Coʼ, qué huayúnidu nga, sínuque ni rúnidu nga ora guidúʼyanu gadxé ni runi credu de ni na Biblia la? ruchaʼdu ni runi credu.

 Guiráʼ cani runi credu zeeda cani lu Stiidxaʼ Dios. Ne neca lu iza 1950 guleedu Traducción del Nuevo Mundo de las Santas Escrituras, maca dede ante ruyúbidu guiene chaahuidu Biblia. Ne para nga biquiiñedu xcaadxi traducción. Guidúʼyanu caadxi de cani maca runi credu ante cueedu Traducción del Nuevo Mundo. Rinábadu lii gúʼyaluʼ pa zeeda cani runi credu lu Biblia.

1.   Ni runi credu: cadi naca Dios ti Trinidad. Sicaríʼ bizeeteʼ revista Zion’s Watch Tower (yanna lani Torre stiʼ rapa) lu beeu julio, iza 1882: «Ca binni ni ruundaʼ ca revista stidu nánnacaʼ runi credu Jehová Dios, Jesús ne espíritu santu, peru laaca nánnacaʼ qué runi credu naca Jehová, Jesús ne espíritu santu tobi si, o casi na xcaadxi chonna binni naca ti Dios, purtiʼ cadi nga diʼ rusiidiʼ Biblia».

     Ni rusiidiʼ Biblia: «Jehová Dios stinu, tobi si Jehová» (Deuteronomio 6:4, Reina-Valera [RV], 1865). «Tobi lucha si Dios nuu ne nga nga Dios Bixhózenu, ne de laa beeda guiráʼ xixé cosa, ne para laa nabáninu. Ne zaqueca tobi lucha si Señor Jesucristu.» (1 Corintios 8:6, Rv, 1865.) Jesús guníʼ: «Jma risaca Bixhozeʼ que naa» (Juan 14:28, Torres Amat, 1823).

2.   Ni runi credu: gastiʼ ti infiernu ra rié binni malu para chaquiʼ. Lu revista Zion’s Watch Tower ni biree lu beeu junio, iza 1882, zeeda ti tema ni láʼ «Ni riaxa pecadu nga guendaguti». Ca diidxaʼ ca biree cani lu Romanos 6:23, ne tema que cuzeeteʼ sicaríʼ: «¡Biaa pabiáʼ nayaguiéʼ ni ná ca diidxaʼ ca! Neca stale binni na Stiidxaʼ Dios nga ni cá lu Biblia gadxepeʼ ni rusiidicaʼ. Laacaʼ runi crecaʼ riguixe binni xpecadu ora checaʼ infiernu ra qué ziuu dxi gusaana de gacanacaʼ, ne nacaʼ nga nga ni rusiidiʼ Biblia».

     Ni rusiidiʼ Biblia: «Alma ni guchee zati» (Ezequiel 18:4, 20, RV, 1865). Dios qué zunitilú ca xhenemigu ndaaniʼ ti lugar ra qué gusaana de gacanacaʼ, sínuque zunitilube laacaʼ tobi si tiru (2 Tesalonicenses 1:9).

3.   Ni runi credu: ti gobiernu nga Reinu stiʼ Dios, qué rapa diʼ binni ni ndaaniʼ ladxidóʼ. Revista Zion’s Watch Tower ni biree lu beeu diciembre, iza 1881, cuzeeteʼ de Reinu stiʼ Dios: «Ora maʼ guni mandar reinu stiʼ Dios zunitilú ni guiráʼ ca gobiernu ni nuu lu Guidxilayú».

     Ni rusiidiʼ Biblia: «Ne dxi stiʼ ca rey que la? Dios ni nuu guibáʼ zedané ti reinu ni qué ziuu dxi guinitilú. Ne reinu riʼ qué zadiʼdiʼ ni lu náʼ sti guidxi. Zunideni ne zunduuxeni guiráʼ ca reinu riʼ, ne laani ziaana ni ne qué ziuu dxi guiluxe ni» (Daniel 2:44, Scío de San Miguel, 1850).

 Coʼ; laadu, ca testigu stiʼ Jehová, riquiiñedu gadxé gadxé traducción para gusíʼdidu cani runi credu. Dxandíʼ, ora gábidu binni pa riuulaʼdxiʼ guiziidiʼ de Biblia la? rudiʼdu laa Traducción del Nuevo Mundo sin quixe. Peru pa chuʼ tuuxa gacalaʼdxiʼ guiziidiʼ né sti traducción la? laaca rusíʼdidu laacaʼ.