FU PARANGA ABORO
9: Gupai I Aino Boro Tini
GUPAI SI AYUGOHO
Gupai i aino ro tini ima susa gupai gbua nga ka ino rimoro na wai mo angera. Si nakoda gamo mangapai, agu apai idi mo kuti ni, gbiati asino ro. Nirengo, agu apai i aino boro tini nga agu apai dunduko du tipa gu ngbatunga boro nga mo ku dimoyo na ku zegi.
NDU GUPAI DUHE TINI NA NYANYAKIPAHA
Ho mo aru ni nyanyaki, gure nga mo naru ka songodapai tipa agu apai mo naidi kuti ni kuba gupai nga ka mbu abakureamo i du na maapai kuriro.
“Badungu aboro wa kina agu akandi i naasa aroko tini. I asianga agu aroko i avoda ha te akurayo du nasiaha fuyo.”—Adrian.
“Mi ima wirika wai ka ru tipa gupai du ni ruruhe zavura ho duhe ni ni kpakarakpakaraha vurũ. Mi ima rengba ka ino ada nzunzu nga abakureami ti wai i amangapai na wai mi amangapai ho du yo ni.”—Courtney.
BANGUA RENGO NGA GA BAIBIRI: “Ka oni ríngbisi nga tironi na gi zegino re ya, ono oni sá tironi asa ni mbakada berãroni berewe”—ARomo 12:2.
GUPAI RENGBE MO KA MANGAHA
Mo berẽpa gini ngbatunga boro nga mo awere na gini ngbatunga boro mo aida ka du nga ni ni wisigo mo agu apai ngarã mo rogoho, gamo arungbura, gbiati agu apai mo naidi kuti ni. Gu wene gene mo narengbe ka tonaha ngbaha nga nigbia mo akaragapai kuti agi asanahe du re.
Agu apai ngarã mo rogoho: Gini abirĩ du tire? Gini apai du mi rogoho wenengai? Ni kpiapai, ya mo mi naabanda regbo? Ya mo mi nidu na zatise? Ya mo mi nga gu boro namangasunge nyanyaki? Ya mo mi nga gu boro nagama he? Gini weneapai mi naamangaha?
BERÃPAI: Ya mo si kpakara akpakara mo ini gu weneapai du tiro? Mo sana avunguro watadu gu bakureamo du mo na kido kuti ni tipa ni pepa gini wene asino ni nabihe tiro na tipa gine ni apehe tini wo.
BANGUA RENGO NGA GA BAIBIRI: “Boro niásadi kina gani sunge, ni nikadu na gu pai ka ni tambua tini mbiko kina ha sa, mbiko kurani te.”—AGaratio 6:4.
Arungbura: Gini asino re si aida mi mangi ome gbe tipa ka manga ariapai rogoyo? Gini aregbo si awira wa mi rengbe ka du ni asadiasadi re ka manga gupai du ni gbegberẽhe? Gini agene mi narengbe ka manga ome rogoyo tipa ka du na bakere zatise?
BANGUA RENGO NGA GA BAIBIRI: “Ka ani ya ingapai ti rani te, ani nangi tirani.”—1 Yoane 1:8.
Agu apai idi mo kuti ni: Gini wene arugute mi apeka fuoho, na tipagine? Ya mo mi idi kuti Mbori? Gini gopai sare mi idi kuti gupai nga ko kina tini? Gini mangaapai mi abihe nga si ni gbegberẽhe na tipagine? Gini apai idi mi kuti ni nga si nika manga kumbatayo?
BANGUA RENGO NGA GA BAIBIRI: “Sia pa pai abátasa ro; rugatinapai abánda ro.”—Asanza 2:11.
Gere Ima Rengba a ka Ngba Tiro
AKARAGAPAI KUTI ASANAHE 10 PARANGA ABORO NAASANAHA
Da Nga Mi?
Pa ino mo agu arugute mo araka kutini, pa omero, na gamo asásá rengbe ka undoro mo mangi wene diaberã ho du mo ni rogo asada.
