Julio: Xi tal xa Ernesto, nayecheʼ nuaaʼ cayuuyaʼ lii sti biaje. Nabé riuuladxeʼ guendaʼ guiráʼ semana para guininu de cani rusiidiʼ Biblia. * Ximodo nuuluʼ.

Ernesto: Galán, xquíxepeʼ lii.

Julio: ¡Galán xa! Últimu biaje bedaganna lii que gúninu xiñee laadu ca testigu stiʼ Jiobá rinidu iza 1914 nga bizulú cayuni mandar Reinu stiʼ Dios. * Maʼ bidúʼyanu capítulo 4 stiʼ Daniel racané laanu ganda guininu zacá ni. Rietenaláʼdxiluʼ xidé ngue guninu la?

Ernesto: Ajaʼ, de bacaandaʼ gupa rey Nabucodonosor.

Julio: Biaʼsi. Laabe guníʼ xcaandabe ti yaga naroʼbaʼ ni yendá dede guibáʼ. Lu bacaandaʼ que binadiágabe guníʼ ti ángel stiʼ Dios ugácabe yaga que. Ti ndaa si yaga que biaana ne xcu ni. Ne gudiʼdiʼ si «gadxe tiempu» bigaa yaga que sti biaje. * Laaca bidúʼyanu maʼ guca cumplir profecía riʼ chupa biaje. Rietenalaʼdxuʼ padxí guca ni primé la?

Ernesto: Cadi dxi guyé xpiaaniʼ Nabucodonosor ne guyuube zaqué gadxe iza la?

Julio: Jneza. Guyé xpiaanibe ngue runi maʼ qué ñácarube rey. Yanna, guiropa biaje gucaʼ cumplir profecía riʼ nga dxi maʼ qué ñuni mandar gobiernu stiʼ Dios lu Guidxilayú riʼ gadxe tiempu. Bizulú bigabaʼ tiempu que lu iza 607 ante de ca dxi stiʼ Jesús, dxi binitilú Jerusalén. Dede dxiqué nga maʼ qué niquiiñeruʼ Jiobá rey para ñuni mandar lu Guidxilayú. Ra biluxe tiempu que gulí Dios sti rey, peru yanna maʼ guibáʼ. Sti modo guiénenu ca diidxaʼ riʼ nga ra guiluxe gadxe tiempu riʼ zuzulú zuni mandar Reinu stiʼ Dios ni nuu guibáʼ. Bueno, maʼ bidúʼyanu padxí bizulú bigabaʼ gadxe tiempu ca. Yanna caquiiñeʼ gánnanu pabiáʼ bindaa cani para gánnanu xi iza bizulú cayuni mandar Reinu stiʼ Dios. Ñee ziyéneluʼ ni la?

Ernesto: Ajaʼ. Maʼ cayedasilú naa ni guninu nase que.

Julio: Biaʼsi. Yanna guidúʼyanu pabiáʼ bindaa gadxe tiempu ca. Gupa xidé biindaʼ ni sti biaje para cadi guiaandaʼ cani naa. Chiguneʼ stipa pur gusieneʼ ni lii.

Ernesto: Bueno.

Julio: Primé biaje gucaʼ cumplir profecía riʼ, dxi gúcani luguiáʼ Nabucodonosor, gadxe  tiempu que bindaa cani gadxe iza. Peru guiropa biaje gucaʼ cumplir ni, dxi gúcani luguiáʼ Reinu stiʼ Dios la? jma xadxí bindaa cani.

Ernesto: Ximodo nannuʼ ni yaʼ.

Julio: Primé la? purtiʼ gadxe tiempu ca bizulú ni dxi binitilú Jerusalén lu iza 607 ante de ca dxi stiʼ Jesús. Pa dede dxicá guzulunu ugábanu gadxe iza la? zindanu lu iza 600 ante de ca dxi stiʼ Jesús. Peru iza que qué nihuinni gastiʼ de Reinu stiʼ Dios. Ne casi maʼ bidúʼyanu, dxi beeda Jesús lu Guidxilayú riʼ stale siglu despué de iza ca, guniʼbe caʼruʼ diʼ guiluxe gadxe tiempu que.

Ernesto: Ajaʼ, maʼ bietenaladxeʼ.

Julio: Nga runi biaje riʼ la? gadxe tiempu ca cadi gadxe diʼ iza ni. Jma xadxí zandaani.

Ernesto: Jma xadxí nouʼ la? Pabiáʼ zandaani yaʼ.

Julio: Biaa, lu libru stiʼ Apocalipsis, zeeda ti profecía cásica ni zeeda lu Daniel ne zacaneni laanu gánnanu pabiáʼ bindaa gadxe tiempu ca. Lu profecía ca rieeteʼ chonna tiempu arondaʼ zeeda gácani 1,260 dxi. * Nga runi, pa ugábanu cani chupa biaje la? rizaa gadxe tiempu ca ne biaʼsi rudiini 2,520 dxi. Jma maʼ ziyéneluʼ cani caninu riʼ la?

Ernesto: Maʼ, xi si la? qué ganda diʼ guieneʼ chaahueʼ xiñee runi cretu bizulú Reinu stiʼ Dios cayuni mandar lu iza 1914.

Julio: Bueno, chigusieneʼ ni lii pue. Lu caadxi profecía zeeda lu Biblia ruzeeteʼ, ti dxi zeeda gácani ti iza. * Pa ugábanu gadxe tiempu ca casi na ca profecía ca 2,520 dxi ca zeeda gácani 2,520 iza. Ne pa guzulunu ugábanu 2,520 iza ca dede iza 607 ante de ca dxi stiʼ Jesús, dxi bizulú gadxe tiempu que la? zindanu lu iza 1914. * Nga runi zanda guininu iza ca nga biluxe gadxe tiempu ca ne guca Jesús Rey lu Reinu stiʼ Dios. Ne lu iza 1914 que bizulú bizaaca stale cosa ni maca bizeeteʼ Biblia zahuinni lu ca últimu dxi.

Ernesto: Casi xi laa yaʼ.

Julio: Lu Mateo 24:7 guníʼ Jesús xi zazaaca ora guzulú guni mandar dede guibáʼ: «Zucaa lú ti gobiernu sti gobiernu ne zucaa lú ti guidxi sti guidxi, ne ziuu enda huará zaguixhe idubi naca ti guidxi, ne zaca gubiña ne xu stale lugar». Biiyaʼ guʼyuʼ guníʼ Jesús ziuu guendarindaana ne zaca xu. Cadi laacani nga cani cadúʼyanu lu Guidxilayú riʼ dede iza 1914 la?

Ernesto: Dxandíʼ nouʼ.

Julio: Laaca guniʼbe zaca guerra. Ne lu libru stiʼ Apocalipsis rieeteʼ cadi ndaaniʼ ti guidxi si zaca cani, sínuque zaca cani stale lugar ne zuniná cani guidubi Guidxilayú. * Rietenalaʼdxuʼ padxí guca Primera Guerra Mundial la?

Ernesto: Iza 1914. Biaa, biáʼsipeʼ iza riniʼtu bizulú cayuni mandar Jesús. Nin qué huaníʼ iqueʼ nga.

Julio: Zácapeʼ nga laani, ne rinidu zacá ni purtiʼ riénedu ne rudiʼdu cuenta bizaa gadxe tiempu ni rieeteʼ lu profecía que iza 1914 ne laaca iza riʼ nga bizulú guca cumplir profecía ni caníʼ de ca últimu dxi. Laadu, ca testigu stiʼ Jiobá runi credu iza 1914 ca nga bizulú cayuni  mandar Jesús ne dede iza ca bizulú nabáninu lu ca últimu dxi. *

Ernesto: Cayuneruaʼ stipa pur guieneʼ guiráʼ ndiʼ.

Julio: Nannaʼ. Naa laaca cadi casi ziaa bieneʼ ni primé biaje bisiénecabe ni naa. Peru ribezaʼ gacané cani guninu riʼ lii guiéneluʼ neca qué rieeteʼ iza 1914 ndaaniʼ Biblia, laadu ca testigu stiʼ Jiobá nápadu razón para guni credu bizulú cayuni mandar Jesús iza ca. Laaca ribezaʼ gunda bisieneʼ lii lu Biblia nga zeeda guiráʼ ni runi credu.

Ernesto: Ajaʼ, ne nga nga ni jma ridxagayaaʼ purtiʼ intiica guinabadiidxaʼ lii rusiéneluʼ cani naa né Biblia ne qué riniʼluʼ «Naa rabeʼ» o «Naa riníʼ iqueʼ». Guiráʼ ora riquiiñeluʼ Biblia. Peru, xiñee nabé nagana para guiénenu ni pue. Xiñee qué niníʼ ca Dios zaca Jesús rey lu iza 1914 yaʼ.

Julio: Jneza ni gunabadiidxaluʼ ca Ernesto. Nuuruʼ stale cosa ni zeeda lu Biblia ni cadi casi zeʼ diʼ binni riene. Peru xiñee biʼniʼ Dios ni zacá yaʼ. Xiñee naquiiñepeʼ gúninu stipa para guiénenu cani yaʼ. Ñuuláʼdxiluʼ nibiguetaʼ sti semana ca para guininu de laani la?

Ernesto: Ñuuladxeʼ pue. Cabezaʼ lii.