Vunga fogogude naye na bakere ngbarago na bakere sunge fu arogotise. Vovo avungugude naye ka bi gupai nga bakere regbo na sunge si aidaha tipa ka ngerafuo gude. Zanga rame gbiati kura fudifudiapai rengbe arengba ka ye na pai ku rogo gaoni ramukporo. Oni dunduko ue si aida oni mangi ariapai tipa ka ngerafuo wironi na kini banda gaoni rogatise. Wai rengbe agu arugute nga ga Ziazia Kekeapai ka undo roni oni mangipai wenengai sa gi kpakaraapai re?

GUPAI ZIAZIA KEKEAPAI AGUMBAHA: “Nyemuse nahi pai ni gbanga ha, ki du na weneringise.” Na nyemuse “agbata nga ga ha pai te, si aẽra nga te.” (1 AKorindo 13:4, 5) Wangia mo vovo nagude, gupai namanga nibasa nga mo namaa berãro gbe kina koyo du fogo wiro ni. Ono tie, kumbamo rengbe ka tona bihe nga mo amaanga berãro tipa ko te, sidu, ka bangiro gonga ti kumbamo ya. Ka mo du na zerangbaduse na weneringise, mo rengbe arengba ka sa ko ko nibi gupai nga mo naberã pako aberã na oni kaa ngerafuo gude na ko sa.

“Akumba, oni rá kporo na yo na rugatinapai.” (1 Petero 3:7) Mo rugutiro na gupai nga bakere regbo du diaro nikaa diaha ka ngerafuo gude. Ri na vovo asunge beri nga gu rengbe arengba ka batasa omeri watadu na ye na gberarago kuti ri. Kura aregbo kinaho a rengbe ngbaduri ka ima kuti ro, ono ka mo zinginga ya, bambiko ‘gu boro du ni bayee ní tipa zinga ngba ki susi gu ni nga iraome.’ (Asanza 16:32) Mo du na rugatinapai, na kini undo ri rogo agu apai ri aidaha.​—Asanza 14:29.

GUPAI RENGBE MO KA MANGAHA:

• Bagude: Mo undo diaro ti ngerafuo gude, zavura yuru. Mo gurusi gu regbo mo adiaha kuti kura apai tipa kaa dia regbo wenengai na diaro gbiati wiro

• Nagude: Ka kumbamo ya foro ko naida ka undo ro ti sunge gude, mo idi gako undo. Ka ko amanganga ha wenengai ya, ka mo bisiranga ko ya, ono mo yugu wai fuko ni zera ka ko nimangihe

GUPAI ZIAZIA KEKEAPAI AGUMBAHA: “I ki du wa boro sa.” (Bambata Pai 2:24) Ka si vura du nga vovo boro ye ku rogo gaoni kporo, si naida mo nitingidi gupai nga mo na gamo badiarogatise nga “boro sa” kindi.

Diakumba, mo du na tambuahe tipa wai kumbamo aundo ro. Gamo afugo tambuahe rengbe arengba kadu ni “husa.” (Asanza 12:18) Kumbakudee, mo pepa wai fu diaro mo akpinyemuri na kini biri na kikii pari. Mo sambuo ri tipa wai ri angerafuo kporo.​—Asanza 31:10, 28.

“Ka boro gbáta nga gani he ya, ono gu ngba fu kurani.” (1 AKorindo 10:24) Mo nimangi gupai ngba tipa gamo badiarogatise ti aregbo dũ. Oni di regbo kaa fura, guni kini tambua guni, na kini gi guni. Nibipa kodaba, ka boro niberẽnga kina pa tiní ya. Mo niberẽpa gu nyemupai na azingo nga ga gamo badiarogatise. Ziazia Kekeapai naya: “Ka gu ni ka nga fu gu ni ya.” (1 AKorindo 7:3-5) Oni nifura afura rii gipai re gbayaga dagbaroni. Gaoni hipai na giatise rengbe ka nyakasa gaoni rogatise.

GUPAI RENGBE MO KA MANGAHA:

• Ka bangiro gonga ti dia regbo oni sungu nga kina roni ue ya

• Mo nimangi rukutu apai ka sa diaro watadu kumbamo ní nibihe nga mo nakpinyemu ní akpi, wa gu nga fu wiri gamahe watadu ke wiripai funi

GUPAI ZIAZIA KEKEAPAI AGUMBAHA: “Ho mo adu ni ni gude, mo atona ina gu Ziazia Kekeapai rengbe na fu tatamana foro sa bata.” (2 Timoteo 3:15) Oni sogima agu apai oni ka mangaha tipa wironi. Gude nainopai ni kina ipo, zavura mbata fu i vungu ru. Ho du gude ni kindi vuse yo, u rengbe arengba ka ino fugoroni na kini inipa gaoni ngbarago watadu gberarago. Oni gedipai furu u ki du kindi ni fogoru. Ka si vura du nga u agianga rogo gupai yo oni agedaha te, manga oni he wo rengbe ka sa ru u kpinyemu gedapai ho u nika ngara ni.

Oni ima tona nifura furu tipa Yekova mburu kindi ni fogo ru. U nigi gu kpee oni afuhe fu Yekova. (Pa Fu Rugute ni Ue he 11:19) Ho oni angimbaro ni na u, oni fura tipa agu ahe Mbori akusihe. (Atambuahe 78:3, 4) Wa wironi nikaa sona, u nikaa bi gu nyemuse abi du oni na ni tipa Yekova, na u kini wiriki wai ka kpinyemuko a.

GUPAI RENGBE MO KA MANGAHA:

• Mo kpari tipa Yekova fu tatamana foro mo sonosi wiro wenengai

• Mo nigumba bangua apai agumba kindi fu wiro tipa u tona wirikapai mburu kindi tooni gbe