JIOBÁ nga ti Dios ni riuulaʼdxiʼ gudii (Santiago 1:17). Dede guibáʼ ra nuu guiráʼ beleguí hasta lu Guidxilayú ra nuu guiráʼ guixi gaʼ ni ruchii luni, rusihuínnicani naca Jiobá ti Dios ni riuulaʼdxiʼ gudii (Salmo 65:12, 13; 147:7, 8; 148:3, 4).

Salmo 104 nga ti canción ni rusiecheʼ ladxidóʼ Jiobá ne rusisácani laabe. Rihuinni dxíchica de guidubi ladxidóʼ hombre bicaa salmo riʼ nga bidii xquíxepeʼ Jiobá, Dios ni bizáʼ guiráʼ ni nuu. Laaca zuni sentirluʼ ni biʼniʼ sentirbe ora gúʼndaluʼ ni. Sicaríʼ na versículo 33 stini: «Zuundaʼ para Jiobá guidubi xquendanabaneʼ; dxandipeʼ zuundaʼ salmo para Dios stinneʼ biaʼ dxi guibaneʼ» (Salmo 104:33).

Rudii Dios laanu stale razón para chinándanu ejemplu stiʼ ne gudiʼnu de ni nápanu cásica rudiibe. Ca diidxaʼ guníʼ apóstol Pablu rusihuinni dxandíʼ zacá ni: «Gudxi cani napa bidxichi cadi aca nayá né ca xpidxichi caʼ, ne cadi icá lú ca ni purti zanda guiaana ca sin gastiʼ. Sínuque icá lú ca Dios ni nabani purti laa rudii laanu irá ni usieche laanu. Gudxi laacabe gaca cabe nachaʼhuiʼ, gacané cabe binni de idubi ladxidóʼ cabe, ne cadi gaca cabe naguibiʼ, sínuque iquiiñe cabe xpidxichi cabe para acané cabe stobi. Zacá zutopa lú cabe ni dxandí risaca ne ni iquiiñe laacabe stobi dxi, ne ma qué zundaa cabe enda nabani ni qué zaluxe» (1 Timoteo 6:17-19).

Lu guiropa carta bicaa Pablu ra nuu ca xpinni Cristu de Corinto, guníʼ ximodo naquiiñeʼ guni sentirnu ora gudiʼnu xiixa: «Cada tobi udii biaʼ ruluiʼlaʼdxiʼ, ne cadi acaná ladxidóʼ ti ma bidii ni, nin udii ni purti canaba cabe ni laa, purti nadxii Dios ni rudii ni laa de idubi ladxidóʼ» (2 Corintios 9:7). De raqué bisiénebe cadi binni si ni rudiʼnu que nga racaneni, sínuque laaca racaneni binni ni rudii ca, purtiʼ rudii Dios laa stale ndaayaʼ (2 Corintios 9:11-14).

Biluxe Pablu carta stiʼ ora bizeeteʼ pora nga bisihuinni Dios pabiáʼ riuulaʼdxiʼ gudii de ni napa. Laabe guniʼbe: «Diuxquixe Dios saca bidii Xiiñi pur laanu, de nin qué zanda idxela nu diidxa para iní nu pabiáʼ sicarú ni biʼni be pur laanu» (2 Corintios 9:15). Pur Jesús nga bisigaʼdeʼ Jiobá laanu guiráʼ cosa sicarú napa xquidxi. Dede qué zadxélanu ximodo gusiénenu pabiáʼ sicarú regalu riʼ.

Ximodo zanda gudiʼnu xquíxepeʼ Jiobá ne Jesús pur guiráʼ ni maʼ bíʼnicaʼ ne ni chigúnicaʼ pur laanu yaʼ. Pa gudiʼnu stale, o pa gudiʼnu huaxiéʼ la? iquiiñenu tiempu stinu, stipa stinu ne ca cosa risaca nápanu para gacanenu xquidxi Jiobá (1 Crónicas 22:14; 29:3-5; Lucas 21:1-4).