Kumba gene anaadunga beko wa ka ko ndu ya, anaasungo ngbadimo yekaru na aˈuru dũ kaa ho ahe. Rogo gu kura bebere uru sa, ko abi aPetero na Yoane i nindu ku yekaru yo. Ko aya fuyo: ‘Mi nazungadi roni, oni funga he fere.’ Petero aya: ‘Wenehe ngba kisusi marã mi aida ka fuhe foro. Ni rimo Yesu, mo guari ki ndu!’ Sidu, Petero aundo gu kumba re ko guari kuari, ko ki tona ka ndu! Rago aima ngba ti rimbasa aboro na gu iˈiriwopai re na dungu aboro ki da ni aidipase.

Ono aboromotumo gbiati aSadoke adu na zinga. I azi amokedi, ki ndu na yo ku ngbangayo, ki sanayo nga: ‘Da nifu ome furoni oni husi gi kumba re?’ Petero aya: ‘Ani agbia ome be Yesu nga guko oni aimiko.’ Abarumbatayo rogo pambori apoi kuari ki ya: ‘Oni mbu fura tipa Yesu!’ Ono amokedi aya: ‘Ani du wa ka ani fura tipa ko. Ani ambungaha te.’

Nibasa tingbafuo i mbu aPetero na Yoane i ga, i andu fuo gu kura abawiriki na ki gumba gupai fuyo naamangi. I akparikpee wa sa na yo, kini sana Yekova nga: ‘Ako, mo undo rani ani du ngangarã tipa wa ka ani rengbe kaa manga gamo sunge amanga kindi.’ Yekova afu gako ziazia toro fuyo, na i ki susi kumbatayo kindi kaa tungusapai na kini husi aboro. Badungu aboro kini da ni aidipase. Asadoke akpipai kuti amokedi i ki ziyo ki bayo ku bambukiso yo. Ono yuru, Yekova akedi gako amaraika, ko ki zaki ngbadimo bambukiso ki ya fu amokedi wẽ: ‘Oni karagatironi ku yekaru yo ka yugupai yo.’

Fuo girarago, ababanda bambukiso ape gupai fu ga aYudo agbia-ngbanga na abarumbatayo rogo pambori nga: ‘Bambukiso ni kina kisikisihe ono agu aboro oni aziyo re, i ima kura! Gu kura boro niya i yekaru yo nayugopai fu aboro!’ I azi amokedi ki karagayo berewe ku bambu-ngbanga yo. Gbiamotumo aya: ‘Ani aza roni nga ka oni  furanga tipa Yesu ya!’ Ono Petero akaragapai nga: “Ani gi nga sangba Mbori agia susi ga aboro.”

Abangbembatayo rogo pambori adu na bakere zinga i ki idi ka imo amokedi. Ono gu Farusi rimoko angia Gamariere aru kuari ki ya: ‘Oni du na rubangirise! Si ima rengbe ka du nga Mbori na kina agu akumba re. Ya mo oni naida ka sovura nirengo na Mbori?’ I aima dia gako arugute kugume. Tingbafuo ho, i ata amokedi, ki fu zahe berewe fuyo nga i mbu tungusapai, na ki mbuyo i ga. Ono gipai re aarugusanga amokedi te. I aandu kindi kumbatayo kaa tungusipai na wingbaduse yekaru yo na rogo kporo na kporo.