TI GUENDAXHEELAʼ de 35 iza, Choong Keon ne Julie, maʼ raca gaayuʼ iza de nácacaʼ precursor regular ndaaniʼ guidxi Sydney (Australia). Choong Keon guníʼ: «Bínidu dxiiñaʼ galaa si dxi ne galán modo bibánidu. Lugar ra guyuʼdu que galán clima nápani ne sicarupeʼ modo nabani binni raqué. Laaca gaxha guyuʼdu de ca binnilídxidu ne ca xhamígudu, ne ngue nga ni jma guyuuláʼdxidu». Neca zaqué, biʼniʼ sentírcabe nuu xiixa ni cayaadxaʼ laacabe. Xiñee yaʼ. Purtiʼ nánnacabe zándaruʼ gúnicabe jma lu xhiiñaʼ Jiobá, peru casi ora ridxíbicabe guchaacabe modo nabánicabe.

Despué, lu ti guendaridagulisaa ni guca iza 2009, binadiágacabe ti libana ni yendá dede ndaaniʼ ladxidóʼcabe. Hermanu ni cudii libana que gúdxibe cani zanda guni jma lu xhiiñaʼ Jiobá ca diidxaʼ riʼ: «Ti binni ni rusá carru zanda chineni ladu bigaʼ o ladu derechu pa maʼ zizani. Zacaca nga zanda guni Jesús, zanda gábibe laanu pa ladu zanda chuunu ne gacanebe laanu gúninu jma lu xhiiñabe pa maʼ cayúninu ni o pa dxandíʼ cayúninu stipa pur ugaandanu ni maʼ gudixhe íquenu». * Biʼniʼ sentir Choong Keon ne Julie casi ora laacaʼ ngue cayabi hermanu que ca diidxaʼ que. Laaca lu guendaridagulisaa queca gudiʼdiʼ ti guendaxheelaʼ de misioneru ni cayuni dxiiñaʼ Taiwán. Guendaxheelaʼ que guníʼ pabiáʼ nayecheʼ nuucaʼ pur rucheechecaʼ diidxaʼ lugar que ne laaca guniʼcaʼ caquiiñeruʼ jma binni para gacané guireeche diidxaʼ raqué. Laaca biʼniʼ sentir Choong Keon ne Julie laacaʼ ngue caniʼné guendaxheelaʼ que.

Julie guníʼ: «Despué de guendaridagulisaa que, gunábadu Jiobá gudii stipa laadu para chindézadu Taiwán». Óraque nabe: «Neca zaqué, bidxíbirudu. Para laadu, casi ora ñábadu ndaaniʼ ti alberca ra daʼ ziáʼ nisa». Ti textu stiʼ Biblia ni gucané laacabe  para gúnicabe ni nga Eclesiastés 11:4, ra na: «Tu cabeza si guieeteʼ bi la? qué zudxiibaʼ diʼ; ne tu cayuuyadxí si za la? qué zutopa diʼ». Choong Keon guníʼ: «Lugar de nibézasidu ne ñuuyadxisidu la? gudixhe íquedu gúnidu xiixa ne casi ñaca bizulú bidxíʼbadu ne bitópadu». Xi bíʼnicabe yaʼ. Qué nusaana de ñuni orárcabe de ni chigúnicabe, biindacabe modo bibani ca misioneru, bicaacabe stale correu ra nuu ca hermanu ni maʼ guyé Taiwán, óraque bitoocabe xcárrucabe ne cani nápacabe. Chonna beeu despué maʼ nuucabe Taiwán.

Yanna riʼ, nuu jma de ti gayuaa hermanu de sti guidxi cucheechecaʼ diidxaʼ ca lugar ra jma caquiiñeʼ tu gucheeche diidxaʼ ndaaniʼ guidxi Taiwán. Lade ca hermanu nuu raqué, nuu tu napa 21 dede 73 iza, ne nuu naca de Australia, Canadá, Corea, España, Estados Unidos, Francia, Gran Bretaña ne Japón. Ládecabe nuu jma de cincuenta gunaa ni caʼruʼ guichaganáʼ. Xi huayacané ca xpinni Cristu riʼ chigucheechecaʼ diidxaʼ sti guidxi yaʼ. Guidúʼyanu xi huayacané laacabe.

Laura, ti precursora ni caʼruʼ guichaganáʼ de Canadá, cucheeche diidxaʼ neza ra riaaziʼ gubidxa stiʼ guidxi Taiwán. Raca chii iza qué ñuuláʼdxibe ñúnibe dxiiñaʼ riʼ. Laabe guniʼbe: «Ni dxandíʼ nga qué nucheechepiáʼ diidxaʼ dxiqué para ñuuladxeʼ ñuneʼ ni». Peru caadxi xhamígube biʼniʼ invitarcaʼ laabe Méjicu para gucheechecabe diidxaʼ ti beeu. Laura guníʼ: «Ca dxi que nga dxandíʼ bicheecheʼ diidxaʼ. ¡Ne nabé guyuuladxeʼ ni!»

Ni bizaaca Laura bicaa ni laa chigacané ndaaniʼ sti neza binni ridagulisaa ra riníʼcabe sti diidxaʼ ndaaniʼ guidxi Canadá. Raqué biziidibe chinu, guyuube lade ti grupu ni riníʼ chinu ti tiempu ne despué gudixhe íquebe chindézabe Taiwán. Lu beeu septiembre 2008, bíʼnibe ni gudixhe íquebe. Laura guníʼ: «Gudiʼdiʼ biaʼ ti iza para gunda guyuaaʼ nayecheʼ lugar ra yendayaʼ que. Peru yanna maʼ qué lica riníʼ iqueʼ ibiguetaʼ Canadá». Xi runi sentirbe pur rucheechebe  diidxaʼ yaʼ. Laabe nabe: «Nabé nayecheʼ nuaaʼ. ¡Gástiruʼ sti cosa ni ruchá tipa ladxidóʼ binni que guʼyaʼ cuchaa tuuxa modo nabani ora maʼ cayunibiáʼ Jiobá! Ne stale biaje maʼ huayuuyaʼ binni guchaa modo laa ndaaniʼ guidxi Taiwán, ne ndiʼ guizáʼ rusiecheʼ naa».

Brian ne Michelle,Ti guendaxheelaʼ ni napa jma de treinta iza de Estados Unidos, yendézacaʼ Taiwán maʼ raca biaʼ xhono iza. Primé que biʼniʼ sentircaʼ gastiʼ cabeenducaʼ ora rucheechecaʼ diidxaʼ. Peru ti misioneru ni maʼ xadxí de rucheeche diidxaʼ gudxi laacabe: «Neca ti tratadu si gusaananetu binni dxi ca, laguietenalaʼdxiʼ zándaca nga nga primé biaje gunadiaga binni ca de Jiobá. ¡Nga runi, guizáʼ risaca ni cayúnitu ca!». Ca diidxaʼ ni gudxi misioneru riʼ Brian ne Michelle nabé gucané ni laacaʼ para cadi gusaana de gucheechecaʼ diidxaʼ. Sti hermanu gudxi laacabe: «Pa racaláʼdxitu gúʼyatu pabiáʼ caziiditu diidxaʼ chinu la? cadi gúʼyatu pabiáʼ riziiditu ti dxi, sínuque laguuyaʼ pabiáʼ maʼ biziiditu cada guendaridagulisaa roʼ». Ngapeʼ nga ni bíʼnicabe, ne yanna nácacabe precursor ne guizáʼ rúnicabe xhiiñaʼ Jiobá.

Xi zanda gacané lii guiziidiluʼ sti diidxaʼ yaʼ. Biʼniʼ stipa cheluʼ guidxi ra racaláʼdxiluʼ chigucheecheluʼ diidxaʼ. Guyé ca guendaridagulisaa ra rié ca xpinni Cristu de raqué, laguni xiixa cosa juntu ne yegucheechené laacabe diidxaʼ. Brian guníʼ: «Ora gúʼyaluʼ nuu stale tu racalaʼdxiʼ guiziidiʼ de Dios ne gúʼyaluʼ pabiáʼ nadxii ca hermanu de raqué lii, nga zacané lii cheluʼ guidxi ca para gacaneluʼ».

Chupa chonna de ca precursor ni huayé Taiwán rusiidicaʼ inglés. Kristin ne Michelle gudixhe íquecaʼ gutoocaʼ benda. Kristin guníʼ: «Qué huayuu dxi guneʼ dxiiñaʼ riʼ, peru huayacaneni laadu guiaanadu ndaaniʼ guidxi riʼ». Despué maʼ gúpabe binni rizíʼ benda stibe. Cumu né chupa chonna si hora gúnibe dxiiñaʼ runi ganarbe para guibánicabe la? nga runi randa rúnicabe biaʼ gándatiʼ lu xhiiñaʼ Jiobá casi precursor regular.

William ne Jennifer, chupa xpinni Cristu de Estados Unidos, maʼ raca gadxe iza de nuucaʼ Taiwán. William na: «Gaca tuuxa precursor, guni dxiiñaʼ, guiziidiʼ sti diidxaʼ, gapa ca binni ridagulisaa... guiráʼ nga rusidxaga binni». Xi huayúnicabe para ganda gúnicabe guiráʼ ndiʼ ne chúʼcabe nayecheʼ yaʼ. Quixhe íquecabe gúnicabe ni zanda si. Casi dxi bizulú caziidicabe chinu, qué niníʼ íquecabe niziidicabe ni nagueenda. Ne qué rireecabe gana ora ruuyacabe ruluíʼ cadi caziidicabe gastiʼ.

William rietenalaʼdxiʼ conseju ni bidii ti superintendente de circuito laa: «Biechené ni cayúniluʼ». Ni gucalaʼdxiʼ hermanu riʼ niníʼ nga, ora quixhe íquenu ugaandanu xiixa dxiiñaʼ ndaaniʼ xquidxi Dios la? naquiiñeʼ guiechenenu guiráʼ ni gúninu dede ugaandanu ni. William na gucané ca diidxaʼ ca laacabe para gúnicabe ca dxiiñaʼ ca, ne yenándacabe ca conseju ni bidii ca xpinni Cristu laacabe ne biyúbicabe modo jma jneza gúnicabe ca cosa ca ne zacá gunda bíʼnicabe xhiiñacabe jneza ndaaniʼ guidxi que. Laabe guniʼbe: «Conseju que laaca gucané ni laadu gúʼyadu pabiáʼ sicarú guiráʼ ca cosa ni nuu ndaaniʼ isla que».

Megan, ti precursora ni caʼruʼ guichaganáʼ de Estados Unidos, cayuni stipa pur guiníʼ chinu jma nagueenda. Cásica William ne Jennifer, Megan laaca riechené ni cayuni. Guiráʼ sábadu ne domingu ridagulisaanebe ti grupu de xpinni Cristu ne riécabe ti lugar guizáʼ galán para chigucheechecabe diidxaʼ: puertu stiʼ Kaohsiung, laani nga puertu jma naroʼbaʼ ni nuu Taiwán. Megan huacheeche diidxaʼ ndaaniʼ guiráʼ barcu ra nuu ca hombre ni rinaaze benda  de guidxi Bangladés, Filipinas, India, Indonesia, Tailandia ne Vanuatu. Megan guníʼ: «Cadi xadxí diʼ rizuhuaacabe ra puertu que. Nga runi, rábidu laacabe pa zadúʼndanedu laacabe Biblia ra queca. Para ganda guinínedu guirácabe, stale biaje ridúʼndanedu tapa o gaayuʼ binni juntu». Xi cayúnibe para guiziidibe chinu yaʼ. Laabe nabe: «Ñuuladxeʼ niziideʼ chinu jma nagueenda, peru qué rusiaandaʼ ni gudxi ti hermanu naa ti biaje: “Biʼniʼ biaʼ ganda gúniluʼ, ne Jiobá zacané lii gúniluʼ dxiiñaʼ stiluʼ”».

Ante chindeza Cathy, de Gran Bretaña, sti guidxi, gudixhe ique guuyaʼ xi guidxi nga jma seguru guibani ti binnidxaapaʼ. Despué de biʼniʼ orarbe Jiobá, bicaabe ra nuu chupa chonna Betel para guinabadiidxabe pa cadi nagana guibánibe ndaaniʼ xiixa guidxi. Biiyaʼ chaahuibe ni bicábicabe laabe, ne gudixhe íquebe chebe Taiwán.

Lu iza 2004, dxi napa Cathy 31 iza, yendeza Taiwán, ne raqué gúpabe ni guibaninésibe. Cathy rietenalaʼdxiʼ xi biʼniʼ, ne guníʼ: «Gunabadiidxaʼ ca hermanu que paraa zanda siéʼ cuananaxhi ne verdura jma baratu. Zacá gunda bigaanda xpueltuaʼ». Xi racané laabe guibaninebe biaʼ nápasibe yaʼ. Laabe guniʼbe: «Runeʼ orar Jiobá ne rinabaʼ laabe gacanebe naa gahuaʼ ni napaʼ neca ti guendaróhuiiniʼ si ni, ne gacuaʼ lari neca de baratu ni. Ne Jiobá ricabi ca oración stinneʼ. Rusiidibe naa gannaʼ xipeʼ nga caquiiñeʼ ne chuaaʼ nayecheʼ neca qué gapaʼ guiráʼ ni racaladxeʼ». Laaca guniʼbe: «Riuuladxeʼ modo nabaneʼ riʼ purtiʼ rudiini lugar naa guneʼ xhiiñaʼ Jiobá».

Neca para tiidinésibe dxi rápabe peru nayecheʼ riuube. Laabe guniʼbe: «Raríʼ nuu stale binni ni riuulaʼdxiʼ gucaadiaga stiidxaʼ Dios. ¡Ne ndiʼ guizáʼ rusiécheni naa!». Dxi yendabe ndaaniʼ guidxi ra bizulú bicheechebe diidxaʼ casi precursora nuu chupa neza binni ridagulisaa ni riníʼ diidxaʼ chinu; peru yanna maʼ nuu gadxe. Cathy guniʼruʼ: «Ora guuyaʼ pabiáʼ ziniisi xquidxi Dios ne gacaniáʼ lu dxiiñaʼ riʼ, nabé ruchá tipa ni ladxiduáʼ ne nayecheʼ runeʼ sentir guiráʼ dxi».

Ximodo huayeni Choong Keon ne Julie, cani bizéʼtenu ra bizulú tema riʼ yaʼ. Dxi bizulú Choong Keon guníʼ ique qué zanda gacané neza binni ridagulisaa que, purtiʼ huaxiéʼ nánnabe chinu. Peru cadi zaqué diʼ biiyaʼ ca hermanu de guidxi que ni. Laabe guniʼbe: «Ora gulaa neza binni ridagulisaa que, bidiicabe naa stale dxiiñaʼ casi siervu ministerial. Raqué bidieeʼ cuenta dxandíʼ ngue cayacaniáʼ ra jma caquiiñeʼ chuʼ tu gacané». De cuxidxihuiinibe guniʼbe: «¡Ora biiyaʼ zanda gacaniáʼ ca binni que ne caquiiñecaʼ naa la? guizáʼ guluuni gana naa!». Yanna, Choong Keon maʼ naca binnigola lade ca binni ridagulisaa. Xi riníʼ ique Julie, xheelabe yaʼ. Laa guníʼ: «Nabé nayecheʼ nuudu yanna ne ridxá tipa ladxidoʼdo pur cani cayúnidu, qué huayuu dxi guni sentirdu sicaríʼ. Biúpadu para gacanedu, peru laga cayacanécabe laadu. Nabé stale cosa galán nga maʼ huadídidu raríʼ. ¡Nabé rudiʼdu xquíxepeʼ Jiobá pur cudii lugar cayúnidu xhiiñaʼ raríʼ!»

Ñee mayaca gunduuxeluʼ scuela ne caníʼ íqueluʼ xi gunineluʼ xquendanabániluʼ la? Ñee caʼruʼ guichaganaluʼ ne ñuuláʼdxiluʼ ñúniluʼ jma lu xhiiñaʼ Jiobá la? Ñee ñuuláʼdxiluʼ ñetenalaʼdxiʼ binnilídxiluʼ de modo bíʼnicaʼ xhiiñaʼ Dios dxiqué ne ñacané ni laacaʼ niguidxi fe sticaʼ la? Ñee maʼ guca jubilarluʼ ne riuuláʼdxiluʼ gacaneluʼ xcaadxi pur guiráʼ ni maʼ nánnaluʼ la? Nuuruʼ stale lugar ra caquiiñeʼ chuʼ tu chigacané para gucheeche diidxaʼ. Dxandipeʼ zacané Jiobá lii ne zudii lii stale ndaayaʼ pa cheluʼ sti guidxi chigúniluʼ jma lu xhiiñabe.