KAPITA 35

Waigu Rengbe Mi Kada ni Bakurea Mbori?

Tingbafuo Jeremy gbiatiko na kere gberãrago, ko aye ka ino pa wai du pabakure na Mbori na nyanyakipaha. Ko ape gupai nga “ho garãre adu ni 12, buba ambu rani. Rogo gu kura yuru sa dimo yo, mi aamanga kparakpee, kini zungadi Yekova tipa ko sa buba ko karaga tiko.”

Rogo gu bakere gberãrago Jeremy adu na ni re, ko atona geda gako Baibiri. Ho ko agbia Atambuahe 10:14 ni, si aima fõ ngbaduko yo nikerehe gbe. Gu veresi re nape gupai tipa Yekova nga: “Gu ni zanga undahe nafu tini ku bero; mo adu ni mounda awirinyaure.” Jeremy aya: “Mi abi gupai nga Yekova aafura fere na ko aaida mi ini gupai nga ko nga gi moundo; na ni Buba. Wene ba ho rengbe mi ka du na ni ki susi ko te.”

SINGIA mo rogo ngbatungapai wa gu du tipa Jeremy watadu mo rogoho te, Baibiri nayugo gupai nga Yekova naida mo du ni bakureako. Nirengo, Baibiri nape gupai nga: “Oni mbédi na Mbori, ko ki mbedi na oni.” (Yakoba 4:8) Mo berẽnga gupai agi afugo re ayugoho: Wa vura duhe nga ka mo bingo ko te—na apai ima du tipa ko ni kparakparaha kisusi wai du he tipa ro—Yekova Mbori nayamba ro mo du ni bakureako!

Ono tipa kadu ni bakurea Mbori, si nika ida mo mangi ome amanga. Ni kpiapai: Ka mo ruku ambumbudo dimoyo, mo ima ino gupai nga si arengbanga ka sona nisaha te. Tipa si sono wenengai, si nikaa ida mo ni tudihe na ime dedede na mo ki moihe rogo gu ba rengbehe arengba ka sona rogoyo. Kina gu bangisapai re du tipa du ni bakurea Mbori. Waigu rengbe mo ka songoda ngbatunga gu bakure re tipa si nisono?

Ndu Gupai Nyakipa Wisigo Baibiri Ti Ni

Pabakure nakoda agene ue nga ga fugo dagbase—degatue gbiati fugo dagbase. Kina gu bangisapai re a du tipa du na bakure na Mbori. Geda Baibiri na kini wisigihe nga gu gene ani adegaturani ka gia gupai Mbori agumbaha furani ngbaha.—Atambuahe 1:2, 3.

Rengo ngaha nga, si ima rengba kadu nga wisigopai dagba agu apai yo mo akpingo nyemuhe gbe ya. Tipa dungu paranga aboro gupai rengbe ka ngbatiyo gbe nga bi TV, ngi mbaro, watadu ka gbia ngbarago ti gu kodatise nga ga abakurea yo. Ono ka mo aida kada ni bakurea Mbori, kura wiri guru gene ho rengbe mo kada ni bakureako ngbaha susi gu nga ka pekafuo agu adiandue dunduko ko naima sigiraha tipa agu aboro naida kada ni abakureako te. Si nika ida mo degeturo fuko ni geda mo Baibiri.

Ono tie, ka mo bakingo bangiro ya. Si aidanga wisigo Baibiri du ni gupai boro amangaha wa sunge zio te. Mo ima rengba ka wirika wai ka gbia ngbarago ti ni—ka si vura du vurũ nga mo naabi tiro ni gu boro akpingo nyemu kaa wisigopai ya. Gu bambatapai si aida mo mangihe nga ka maa regbo tipa wisigo Baibiri. Gu kura degude du rimori nga Lais aya, “Mbakadapai kina bere tipa wisigo Baibiri, mi naageda kapita sa rogo Baibiri ni bambatapai wiso.” Maria, du garãri 15, na gari mbakadapai tigari kia. Ri aya, “Mi naageda Baibiri tooni na ayuru dunduko mbata fu mi ra.”

Tipa ka tonaha, rogo gamo mbakadapai nga ga wisigopai, mo bi gu  sanduki. Tingbafuoho, mo kepa gu regbo ku sande rengbe mo ka dia aminiti 30 watadu susi gure ka wisigo Fugo Mbori.

․․․․․

Maa regbo nga tonatonapai gbua. Nibasa fuo mo tona gedaha nzunzu, mo nika ye ka ino gu rengopai nga geda Baibiri taata ti aregbo dũ te. Mo ima rengba ka ida kuti gupai Jezreel du garãri 11 agumbaha nga, “Gu kura apapara Baibiri kinaho naida mo gbeberã ro agbe wenengai kuti ni mo kini ru ka rugatiro na ni na mo arengbanga ka gbia ngbarago ti ni zaatu gbe te.” Ka mo aabi tiro wa gure, ka mo mbunga gedaha ya. Ai gu regbo mo aida ka tona gamo wisigo Baibiri, mo du na gu bipai nga mo nadia regbo ka degaturo fu Yekova Mbori nga bakureamo. Ni yangaraha tie, gu bakio ngbarago gbiati amosoro rengbe mo ka gbiaha ti geda Baibiri, naru riipa gu ome mo amangaha kaa wisigoho!

Kparakpee na Nyanyakipaha

Kparakpee nga gu gene ani afura na Mbori rogoho. Mo berẽnga kuriipa wai du kparakpee ni bawene gamahe kisusi! Mo ima rengba ka fura na Yekova Mbori ti ai regbo uru watadu yuru. Ko nga regerege ka degatuko foro ti aregbo dũ. Kurii gure, ko naida aida nzunzu ka gia agu apai du ngbaro. Si nga ndu gupai Baibiri angarasa ro ti ni nga: ‘Oni yúgu gaoni sanahe fu Mbori dunduko rogo kpe na zungaditise ni tambuahe.’—AFiripoio 4:6.

Awa gu veresi re nayuguhe, badungu apai gudu ho rengbe mo ka fura na Yekova riipaha. Gipai re ima rengba ka koda gamo akpakarapai gbiati abakabangirise. Si ima rengba ka koda agu apai a du mo na tambuahe tipaha. Nirengo, ya mo mo naatambua nga abakureamo tipa gu weneapai i amangaha foro te? Mo ima rengba ka manga kina gupai re a fu Yekova nga gu ko naima manga dungu weneapai foro kisusi gu rengbe ai bakureamo ka mangaha foro.—Atambuahe 106:1.

Ku sende ane, mo kekepa agu apai du mo na tambuahe fu Yekova tipaha.

․․․․․

Zanga kapa, ti kura aregbo, agunde kinaho gbiati abakabangirise ni naafuda berãro yo afuda. Atambuahe 55:22 naya: “Mo bá ga tindiro ku auru Yekova, ko asóngoda ro; ko aída nga i gbisi ruru boro wa sa te.”

Rogo agi agene waraga du ku sende re, mo keke nga agu abakabangirise du mo na ni mo aida ka manga kparakpee tipaha.

․․․․․

Agu Apai Mangi Foro Rogo Gamo Raka

Gu kura papara gamo pabakure na Mbori kinaho si aidanga mo bihe na paha taata ya. Gu bake papara atambuahe nangia Davide akepai nga: “Oni ía Yekova ka bi ko ko du ni wene ko!” (Atambuahe 34:8) Ho Davide ake gu bia tambuahe ni nga namba 34 gu regbo re gu ko akuru rogo gu kereapai namangiko rogo gako raka yo. Ko anaaora ka batasa ungako be gu baimiaboro nangia Bakindo Saura—nga gu kerepai naima fuda ko gbe rogo gako raka yo. Ono fuoho, si aidi ko ndu kaa gbuko dagba avurako nangia aFereseto. Ko agbiatiko na gupai nasako ko ni gi kina fuõ kpio, gipai re asa Davide ko mangi tiko wa ka i ya ko nga irapupo na ko kidu na rengba ka bata be avurako.—1 Samuere 21:10-15.

Davide aabingo ho nga gako kere birĩ du nasako ko bati kpokoto be avurako te. Kuba gure, ko afu taarimo fu Yekova. Bara ti tonatona gu papara atambuahe i nipe paha kuari re, ko ake gupai yo nga: “Mi agbata Yekova, ko ki karaga pai fere, ki batasi re be gimi agunde dunduko.” (Atambuahe 34:4) Agu apai namangi tipa Davide rogo gako raka yo du nasako ko zungodi aboro nga “oni ía Yekova ka bi ko ko du ni wene ko!” *

Ya mo mo rengbe ka berãnga pa gupai namangi ro rogo gamo raka yo nga gu nayugo gu gopai nga Yekova nangera angerafuo ro? Ka singia mo ima rengba ka tingidaha, mo kepai tipa gupai re sende ane. Pai gere rengbe ka undoro tipa mo sia kpiapai: Si aida nga gupai namangi rogo gamo raka re duadu mbata ni baiiriwopai te. Mo asadi ka berẽkuriipa agu amaku mo agbiaha na auru dũ, nga gu mo naima rengba kaa bihe nga paha taata

․․․․․

Isoke avunguro ima yugo Baibiri. Ka ngia wodu he, maku du nga ha. Wa vura duhe wo, si naida mo sonosi gamo pabakure na Mbori nitiro. Ka si du nga mo ata manganga ha wo te, si naida mo mangisunge na agu apai du rogo gi kapita re si undo ro mo tona mangaha wo. Yekova nika fu maku afu kurii gu ome mo amangaha. Baibiri naya: “Oni sana he tipa he, i ki fu he fu roni; oni gbata ha, oni ki bi he abi.”—Matayo 7:7.

[Gu rukutu kekeapai du bandu kpewaraga yo]

BANGUA VERESI

“[Aboro ngbarago nga agu aboro inipa gu gayó azingo nga ga toro.”—Matayo 5:3, NW.]

BERÃPAI

Mo naageda akpewaraga biama nga ga Baibiri na auru dũ, na mo nika nyasa geda Baibiri vuru he yo wa garã sa.

 YA MO MO ININGO GIPAI RE . . .?

Gu rengo nga mo nageda gi buku re kini mangipai kuti agu arugute nga ga Baibiri du rogo yo nayugo gupai nga Yekova naberãpa ro aberã.—Yoane 6:44.

 GUPAI MO ABERÃPA MANGAHA!

Tipa ka gbia bakere undo ti geda Baibiri nisase, mi nika ․․․․․

Tipa kaa manga kparakpee dedede, mi nika ․․․․․

Gupai mi aida ka sana vungure (watadu avungure) tipaha nibipa gi riipai re nga ․․․․․

GINIPAI MO ABERÃHA?

● Waigu rengbe mo ka sa gamo wisigo Baibiri nisase si du ni gupai mo agbia ngbarago ti ni?

● Tipagine Yekova aida ti ni ka degatuko kuti agu akparakpee nga ga kpakpa aboro?

● Waigu rengbe mo ka mbakada gu gene mo amanga kparakpee ngbaha si du ni wenehe?

 

Ho mi adu ni ni paranga re, mi anaadogoda kina bangisa kparakpee. Awere mi naasada ka manga kparakpee tipa gu weneapai gbiati gu gbegberẽ apai namanga fere rogo auru ni bakiakia. Wa duhe nga gupai nimangi areme kinaha rengbe ka manga gbata te, gipai re nasa re ka mi naadogoda nga kparakpee ya.’’—Eve

[Gu sanduki]

Mo Wisigi Gamo Baibiri

1. Mo sia pangbanga nga ga Baibiri nga gu mo akpinyemu ka gedaha. Mo mangi kparakpee tipa tatamana tipa ka giarogo gupai yo mo agedaha.

  2. Mo gedi gu pangbanga re sirisiri. Ka mo oronga aoro na gedaha ya. Wa mo nikaa gedaha, mo asadi kaa bi kpia gupai re berãro yo wagu pai namanga amanga. Mo asadi ka maa nga tiro ku rogo gupai re ka bingo gu maapai ka si adu na ni kuriro: Mo asadi ka bi gupai naamanga, ka gia afugo agu aboro mo agedapai tipa yo, ka gia fuõ wege, ka ia gu riahe naadu yo, gbiati kura dungu apai. Mo sa gu pangbanga re si du ni ungaha berãro yo!

3. Mo berẽkurii gupai mo nagedihe. Mo sana tiro na asanahe, wa angbatunga gu nga:

● Tipagine Yekova amoi gi pangbanga re ti ni ku rogo Fugoko yo?

● Gini aboro rengbe ani ka wirika gayo kpiapai, na gini aboro du gayo kpiapai nga ga zahe furani?

● Ginipai rengbe mi ka wirikaha ti gi pangbanga re?

● Ginipai gi pangbanga re ayugoho fere tipa Yekova na gu gene ko amangaapai ngbaha?

4. Mo mangi wiri guru kparakpee fu Yekova. Mo pepa gupai fuko mo nawirikihe ti gamo wisigo Baibiri na wai mo aida ka mangasunge na gupai mo nawirikihe re rogo gamo raka yo. Mo naatambua Yekova dedede tipa gu gamahe ko nafuhe foro—nga Fugoko, nga Ziazia Kekeapai!

“Ga pai wa baro tipa ndure, nga imarago ngba gi gene.”—Atambuahe 119:105.

[Gu sanduki]

Mo Diberã ka Manga Gupai du na Nyanyakipaha Gbe

Ya mo apai ima nge tiro ka regbo adunga tipa manga kparakpee ya? Regbo bero tipa ka wisigo Baibiri te? Dedede, si nabipa agu apai mo naperesi paha mbatayo.

Mo asadingo ka manga gipai re: Mo dinga he ki moi kikindigi ambia kurogo yo. Awere tie, mo dinga ngume ki kusuko ho fuani—tona sende yo ki da kuari. Gu he re nika hii be ambia gbiati ngume.

Awere, mo kusukongo ho kusayo rogo guhe re, ono ki banda kina gu bangisa ngume gbiati ambia re. Mo asadingo ka manga kina gi bangisapai re ono ngba kura gene kia: Mo hiisingo guhe re na ngume, na tifuoho mo ki asadi ka maa ambia ku vuruhe yo. Ba ho tipa ambia te? Si wo mbiko ti gi regbo re, mo moi ngume mbata ku vuru guhe re yo.

Ginipai rengbe ani ka wirikaha? Baibiri naya: “Oni rugutironi naapa agu apai duna nyanyakipaha gbe.” (AFiripoio 1:10, NW) Ka mo peresipa agu apai mbatayo du ni rukutuhe wa aũzambuasitise, si nawira wa regbo dunga bero rogo gamo raka yo tipa ka manga kikindigi apai nga ga toro te. Ono ka mo pekefuo gu rugute nga ga Baibiri, mo nika bi gupai nga regbo kina bero tipa agu apai nga ga Kindo gbiati bete zambuasitise. Si naruriipa gupai mo aperesapaha mbatayo ni bambataha!

 

Wakina agu ambumbudo i arũ he dimoyo, pabakure na Mbori naida tuda ha tipa si sono