KAPITA 8

Wai Rengbe Mi ka Zio Wene Abakure?

“Ka si du nga mi na zinga, mi naida boro du ho mi peke gimi bipai fu ni. Ka si du nga mi na gberãrago, mi naida boro du ho nga gu ni nika fu wasa fere. Ka si du nga mi na ngbarago, mi naida boro du a nga guni nika du na ngbarago mbiko mi na ngbarago. Tipa re, mi nabihe nga si ni nyanyakipa pai kadu na abakure.”​—Brittany.

I NAAPE gupai nga rukutu agude naida na agu aboro ka i angimbaro na yo, kuru aboro kini idi na ndikidi abakure. Gini kparakparapai du ho ti gupai re?

Ho mo adu ni ni gude, mo anaaida na kura agude tipa oni ningi mbaro na yo.

I anaaye fuoro tipa ka mo naabingo ho nga mo nisaro ya. 

 Ono tie, awere wa mo nada ni kuru boro, mo naida na ndikidi abakure, nga gu boro mo adianga kina regbo gbua na ni ya ono nga gu boro a mo peka gamo nyanyakipa apai fu ni. Kurii gure, Baibiri nape gupai nga “Badia ngbanya nakpi nyemu badiani na arago dunduko, ono i avungu wirina tipa unda ni rago gberãngbi.” (Asanza 17:17) Si nawiraha nga gipai re nasakapai gbe tipa dudunguro pabakure susi gu pabakure du dagba agude ho du yo ni bangimbaro yo!

Rengo: Wa mo nikaa sona kaa nyaka mo naida na agu abakure nga aguyo

1. Du na wene asino ti yo

2. Naraka kuti gu wene gene mangaapai rengbe ka ye na taarimo

3. Nika du na wene maapai kuriro

Sanahe: Waigu rengbe mo ka gbia agu abakure du apai tipa yo wa gu re? Ani wisigingo agu abangua apai re ni basasa.

Bambata banguapai nibipa Bakure wene asino

Gupai si aida mo ini he. Anga ai boro rengbe kada ni ndikidi bakurea boro te. Zavura Baibiri nape gupai nga “Abadia nangahe kina ho nagbarasa abadia yo.” (Asanza 18:24) Gupai re ima rengba kaa ngera wa durugopai. Ono mo berẽnga kurii gipai re, ya mo ‘bakureamo’ adunga ho naida gbua ka nze rii ngongo ro? Watadu ya mo mo adu nga na kura bakureamo nga gu ni nape rimoro ho adunga mo ni ya watadu nga gu ni na gbaraga kere gbigbita aziree ti rimoro? Ngbatungapai wa gure rengbe ka sa ro ka mo kidongo kuti gu bakureamo re berewe ya. * Dedede, mo ni tingidi gupai nga anga pa nge namba abakureamo nayugo gupai nga mo na wene abakure te!

Gupai rengbe mo ka mangaha. Mo sia agu aboro ni abakureamo du na gu wene asino tiyo mo naima rengba ka wirikaha.

“Aboro dunduko du na wene bipai tipa nakureami nga Fiona.  Mi naida aboro nifura tipa re ngba wene gene a. Mi naida kadu na kina ngbatunga agu asino du tiri a. Tipa re tigimi asino ri ima ngba.”​—Yvette, 17.

Mo asadingo ka manga gi sunge re.

1. Mo gedi AGaratio 5:22, 23.

2. Mo ki sananga tiro nga, ‘Ya mo abakureami na agu asino tiyo du paha rogo “zuzu Toro”?’

3. Mo keke nga rimo mbembedi abakureamo kusende ane. Mo kekepa agu asino du tiyo pati arimo yo wa du yo ni basasa.

Rimo

․․․․․

Sino

․․․․․

Birĩ: Ka kina pa gbegberẽ asino yo ye ku riroyo, gure ima rengba kadu nga regbo mo sia gu kura abakure ngba kisusi yo!

Ue banguapai nibipa Bakure—Wene gene mangaapai rengbe ka ye na taarimo

Gupai si aida mo ini he. Ho du mo ni na bakere nyemu ka du na abakure, si nawira wa mo ima rengba gbe ka gbia kina gbegberẽ abakure. Baibiri naya: “Gu badiata nga ga mumungo aboro, ima azía yo wa sa.” (Asanza 13:20) Gu fugo nga “mumungo aboro” abingo pa agu aboro nati ati sukuru yo watadu adunga ni airatatamana ya te.  Kuba gure, si nabipa agu aboro aidanga kuti gu wene aberãpai du mburuhe rii tatamana ya, i napeka kina fuo wasiwasi mangaapai. Gu re nga ngbatunga agu abakure si aidanga mo du na yo ya!

Gupai rengbe mo ka mangaha. Kuba gupai ga kaa zio bakure na ai boro, mo nisia abakureamo asia. (Atambuahe 26:4) Anga gipai re nayugo gupai nga mo nisogo kura aboro te. Rogo gi bangiriba re, pa sia mo abakureamo nayugo gupai nga mo ima du na inohe “ka kparaka dagba rurupai na gbegberẽpai, na dagba gu boro namanga pa Mbori na gu boro amanga nga pa ko ya.”​—Maraki 3:18.

“Mi na bakere tambuahe nga avungure aundo re mi gbia wene abakure​—nga agu aboro du garãyo wakina gimi namanga wenengai rogo toro yo.”​—Christopher, 13.

Mo karagapai kuti agi asanahe re:

Ho du mi ni na abakureami, ya mo mi naabaka bangire nga i nika sosoda re mi mangi gupai mi naima inoho nga si ni gbegberẽ he?

□ Ii

□ Oó

Ya mo mi naadindiko adindiko ka yugo abakureami fu avungure mbiko mi nagunde nga avungure arengbanga ka ida mi zi bakure na yo te?

□ Ii

□ Oó

Birĩ: Ka gamo karagapai du nga ii kuti agu asanahe du kuari re, mo gbata agu abakure naraka ringbisihe kuti wene ruru gene mangaapai​—aguyo moi wene kpiapai nibipa gu raka nga ga aKristano.

 Biata banguapai nibipa Bakure​—Wene maapai kurii

Gupai si aida mo ini he. Baibiri nape gupai nga: “Gbegberẽ kpamiatise nagbarasa wene sino.” (1 AKorindo 15:33) Paranga boro du rimori nga Lauren aya: “Akuare sukuru yo aaida nami kinaho mi anaamanga agu apai ni i anaaida mi ni mangihe. Mi anidu ni sare sidu, mi adiberã ka mangapai wakina yo wa ka mi rengba kaa koda tire na yo.” Lauren aye ka bi gupai nga ho mo afu tiro ni kaa raka kuti gu gene raka nga ga kura aboro, mo naye kadu wakina kungbo sura he nga gu kina boro ata nofodaha si ni mangisunge. Si aidanga mo du wa gure te!

 Gupai rengbe mo ka mangaha. Mo kati pabakure na agu aboro nazomia ro nga mo aria gamo gene raka tipa si da wa gayo kere gene raka. Ka mo mangi gi diandue re, abakureamo ima rengba kadu gbua tooni; ono mo nika duadu na ngbarago tipa tiro, na mo nika du na dungu amomu ka zio wene abakure​—ngbatunga aguyo rengbe kadu na wene maapai kuriro.​—ARomo 12:2.

“Mbembedi bakureami nga Clint na ruru bipai na ko na berãpa gu bipai aberã nga ga kura aboro, ni sangbana gipai re, ko ima du ni bakerepa wasa fere.”​—Jason, 21.

Mo sananga tiro na agi asanahe du re:

Ya mo mi na’aria gu gene mi avoda tire, mi afura ngbaha, watadu ka mangapai ngba gbegberẽ gene tipa ka sa ngbarago ti abakureami?

□ Ii

□ Oó

Ya mo mi naabi tire nga mi nandu ku rogo gu kere aba arukanga paha ya nga gu ka abakureami adunga ho ya mi ndu nga ku rogoho te?

□ Ii

□ Oó

 Birĩ: Ka si dunga mo karagapai nga ii kuti agu asanahe du kuari re, mo ndu fuo avunguro watadu gu kura nyanyaki aboro tipa wene arugute. Ka si dunga Dezire Yekova nga mo, mo ima rengba ka fura na Bakumba nga Kristano ka pe gupai fuko nga mo naida naundo nibipa sia agu abakure nika du na wene maapai kuriro.

MO GEDI DUNGU APAI TIPA GI RIIPAI RE ROGO VOLUME 2, KAPITA 9

ROGO GU GAANI KAPITA NGBEFUO GERE

Ya mo bakureamo watadu ngbaduro yo​—nafõ ro mo nimangi gbegberẽ apai? Mo bingo wai rengbe mo ka ne gupai re!

[Gu rukutu kekeapai du bandu kpewaraga yo]

NYANYAKIPA VERESI

“Kura badia boro kina ho ka ni kuti ni ki susi wirinani.”​—Asanza 18:24.

[Gu Sanduki du ti kpewaraga 60]

“Ho avungure angarasi re ni nga mi ne kura ngbatunga badona nga ga abakure, mi aya fu tire wẽ, gere nga gu yangara aboro mi aida ka koda tire na yo. Ga avungure rugute angia rengo, na ho mi aberẽ ni kurii he, mi abihe nga dungu abakurea kinaho rengbe mi kadu na yo.”​—Cole

[Gu sura du ti kpewaraga 63]

Ho mo afu tiro ni kaa raka kuti gu gene raka nga ga kura aboro, mo naye kadu wakina kungbo sura he nga gu kina boro ata nofodaha si ni mangisunge