UNDO TIPA AGU ABORO DU ROGO IMISIRI

Bawene Undo fu Agu Aboro Narungo be Kpio Gayo Aboro

SI TONA MANGASUNGE

GU IMISIRI NAYE MBIKO PA ZANGA BORO ROGO KPIO YO NGA GUPAI DUNGU ABORO NAIMA MANGA WISIGOPAI TIPAHA NI BAKERE ROGO AGI AREGBO RE. Ono tie, awa i ayuguhe mbata kusayo, agu arugute wene abawirikipai afuhe na ngbanya dagbaha na gu kuru fugo tatamana naima du mbata rogo Baibiri yo. Gipai re nayugo gupai nga agu angbembatayo nga ga Baibiri si na undo ti ni ti ai regbo. Kurii gure, Baibiri a na kura dungu wene arugute rogoho. Si na agu atingidapai rogoho adunga rogo kura ba ya, nga gu rengbe ka ye na wasa fu agu aboro du rogo imisiri pa kpio gayo aboro.

Si nafu gu kido nga gu gaani aboro kpiki rogo gu ba i arungo rogoho te

Baibiri naya rogo Batungusipai 9:5 wẽ: “Kpikpi aboro aina nga pai te, . . . tingida payo ima go ti aboro.” (Atambuahe 146:4) Na ngbanya kuti gipai re, Baibiri naringbisapa kpio dedede kuti zezeredi rame.—Yoane 11:11.
Nyanyaki idapase kuti Mbori nyemuse naye na wasa

Baibiri naya rogo Atambuahe 34:15, wẽ: ‘Bangiri Yekova * du ti ruru aboro, tuko ni haha ha tipa gayo kpe ku ari.’ Yugo gu bipai du ani na ni fu Mbori rogo kparakpee nga wene ziga tipa ka du na maapai kurii gaani aberãpai. Si naundo rani nzunzu ani sonosi wene pagume na Bakusirani, nga gu ko rengbe ka mangasunge na gako ome ka fu wasa furani.
Gu wene raka si aida boro ningere kumbatayo tipaha

Mo berẽnga pa gu regbo du kumbatayo ho i nika zingisa agu aboro ni du rogo amurö yo i raka berewe auru kpotosende! Dedede, Baibiri nafura tipa ngbatunga gu regbo re. Ho Baibiri afura ni tipa wai raka nika du auru kpotosende ti gu regbo re si naya, Mbori ‘awéga aume ti bangirani ku sa yo dunduko. Kpio adú nga berewe te, rungo adú nga yo na akpe na ima a te.’—Yugoti 21:3, 4.

Dungu agu aboro idi kuti Yekova, nga gu Mbori du pako rogo Baibiri, nagbia bakere ome tipa ka sovura kuti gu imisiri du yo rogoho nga ga zanga gayo aboro rogo kpio yo mbiko i ima wirika wai ka kido kuti ko. Ni kpiapai, Ann, nga guri nazanga kumbari agarã 65 kusayo, aya: “Baibiri nakido re nga gu gaani aboro kpiki i rogo gu ba i arungo rogoho te na Mbori nika zingisa agu aboro dunduko du payo berãko yo. Agi aberãpai re naaye kurire yo ti agu aregbo dũ mi aberãpa gu gimi aboro zanga mi yo rogo kpio yo, ni sangbana gipai re, mi na rengba ka mangapai kuti gu kere yangara gbegberẽpai namangi fere rogo gimi raka yo!”

Tiina, nga gu ri i afura tipa ri mbata rogo gi kekeapai nakura ti mburu kuraha re, aya: “Naatona rogo gu uru Timo akpi, mi ima gbia ga Mbori undo. Mi ima bi be Yekova si niundo re rogo gimi kere aregbo nga ga fudifudiapai. Na gu kidohe nga ga Baibiri du tipa zingabekpio nga ndikidipai fere. Si naundo re mi naandu kindi kumbatayo da kina ti gu uru mi nika bi Timo berewe.”

Agu afugo re nga kina gu bangisa bipai du agu amirioni aboro na ni nga aguyo naima ida kuti gupai nga Baibiri nga gu buku i naima rengba ka kido kuti ni. Ka si vura du nga mo nabihe nga agu apai Baibiri apehe si arengbanga ka manga te watadu pa musumo du, si naida mo dinga regbo ka manga wetekapai tipa ka bi agu agopai nayugoho nga gaha arugute na gaha akidohe nga ndikidipai. Mo ima rengba ka bi Baibiri ni gu wene he rengbe ka undo agu aboro du rogo imisiri pa zanga gayo aboro rogo kpio yo.