Ñee maʼ biaaluʼ guni orarluʼ la? Stale binni maʼ biaacaʼ gúnicaʼ ni, dede ca binni ni nacaʼ qué runi crecaʼ Dios. Xiñee rúnicabe ni yaʼ. Galaa de guiráʼ ca binni nabeza ndaaniʼ guidxi Francia guniʼcaʼ nuu tiru runi orarcaʼ ne riníʼ íquecaʼ purtiʼ «racaneni laacaʼ guni sentircaʼ jma galán». Zacaca runi stale binni de Europa, laacabe qué runi orárcabe para guiniʼnécabe Dios, sínuque rúnicabe ni «para si gatadxí ladxidóʼcabe». Peru laaca nuu binni ni runi cré Dios, peru runi orarcaʼ laabe ora si nápacaʼ xiixa guendanagana, ne ribézacaʼ guicábibe laacaʼ nagueendaca (Isaías 26:16).

Lii xi rábiluʼ yaʼ. Ñee riníʼ íqueluʼ racané oración ca lii para si quixhe chaahuiluʼ guiráʼ ni riníʼ íqueluʼ la? Pa runi creluʼ Dios, huayuuyaluʼ modo ricábibe ca oración stiluʼ la? o riníʼ íqueluʼ qué rucaadiágabe lii. Biblia zacané lii gudiiluʼ cuenta cadi ti terapia si nga guni orar binni, sínuque nabé risaca ni, purtiʼ ruchíñani binni gaxha de Dios.