózeluʼ lii, ne cadi gusiaandaluʼ ley stiʼ jñaaluʼ» (Proverbios 1:8 ne biindaʼ Efesios 6:4).

7. 1) Ora bizuubaʼ guidxi Israel stiidxaʼ Jiobá, xi guníʼ ca guidxi ni nuu gaxha de laacaʼ. 2) Xi naquiiñeʼ guni guiráʼ cani naca testigu stiʼ Jiobá.

⁷ Nga runi, dxi bizuubaʼ ca israelita que diidxaʼ la? guluu Jiobá ndaayaʼ laacaʼ. Ne zacá, gunna ca guidxi ni nuu gaxha de laacabe Jiobá ngue cayapa laacabe. Stiidxaʼ Dios na: «Guiráʼ guidxi ni nuu lu guidxilayú napa xidé gúʼyacaʼ zineluʼ lá Jiobá, ne dxandipeʼ zadxíbicaʼ lii» (Deut. 28:10). Triste guininu ni, peru guidxi que jma nga stale biaje bicheenecaʼ Jiobá. Stale biaje biʼniʼ adorárcabe bidóʼ. Nabé malu gúcacabe cásica ca dios stiʼ ca cananeu ni biʼniʼ adorárcabe, dede bizaaquicabe ca xiiñicabe para ca dios que ne biquiichinácabe ca binni pobre. Ejemplu riʼ rusiidiʼ ni laanu naquiiñeʼ gúninu stipa pur gácanu nayá nezalú Jiobá, Dios ni jma Nandxóʼ, purtiʼ nácanu Testigu stibe.

8. 1) Xi dxiiñaʼ bidii Jiobá Isaías. 2) Xi biʼniʼ profeta riʼ.

⁸ Biquiiñeʼ Jiobá Isaías para gabi ca israelita zanitilú Jerusalén ne ziecaʼ de esclavu. Peru laaca guniʼbe zadxagayaacaʼ modo chigulabe laacaʼ ne zúnibe «ti cosa nacubi» (Is. 43:19). Neca nanna Jiobá qué zaca arrepentir ca israelita, gunábabe Isaías cadi gusaana de quixhená guidxi que. Ca primé xhoopaʼ capítulo stiʼ libru ni bicaa Isaías cayábini ca israelita zusabanáʼ Jiobá Jerusalén ne ca guidxi ni nuu gaxha de laa. Peru profeta riʼ gucalaʼdxiʼ ñanna padxí nga gaca arrepentir guidxi que. Biblia na: «Óraque guniéʼ: “Dede padxí pue, Jiobá”. Óraque gúdxibe naa: “Dede ora guinitilú ca guidxi ca, ne guiaanacaʼ sin binni, ne ora maʼ guirutiʼ cueza ndaaniʼ ca yoo ca, ne ora gastiʼ guiaana lu layú ca”» (Isaías 6:11).

9. 1) Padxí guca ni guníʼ Isaías zazaaca Jerusalén. 2) Xiñee naquiiñeʼ gatananu ca dxi stinu riʼ.

⁹ Gucuaa Isaías dxiiñaʼ riʼ lu últimu iza de cayuni mandar Uzías, biaʼ lu iza 778 ante de ca dxi stiʼ Jesús. Biaʼ cuarenta y seis iza gúcabe profeta, ne bíʼnirube dxiiñaʼ riʼ despué de iza 732, stale iza despué de maʼ naca Ezequías rey.  Bizaaca ndiʼ ti gayuaa veinticinco iza ante guinitilú Jerusalén lu iza 607. Racá ridúʼyanu, stale iza ante maca gudxi Jiobá guidxi Israel xi zazaacacaʼ. Ca dxi stinu riʼ, laaca maʼ xadxí de cayabi Jiobá xquidxi xi chiguizaaca. Maʼ raca ti gayuaa treinta y cinco iza dede dxi biree primé númeru stiʼ revista riʼ, cayabi ni laanu maʼ cadi candaa zanitilú guidxilayú stiʼ Binidxabaʼ ne zuni mandar Jesucristu ti mil iza (Apoc. 20:1-3, 6).

10, 11. Xi guiráʼ biiyaʼ ca israelita que guca dxi nuucaʼ esclavu Babilonia, casi modo maca guníʼ Isaías.

¹⁰ Stale de ca judíu ni bizuubaʼ stiidxaʼ Jiobá ne qué nucaalucaʼ ca babilonio bilacaʼ dxi binitilú Jerusalén ne yenécabe laacaʼ de esclavu Babilonia (Jer. 27:11, 12). Biaʼ setenta iza de nuu ca israelita Babilonia, biiyacaʼ dxi guca ni na ca diidxaʼ riguixhená riʼ: «Ndiʼ nga ni maʼ guníʼ Jiobá, Dios ni guzíʼ lii sti biaje, Dios ni nayá stiʼ Israel: “Pur laatu dxandipeʼ zuseendaʼ binni Babilonia ne zaxeleʼ ra deguyooto”» (Is. 43:14).

¹¹ Guca ni na ca diidxaʼ riʼ ti gueelaʼ ra bizulú beeu octubre iza 539 ante de ca dxi stiʼ Jesús. Gueelaʼ que, rey stiʼ Babilonia ne ca xpinni cayeʼcaʼ vinu ndaaniʼ ca vasu ni biquiiñeʼ ndaaniʼ yuʼduʼ stiʼ Jerusalén ne cusisácacaʼ ca dios sticaʼ, laga cayúnicabe ca ndiʼ, ca ejércitu stiʼ Media ne Persia ziyuucaʼ ndaaniʼ guidxi que. Lu iza 538 o 537, Ciro, rey ni binitilú Babilonia, gúdxibe ca judíu guibiguétacaʼ Jerusalén ne gucuicaʼ yuʼduʼ stiʼ Dios sti biaje. Maca guníʼ Isaías zazaaca guiráʼ ndiʼ, ne dede guniʼbe zapa Jiobá xquidxi ora guibiguétacaʼ Jerusalén. Purtiʼ Dios peʼ guníʼ de xquidxi: «Guidxi ni bineʼ para naasiáʼ, para gusisaca naa» (Is. 43:21; 44:26-28). Ora bibiguetaʼ ca israelita xquídxicaʼ ne bicuicaʼ yuʼduʼ stiʼ Dios sti biaje, biiyacaʼ runi Jiobá, Dios ni dxandíʼ, guiráʼ ni riníʼ.

12, 13. 1) Turuʼ bibiguetané ca israelita para bibiguetaʼ biʼniʼ adorarcaʼ Dios. 2) Xi naquiiñeʼ guni «xcaadxi dendxu» laga cayacanecaʼ «Israel stiʼ Dios». 3) Xi cabeza «xcaadxi dendxu» gudii Dios laacaʼ.

¹² Dxi bibiguetaʼ ca judíu para gucuicaʼ yuʼduʼ stiʼ Dios, stale binni de sti guidxi bibiguetanecaʼ laacabe para guni adorarcaʼ Dios (Esd. 2:58, 64, 65; Est. 8:17). Ca dxi stinu riʼ, gran muchedumbre ni zeeda gaca «xcaadxi dendxu» cayacanecaʼ ca xpinni Cristu ni bibí né espíritu santu, cani naca «Israel stiʼ Dios» (Apoc. 7:9, 10; Juan 10:16; Gál. 6:16, TNM). Guiráʼ cani naca de gran muchedumbre nápacaʼ ti ndaayaʼ de gácacaʼ testigu stiʼ Jiobá.

 ¹³ Peru para ganda gácacabe testigu stiʼ Jiobá la? cadi naquiiñeʼ gusaanacabe laabe ne gúnicabe stipa pur gácacabe nayá nezalube. Ne neca gúnicabe stipa pur cadi gucheecabe, naquiiñeʼ guinábacabe gutiidilaʼdxiʼ Jiobá stóndacabe guiráʼ dxi, purtiʼ nánnacabe nácacabe binni ruchee, ne cumu nácacabe Testigu stibe la? qué zanda gusiénecabe pabiáʼ risaca ndaayaʼ nápacabe de chinécabe labe o xlabe (biindaʼ 1 Juan 1:8, 9). De racá, lu ti mil iza guni mandar Cristu, ca binni ni naca de gran muchedumbre nápacaʼ ti dxiiñaʼ nabé sicarú gúnicaʼ. Xi laani yaʼ. Zábicabe cani guiasa lade gueʼtuʼ xi guiráʼ bizaacacabe pur nácacabe testigu stiʼ Jiobá lu ca últimu dxi riʼ.

14. Xi riníʼ lá Jiobá.

¹⁴ Para jma gusisácanu guenda ni bidii Dios laanu de gácanu Testigu stiʼ, guiníʼ íquenu xi riníʼ labe o xlabe. Lá Dios, «Jiobá», zeeda ni de ti verbo hebreu ni randa ribiʼxhiʼ «gueeda gaca», ne nga rusihuinni qué rusaana Jiobá de guni xiixa. Nga runi lá Jiobá zándaca riníʼ ni «Laabe nga ni runi ni Gueeda Gaca». Biáʼsipeʼ nga guiree lá Dios zacá, purtiʼ laa bizáʼ guiráʼ xixé ni nuu ne runi guiráʼ ni maʼ guníʼ. Laga zidiʼdiʼ dxi, zúnibe intiica cosa para gaca ni maʼ gudixhe íquebe ne guirutiʼ zanda gucueeza laabe dede nin Binidxabaʼ.

15. Xi zanda guizíʼdinu de lá Dios pur ni gudxi Jiobá Moisés. (Biiyaʼ cuadru ni láʼ « Ti lá ni riníʼ stale cosa».)

¹⁵ Ora gudxi Jiobá Moisés cuee ca israelita de Egipto, bisiénebe laa sti cosa ni riníʼ labe o xlabe. Relatu ni zeeda lu Biblia na: «Gudxi Dios Moisés: “Naa zeeda gacaʼ ni gueeda gacaʼ” [o, “Naa zeeda gacaʼ ni gacalaʼdxeʼ”]. Ne laaca guniʼbe: “Ndiʼ nga ni gábiluʼ ca xiiñiʼ Israel: «Naa zeeda gacaʼ nga biseendaʼ naa ra nuutu»”» (Éx. 3:14). Racá rihuinni zeeda gaca Jiobá intiica cosa ni caquiiñeʼ para gaca ni ná. Para ca israelita ni guyuu de esclavu, beeda gácabe ti binni ni rulá, ni rapa, ni rabi laacabe xi gúnicabe ne ni rudii laacabe guiráʼ ni caquiiñecabe.

16, 17. 1) Ximodo zanda gusihuínninu cudiʼnu xquíxepeʼ Dios pur nácanu Testigu stiʼ. 2) Xi zadúʼyanu lu sti tema ca.

¹⁶ Ca dxi stinu riʼ, qué huachaa Jiobá modo laa. Labe o xlabe rusietenalaʼdxiʼ laanu zanda gueeda gácabe intiica cosa ti gudiibe ni caquiiñeʼ ca xpínnibe para guibaninecaʼ guiráʼ dxi ne para chuʼcaʼ gaxha de laabe. Nuu sti cosa ni zanda guizíʼdinu de lá Dios. Xi laani yaʼ. Laabe zanda iquiiñebe guiráʼ cosa ni bizaʼbe para gaca ni nabe. Ne laaca riquiiñebe ca Testigu stibe para gúnicaʼ xhiiñabe. Ora gánnanu ndiʼ rucaani laanu guidúʼyanu ti ndaayaʼ nga gácanu testigu stiʼ Jiobá. Kåre, ti Testigu de 84 iza, ni maʼ ziné setenta iza de cayuni xhiiñaʼ Jiobá ndaaniʼ guidxi Noruega, guníʼ: «Para naa la? ti ndaayaʼ nga gusieneʼ binni xi na Biblia ne guʼyaʼ pabiáʼ riéchecabe ora guiénecabe ni nani. Nabé ridxá tipa ladxiduáʼ ora rusiideʼ binni pabiáʼ risaca nga bidii Jesús xquendanabani pur laacaʼ, ne pur laani zanda guibánicaʼ sin qué chuʼ dxi gáticaʼ ndaaniʼ ti guidxilayú cubi».

¹⁷ Dxandíʼ, ndaaniʼ stale guidxi huaxiéʼ si binni nga riuulaʼdxiʼ guiziidiʼ de Dios. Peru cásica biʼniʼ sentir Kåre, cadi dxandíʼ nabé riéchenu ora gucaadiaga tuuxa laanu ne gusíʼdinu laa xi riníʼ lá Dios la? Yanna, ximodo zanda gácanu testigu stiʼ Jiobá ne gácanu testigu stiʼ Jesús yaʼ. Zacábinu ni lu sti tema ca.