Guleʼ Ciudad Obregón, riaana ni ladu gueteʼ de México. Naa nga lu gaayuʼ baʼduʼ de gáʼ ni gupa jñaaʼ. Gulézadu guriá guidxi, ra rapa bixhozeʼ ti ranchuhuiiniʼ. Nabé galán lugar que para cueza binni, ne guizáʼ nayecheʼ ne tobi si guyuu familia stidu. Málasi, dxi napaʼ gaayuʼ iza, binduuxeʼ ti huracán raqué, ngue runi gupa xidé yendézadu sti guidxi.

 Bizulú bixhozeʼ biʼniʼ ganar galán, peru laaca bizulú guxúdxibe. Ne nga nabé bininani xquendaxheelabe, ngueca laadu. Naa ne ca bicheʼ bizuludu gudúbadu ca gueza ni ribánadu stiʼ bixhozeʼ. Napaʼ xhoopaʼ iza primé biaje uxudxeʼ. Ti tiempu despué, bisabixheelaʼ jñaaʼ ne bixhozeʼ, ne pur nga jmaruʼ si biabaʼ lu ca viciu stinneʼ.

 Yendezané jñaaʼ sti hombre ne yené laadu. Qué rudii hombre que laabe bueltu ne qué rugaanda ni runi ganarbe que para guibáninedu. Ngue runi, naa ne ca bicheʼ bínidu intiica si dxiiñaʼ. Neca zaqué, qué ribeedu para ni jma caquiiñedu. Naa bineʼ volear zapatu, laaca bituaaʼ pan, periódicu, yaala ne xcaadxi cosa. Laaca guzayaʼ ndaaniʼ guidxi biyubeʼ guendaró lade guixi stiʼ ca binni ricu.

 Dxi napaʼ chii iza, gudxi ti señor naa guneʼ dxiiñaʼ ra basureru stiʼ guidxi. Bineʼ aceptar, bisaanaʼ scuela ne bireeʼ de ra lidxeʼ. Gudíxebe naa chii bexu ti dxi, ne rudiibe naa guendaró ni ribeebe lade guixi. Bizayaʼ ti lugar ra cuezaʼ né ca cosa ni bidxelaʼ raqué. Nabé riníʼ ca binni ni nabeza raqué diidxaʼ dxabaʼ ne runi cometercaʼ inmoralidad sexual. Stale de laacaʼ marihuanu laacaʼ ne rixúdxicaʼ. Nabé nagana guca ca dxi que para naa. Guiráʼ gueelaʼ ruunaʼ ne maʼ cayacaditeʼ tantu cadxibeʼ. Cumu pobre naa ne huaxiéʼ guzayaʼ scuela la? guizáʼ bituí luaʼ. Biaʼ chonna iza guleza ra basureru que. Despué guyaa sti guidxi, ne bineʼ dxiiñaʼ lu layú ra ruchuugucabe guieʼ, xiaa, nite ne papa.

 Tapa iza despué, bibiguetaʼ Ciudad Obregón. Tobi de ca stiaʼyaʼ ni naca curandera, gudxi naa zanda guiaanaʼ ra lidxi. Guizáʼ feu ca ni guniéʼ xcaandaʼ ne gucaʼ deprimir dede guníʼ iqueʼ ñuuteʼ naa. Ti gueelaʼ bineʼ orar Dios ne gudxeʼ laa: «Señor, pa dxandíʼ nga runi existirluʼ la? racalaʼdxeʼ gunebiaʼyaʼ lii ne guneʼ ni naluʼ para siempre. Pa nuu ti religión ni dxandíʼ la? racalaʼdxeʼ gunebiaʼyaʼ ni».

 Siempre guyuuladxeʼ guiziideʼ de Dios. Neca nahuiineʼ, guyaaʼ stale yuʼduʼ de gadxé gadxé religión. Peru qué ñuuladxeʼ ni runi nin tobi de laacaʼ. Qué nusiidicaʼ naa gastiʼ de lu Biblia ne qué ñacanecaʼ naa ñunebiaʼyaʼ Dios. Caadxi de ca religión que jma risaca bueltu para laacaʼ ne ndaaniʼ xcaadxi de laacani runi cometer binni inmoralidad sexual.

 Dxi napaʼ 19 iza, gudxi tobi de ca xcuñaduaʼ naa biluíʼ ca testigu stiʼ Jehová laa xi rusiidiʼ Biblia de ca bidóʼ napa binni. Biindanebe naa Éxodo 20:4, 5, ra ná cadi naquiiñeʼ gúninu bidóʼ. Sicaríʼ ná versículo 5: «Cadi naquiiñeʼ guzuxíbiluʼ xañeecani ne cadi guquinde lii guni adorarluʼ cani, purtiʼ naa Jehová Dios stiluʼ, nacaʼ ti Dios ni rinabaʼ guni adorárcabe laa si». De racá gunabadiidxaʼ xcuñaduaʼ naa: «Pa niquiiñeʼ Dios bidóʼ para ñuni malagru o ñábibe laanu iquiiñenu ni para guni adorarnu laabe, ¿xiñee cayuni prohibirbe yaʼ?». Bicaani naa guiníʼ iqueʼ. Ne dede dxiqué nabé rinidu de ni ná Biblia. De tantu riuuladxeʼ ni rinidu que nagueenda ridiʼdiʼ tiempu.

 Gupa si dxi, naa ne xcuñaduaʼ guyuudu ti reunión stiʼ ca testigu stiʼ Jehová. Nabé guyuuladxeʼ ni biiyaʼ ne ni binadiaʼgaʼ. ¡Dede né ca ni nahuiiniʼ runi participarcaʼ lu reunión ne ora riniʼcaʼ nezalú guiráʼ, nabé galán rúnicaʼ ni! Guizáʼ bidxagayaaʼ ni rusiidicabe binni raqué. Neca ziuulaʼ guicha iqueʼ ne huaxiéʼ galán modo nacuaʼ lari, guirácabe gúcacabe nachaʼhuiʼ né naa. Ne biniʼ invitar ti familia naa chitahuaxieniaʼ laacaʼ despué de reunión.

 Ra biʼndané ca Testigu naa, biziideʼ naca Jehová ti Padre ni nadxii ne ni rizaalaʼdxiʼ guiranu, ne qué rulábibe pa ricu o pobre laanu, raza stinu o pa guzanu scuela o coʼ. Biaʼca risaca guiráʼ binni para Dios (Hechos 10:34, 35). Maʼ qué runeʼ sentir cayaadxaʼ xiixa risaca lu xquendanabaneʼ.

 Nabé nagueenda bizulú bichaa xquendanabaneʼ. Bisaanaʼ de cubaʼ gueza, de xhudxeʼ ne maʼ qué niniéʼ diidxaʼ dxabaʼ. Chaahuidugá bisiaandaʼ guiráʼ ni gudideʼ dxi nahuiineʼ ne maʼ qué niníʼ xcaandaʼ feu. Laaca bisaanaʼ de guiníʼ iqueʼ qué risacaʼ, bininácani naa stale. Ne guníʼ iqueʼ zacá pur guiráʼ ni gudideʼ dxi nahuiineʼ ne pur huaxiéʼ guzayaʼ scuela.

 Ne bichaganayaʼ ti buena gunaa ni nadxii Jehová ne racané naa stale. Yanna maʼ superintendete stiʼ ca testigu stiʼ Jehová naa ne rigannaʼ ca congregación ca para cuaa gana ne gusiideʼ ca hermanu stinneʼ. Maʼ qué rituí diʼ luaʼ tu nacaʼ purtiʼ ma bisianda Biblia naa ne galán guiráʼ ni cusiidiʼ Dios naa.