Chiguzéʼtenu ni bizaaca domingu 5 stiʼ enero 2014, dxiʼbaʼ Serge Gerardin ndaaniʼ ti autobús ni zeʼ ra chigapa ca testigu stiʼ Jiobá asamblea gaxha de París (Francia), málasi biiyabe guca ti accidente nabé naroʼbaʼ. Laabe guniʼbe: «Bidxelasaa carru que ti muru de concretu ni raʼtaʼ lu carretera para cadi chuʼ tu guilá ñee puente ne biasa ni lu bi. Óraque bidxelasaa ni puente que, gucuá guí ni ne gutasá ni».

Nagueendaca biyubi Serge xi guni. Xiñee yaʼ. Purtiʼ nácabe capitán stiʼ ca bomberu ne maʼ napa jma de cuarenta iza rúnibe dxiiñaʼ riʼ. Sicaríʼ guníʼ Serge: «Neca gadxé carril ziuudu, gunabaʼ chofer que cuezadxí, bieteʼ ndaaniʼ autobús que ne nagueendaca guyaaʼ ra nuu carru naze bele que». Binadiaga Serge cucaa tuuxa ridxi: «¡Lagacané naa!». Laabe guníʼrube: «Nacuaʼ traje ne nuu corbata yanneʼ ne cadi ziniaaʼ herramienta runeniáʼ dxiiñaʼ. Peru ora binadiaʼgaʼ gucuá ridxi que bidieeʼ cuenta nuuruʼ binni zanda guilá».

Guzásibe guidubi vuelta carru que, biiyabe ti pasajeru qué guidxela xi guni ne gucanebe laa. Serge guníʼ: «Gúdxibe naa nuuruʼ xhupa binni ndaaniʼ carru que. Biaʼ hora que mápeca ríʼ binni raqué, peru cumu nandáʼ gubá cundaa bele que la? qué ñanda ñacanécabe».

Bedané chupa chonna hombre rusá camión caadxi extintor ne despué de gudxi Serge laacaʼ xi gúnicaʼ, bichacaʼ ni ra cacá guí que ne gulezadxí bele que ti ratuhuiiniʼ. Cumu nagaʼ chofer que xaʼnaʼ carru que la? gucané xcaadxi binni Serge para gundísacaʼ ni ne guxubiyucaʼ hombre que dede guleecaʼ laabe raqué.

Serge guníʼ: «Málasi biasa bele que sti biaje». Peru nuuruʼ sti binni ndaaniʼ carru que nanda lu cinturón de seguridad stiʼ. Bidxiña ti hombre nuu gacané, dxiʼbaʼ ti motocicleta, nacu lari de guidi ne laaca bomberu laa. Gudxi Serge laabe mayaca gachexquíʼ carru que, ne gudixhe íquecabe cubayúcabe xiʼqueʼ hombre que ne cueecabe laa raqué. Casi guleecabe hombre que, guchexquíʼ carru que.

Ora beeda ca bomberu ne cani rudii primeros auxilios, maʼ laacaʼ biʼniʼ tendercaʼ cani gucaná lu accidente que ne bisuiʼcaʼ bele que. Laaca biʼniʼ tendércabe Serge, purtiʼ biruuguʼ ne bidxuíʼ náʼ. Ora gudxíʼbabe lu autobús que sti biaje, guyé caadxi hombre yegudii xquíxepeʼ laabe saca gucanebe.

Guizáʼ nayecheʼ nuu Serge purtiʼ biʼniʼ ni gúndatiʼ para gucané. Laabe guniʼbe: «Bineʼ sentir zabidxi Jiobá, Dios stinneʼ, cuenta naa pa qué guneʼ xiixa. Aque nayecheʼ nuaaʼ purtiʼ gunda gucaniáʼ ca binni ca guilacaʼ».