Mo berẽnga kurii gi kpiapai re: Ho Julia angera ni ku bitirobi yo, ri nabi tiri nga kpakpuriyo tuukputuukpu. Ri ya fu tiri, “Si naida mi mangipai ka uguda tooni.” Ono avunguri na anakureari nape gupai furi nga ri umba wakina ndirika.

Bambeda kusayo, Julia aberẽpa manga bakerepai tipa ka umba berewe kandara tooni. Ri adiberã ka ra na gomoro tipa bete arame . . .

Ka mo abi tiro wa gu Julia abi tiri, ginipai ka mo mangihe?

Gbegberẽpai ngaha foro mo nibakibangiro tipa wai du bangera ro te. Baibiri zaatu nasambuo pa kura adee na akumba asambuo nga aguyo naadu ni bawenehe yo gbe, wa Sara, Raere, Abigaira, Yosefa, na Davide. Baibiri napepa degude nangia Abisaga ki ya wẽ “tamari angba gbe.”—1 Abakindo 1:4.

Ono tie, dungu paranga aboro nabakabangiriyo ni bakerehe tipa wai du bangerayo. Gupai re rengbe ka ye na kerepai. Mo berẽnga kurii gipai re:

• Rogo kura wisigopai sa, 58 rii kama nga ga adegude naabi tiyo nga i aima kio kisusi ome, baraho duhe ni nga 17 rii kama du gbua naadu wo nzunzu.

• Rogo kura wisigopai, 45 rii kama nga ga agu adee omeyo adu gbua tooni aberẽ gupai tigayo nga i aima rõa kisusi wai si aidaha!

• Dungu gu paranga aboro nambu riahe tipa ka uguda aima gbia kaza nga gu rengbe arengba ka imo boro, na kinawo duhe a tipa aguyo nambira dawa ka kio.

 Ka mo kparia gupai nga kaza namanga ro mbiko gipai re, mo asadi ka gbia undo. Mo rengbe ka gumbaha mbata fu avunguro watadu kura nyanyaki boro rengbe mo arengba ka kido kuti ní. Baibiri naya: “I avungu wirina tipa unda ni rago gberãngbi.”—Asanza 17:17.

Ka gumba rengo, wene asino du nasa boro ní ngba bangiri aboro. Mo berẽnga pa wiri Bakindo Davide nangia Abisaroma. Baibiri naya tipa ko wẽ:

“Boro adu nga sa dagba aYisaraere dunduko tamani adu wa ga Abisaroma i atambua ni wa ko te; tona ti kpanduko ki da ti riko serõ adu nga ti ko wa sa te.”—2 Samuere 14:25.

Ono tie, gi paranga re agasi ngba rukö, gbegberẽ nyemu pagbia, gbiati biriki! Sidu tie, Baibiri afuranga tipa ko ki ya ko angia wene boro te; ono si nayugo ko ni gu boro naadunga ni ruru ní fu bani ya na kidu na nyemu imo aboro.

Sidu Baibiri afu gu rugute ti ni furani nga:

‘Oni ukadi gu vovo boro.’—AKorosaio 3:10.

“Gaoni fongo ka si du nga ni gu fongo du bangirise . . . ya; ono si du ni gu okooko boro du kpoto yo.”—1 Petero 3:3, 4.

Wa vura duhe nga pai ho gberẽ ti gupai nga boro idi ka ngba te, gu ngbanya nyakipaha gbe nga wene sino. Kumbatayo, wene asino nika sa ro mo ngba bangiri aboro susi gu nga ngbanya kpotose. Degude nga Felisia aya: “Ngbanya nagbe bangiri aboro ni kina ipo, ono gupai aboro nikaa tingida paro ti ni nga gamo wene asino.”

Ya mo rago naagberã tiro mbiko wai du bangera ro?

Ya mo mo aberẽnga pa mbida ambi, ka mbira dawa tipa ka kio, watadu ka gino riahe tipa ka uguda?

Ka gene nidu bero, ginipai ka mo niariaha ti kpotoro? (Mo gbahe ti agu ka mo niariaha.)

• BASONARO

• BARÕARO

• MANGERIRO

• FIGA

• KPAKPURO

• RANGI KPOTORO

Ka singia mo karagapai nga ii kuti gu bambata asanahe du ue na ki gbahe ti apai biata watadu susihe rogo gu biata sanahe, mo berẽnga kurii gipai re: Si rengbe arengba kadu nga aboro abingo ro wa gu mo abi tiro nga ngbanga mo re te. Si taata mo niberẽ ni bakerehe tipa tiro ki ya ngbanga mo te, si ki vura du vurũ nga ngba mo angba.—1 Samuere 16:7.