Biblia cusiene chaahuiʼ xi chiguni Jiobá ne Jesucristu né guiráʼ yuubaʼ ni huacaa Binidxabaʼ laanu tídinu. «Nga runi beeda Xiiñi Dios, beda uchiá xhiiña binidxabaʼ.» (1 Juan 3:8.) Guidxilayú riʼ, ra nuu stale tu rachelú gapa ni napa stobi, ra nanaláʼdxisaa binni ne cayaca stale cosa malu, zedandá dxi zanitiluni. Jesús maʼ bidii stiidxaʼ «chi ilá [Binidxabaʼ] ni runi mandar ndaani [Guidxilayú] ti ladu», zanitilube (Juan 12:31). Ora maʼ binitilú ángel malu riʼ, zuzulú Dios zuni ti guidxilayú cubi ne ziuu stale guendariuudxí luni ne guiráʼ binni guibani luni ziuucaʼ tobi si (2 Pedro 3:13).

Peru, xi zazaaca ca binni qué náʼ guchaa modo nabani ne cayúnirucaʼ cosa malu yaʼ. Promesa ni cudii Biblia riʼ cacabi ni gunabadiidxanu ca: «Cani runi jneza ca nga zabánicaʼ lu Guidxilayú riʼ, ne cani qué gapa donda nga ziaanacaʼ luni», de raca ruzeeteni, ca binni malu ca «zareecabe de lu Guidxilayú riʼ, [...] ne zanitilúcabe de luni» (Proverbios 2:21, 22). Pur cani chiguizaaca ca maʼ qué ziuuruʼ cosa malu ne ziuu guendariuudxí. Ra guiree ca nga jma galán zabani ca binni ruzuubaʼ diidxaʼ ne chaahuidugá zusaanacaʼ de gácacaʼ binni ruchee (Romanos 6:17, 18; 8:21).

Para cuee Dios ca cosa malu ca qué zucueeza diʼ laanu de gúninu ni racaláʼdxinu casi rúnicabe né ti robot, sínuque zusiidibe laanu ca ley stibe ne zacanebe laanu gusiáʼndanu ca cosa malu riníʼ íquenu ne cani rúninu.

Xi zúnibe né ca cosa ni málasi rizaaca ne nabé runiná laanu yaʼ. Laabe maʼ bidii stiidxabe mayaca zuni mandar Reinu stibe Guidxilayú riʼ ne maʼ gulibe Jesús para gacaʼ rey lu gobiernu riʼ, purtiʼ laa napa poder para gusianda cani huará (Mateo 14:14). Xiiñibe riʼ laaca napa poder para gucueeza cani rizaaca lu Guidxilayú riʼ casi, xu, bi ne nisa (Marcos 4:35-41). Laabe zabeebe guiráʼ ra huayuniná «tiempu ne ni málasi rizaaca» ca (Eclesiastés 9:11). Ora laabe maʼ guni mandarbe lu Guidxilayú riʼ maʼ nin ti clase yuubaʼ qué zuniná binni (Proverbios 1:33).

Millón de binni qué guzaabiʼ gastiʼ ni maʼ guti nápacaʼ ti esperanza. Ante guindisaʼ Jesús, Lázaro, xhamigu de lade gueʼtuʼ guníʼ: «Naa nga rusibane gueʼtuʼ, ne naa nga rudiee enda nabani» (Juan 11:25). Zacá nga laani, napa Jesús poder para guindisaʼ guiráʼ ca binni ca ne gudxiguétabe xquendanabánicaʼ.

Pa racaláʼdxiluʼ guibániluʼ ndaaniʼ ti guidxilayú ra maʼ qué guizaaca binni nachaʼhuiʼ cosa malu la? bidii lugar guʼndanécabe lii Biblia. Luni zaziidiluʼ jma de Dios ni dxandíʼ ne cani naguixhe íquebe gúnibe. Ca testigu stiʼ Jiobá ni nabeza neza ra liʼdxuʼ ziuuláʼdxicaʼ gacanecaʼ lii. Rinábadu lii guyúbiluʼ laacabe o bicaa ra nuu cani bicaa revista riʼ.