Cumu Jiobá * nga bizáʼ guiráʼ xixé cosa ne laabe nga ni jma napa poder la? stale binni rugaani donda íquebe pur guiráʼ ni cazaaca lu Guidxilayú, dede né ca cosa malu. Peru, sicaríʼ riníʼ Biblia de laabe:

•  «Runi Jiobá ni jneza lu guiráʼ cosa.» (Salmo 145:17.)

• «Guiráʼ [ca] neza stibe jneza cani. Dios ni runi ni riníʼ, ne qué runi ni malu; Dios ni runi ni jneza ne qué ruchee.» (Deuteronomio 32:4.)

•  «Riá [Jiobá] binni, ne rilaselaʼdxi laacaʼ.» (Santiago 5:11.)

Rihuinni dxíchica qué runi diʼ Dios cosa malu. Peru nuu tu riníʼ ique rucaabe binni guni cani. Ñee dxandíʼ nga la? Coʼ. Biblia na: «Ora chuʼ ni uquiinde laanu uchéʼ nu la? cadi zácaxa nu Dios cuquiinde laanu, purti qué zanda uquiinde ni nadxaba Dios, ne qué ruquiinde Dios irutiʼ» (Santiago 1:13). Laabe qué ruquiindebe binni guni cosa malu. Qué rúnibe cosa malu ne qué rucaabe binni guni ni. Yanna, xi laa, o tu laa naquiiñeʼ ugáʼninu donda yaʼ.

Biblia cusiene né ca diidxaʼ riʼ gunáʼ nga tobi de ca razón pur racaná binni: «Tiempu ne ni málasi rizaaca rugaandani guiranu» (Eclesiastés 9:11). Ora rizaaca ti accidente o xiixa ni cadi cabézanu, zándaca ziuu tu zacaná pa nuucabe lugar ra guizaaca ni ne hora gácani. Raca chupa mil iza, guníʼ Jesucristu de dxi biaba ti torre ni biiti 18 binni (Lucas 13:1-5). Qué ñati diʼ ca binni que pur modo nabánicaʼ, sínuque purtiʼ nuuca gaxha de ra nuu torre que ora biábani. Ca dxi stinu riʼ, terremoto ni bininá guidxi Haití lu beeu enero 2010, biitini 300,000 binni casi bizeeteʼ gobiernu stiʼ guidxi ca lu ti informe, ne bininani guiráʼ binni de guidxi que, tutiica nácacabe. Ca guendahuará ca laaca runinácani tutiica binni ne ora tiica si.

Zándaca chuʼ tu guinabadiidxaʼ: «Ñee qué ñanda nucueeza Dios de nizaaca ca desgracia ca la? Ñee qué ñanda ñápabe binni nachaʼhuiʼ de ca yuubaʼ ca la?». Nga runi, para ganda guni Dios xiixa la? naquiiñeʼ ñánnabe padxí chiguizaaca ca cosa ca. Ne neca zanda gánnabe xi chiguizaaca despué la? nuu xiixa naquiiñeʼ guinabadiidxanu: Ñee riquiiñebe poder ni nápabe ca para guiniʼbe xi guiráʼ chigaca la? (Isaías 42:9.)

Biblia na: «Nuu Dios stinu guibáʼ; guiráʼ ni guyuuláʼdxibe gúnibe maʼ bíʼnibe cani» (Salmo 115:3). Zacá nga laani, runi Jiobá guiráʼ ni ruuyaʼ caquiiñeʼ guni, peru qué rúnibe guiráʼ ni zanda gúnibe. Ne ngaca nga ni rúnibe ora ruuyabe xi chiguizaaca despué. Casi dxi bidale cosa malu ndaaniʼ ca guidxi Sodoma ne Gomorra,  Dios gudxi Abrahán: «Maʼ gudixhe iqueʼ guieteʼ para guuyaʼ pa dxandíʼ modo cucaacabe ridxi naa pur guiráʼ cosa malu cayuni binni, ne pa coʼ la? zannaʼ ni» (Génesis 18:20, 21). Gudiʼdiʼ ti tiempu qué niná Jiobá ñanna xi guiráʼ cosa malu cayaca ndaaniʼ ca guidxi que, nga rusihuinni qué riguixhe íquebe gúʼyabe xi guiráʼ cosa chiguizaaca (Génesis 22:12). Qué riníʼ diʼ nga qué zanda gánnabe xi chiguizaaca. Biblia na: «Ca dxiiñaʼ stibe biaʼsi cani»; nga runi maca nuu pora ruuyabe xi chiguizaaca despué para gúnibe ni maʼ gudixhe íquebe. Laabe qué rucaabe guirutiʼ guzuubaʼ peʼ stiidxabe (Deuteronomio 32:4). * Pur cani maʼ bizéʼtenu ca ridúʼyanu maca nuu pora nga ruuyaʼ Dios xi chiguizaaca despué.

Laaca napa binni donda pur cayaca cosa malu. Sicaríʼ cusiene Biblia ximodo ruzulú binni guni cosa malu: «Ni riulaʼdxi nu ni cadi jneza, nga nga ni ruquiinde laanu, purti ricá ique nu ni, ne zacá randa riguba yu ni laanu dede inaaze dxiichi ni laanu. Ne ni qué usaana de icá ique ni cadi jneza la? zuchee. Ne ni qué usaana de uchee la? zati» (Santiago 1:14, 15). Zacá nga laani, ora guni binni ca cosa malu ni riale de ndaaniʼ ladxidóʼ la? runiná laca laa (Romanos 7:21-23). Lu guiráʼ ni huayaca lu Guidxilayú riʼ rihuinni huayuni binni stale cosa malu ni nabé huayuniná xcaadxi. Ne cadi ngasi, ca binni malu ca rucaacabe xcaadxi binni gúnicaʼ cásica cayúnicabe, ne zacá zidale binni ni cayuni cosa malu (Proverbios 1:10-16).

Ñee naquiiñeʼ guni Dios xiixa la? Ñee naquiiñeʼ gucueeza Dios laanu de gúninu cosa malu la? Guiníʼ íquenu modo bizaʼbe laanu. Biblia na bizáʼ Dios laanu casi laa. Pur nga zanda gápanu ca guenda ni nápabe (Génesis 1:26). Ne laaca bidiibe laanu ti regalu nabé sicarú: laanu cuinu xi gúninu. Zanda cuinu gannaxhiinu laabe ne gúninu ni na ca ley stibe (Deuteronomio 30:19, 20). Pa nucaabe laanu ñúninu modo riuuláʼdxibe, ñee cadi casi ora ñáxhabe ni bisigáʼdebe laanu ca la? Ñee cadi ñácanu casi ti robot ni niguíxhebe guni ni riuuláʼdxisibe la? Ngaca nga ni nizaaca pa ñápanu ti destinu, o kismet, ni nuluíʼ xi guiráʼ chigúninu ne xi chiguizaacanu. Rudiʼnu xquíxepeʼ Dios purtiʼ rusisaca laanu ne rudii lugar laanu cuinu xi gúninu lu xquendanabáninu. Peru qué riníʼ diʼ nga qué ziuu dxi gusaananu de tiidinu yuubaʼ pur ca cosa malu ni riguixhe ique xcaadxi binni guni.

Pa nuluinu ti binni hindú o ti budista guendarinabadiidxaʼ ni zeeda lu primé yaza stiʼ  revista riʼ, zándaca niniʼbe: «Rizaaca binni nachaʼhuiʼ stale cosa malu purtiʼ nga nga ley de Karma: caguíxecabe pur cani bíʼnicabe dxi bibánicabe ante». *

Para guiene chaahuinu tema riʼ, guidúʼyanu xi riníʼ Biblia de guendaguti. Ndaaniʼ jardín ni guyuu Edén que, ra bizulú xquendanabani binni guidxilayú, sicaríʼ gudxi Dios Adán, primé hombre que: «Zanda goloʼ cuananaxhi stiʼ guiráʼ yaga ni nuu ndaaniʼ jardín riʼ dede guidxá ndaaniluʼ. Peru cuananaxhi stiʼ yaga stiʼ guendananna ni jneza ne ni cadi jneza cadi liica goloʼ ni, purtiʼ dxi lii goloʼ ni, dxandipeʼ zátiluʼ» (Génesis 2:16, 17). Pa nuzuubaʼ Adán diidxaʼ ne qué nuchee la? ñanda nibani sin qué ñuu dxi ñati. Rati binni purtiʼ qué nuzuubabe diidxaʼ. Ora bizulúcabe gúpacabe xiiñicabe, «ucuá enda guti que irá xixé binni» (Romanos 5:12). Nga runi zanda guininu guendaguti ca nga ni riguíxenu pur rucheʼnu (Romanos 6:23). Ne Biblia na: «Ni ma guti la? ma bilá de lu ná [guendaruchee]» (Romanos 6:7). Ca diidxaʼ ca rusihuínnicani maʼ qué riguíxeruʼ binni pur ca donda stiʼ despué de gatiʼ.

Ca dxi stinu riʼ, millón de binni riníʼ racaná binni guidxilayú pur ni rábicabe karma. Ni runi cré ni bizéʼtenu ca riníʼ zaa (gacaná ne zaqueca zaa gacaná sti binni) ne qué ruchiiñaʼ ni laa. Peru karma ca qué rusiidiʼ ni ziuu dxi guiaana de guizaaca cosa malu. Ni rusiidiʼ ni nga zusaana binni de gacaná ora gatiʼ ne guibani lu sti cuerpu pa guni ni jneza ne guiziidiʼ xiixa ni risaca. Cani maʼ bizéʼtenu ca, gadxé cani de cani rusiidiʼ Biblia. *

Ni jma napa donda pur guiráʼ cosa malu ni cayaca nga Binidxabaʼ ne cadi binni. Primé que guca Binidxabaʼ ti ángel ni biʼniʼ ni na Dios, peru despué maʼ qué ñuu dxi niniʼbe «ni dxandíʼ» ne pur laabe guyuu guendaruchee lu Guidxilayú (Juan 8:44). Ximodo guca nga yaʼ. Gúcani ndaaniʼ jardín ni guyuu Edén que dxi bicaabe ca binni que gucaalucaʼ Dios (Génesis 3:1-5). Jesucristu na labe «[B]inidxaba» ne «xaíque sti guidxilayú» (Mateo 6:13; Juan 14:30). Stale binni guidxilayú zinándacaʼ Binidxabaʼ ra rúnicaʼ guiráʼ ni rinabaʼ beela ládicaʼ laacaʼ ne ra qué rúnicaʼ ni na ca ley stiʼ Jiobá (1 Juan 2:15, 16). Sicaríʼ na 1 Juan 5:19: «Naaze dxiichi [B]inidxaba idubi guidxilayú». Peru laaca guleechú Binidxabaʼ caadxi ángel ni nuu guibáʼ ne maʼ bidaagucaʼ laabe. Biblia na caguítebe ique «irá binni» ne zaqueca cayuni ca demonio stibe, ne pur nga cadídinu stale yuubaʼ (Apocalipsis 12:9, 12). Nga runi, Binidxabaʼ nga napa donda pur guiráʼ cosa malu ni cayaca.

Rihuinni dxíchica cadi Dios nga napa donda pur guiráʼ cosa malu ni rizaaca binni. Laaca cadi dxandíʼ diʼ laabe nga rucaabe laacaʼ gacanacaʼ. Lugar de nga maʼ bidii stiidxabe chindeebe guiráʼ cosa malu, casi chiguidúʼyanu lu sti tema ca.