Tipagine Ani Aida ga Mbori Kindo ti Ni?
Ho i akusi bambata aboro akusa ni, Bakusirani du rimoko nga Yekova, nangia gu yangara bazogo naazogarago ti gu regbo re. Ko aazogarago na nyemuse. Ko ambakadi bawene kporo nga Ati Edene fu aboro i naaraka rogoho. Na ko akusi riahe fuyo kpaima. Kurigure, ko afu wene sunge fu aboro i naamangaha. (Bambata Pai 1:28, 29; 2:8, 15) Ka aboro du kindi rogo zereda wa ka si adu nga i anye tii gu wene zogarago nga ga Mbori.
Bambata aboro aká gupai nga Mbori du ni gayo Bazogo
Ziazia Kekeapai nayugo gupai nga gu maraika nga basamungu, nga guko i ayambuko kusa nga Satana Bakitingbanga, agumba gupai nga Mbori na rengo beko ka zoga aboro te. Ko agumba gupai nga aboro ima rengba kadu na ngbarago zanga na ga Mbori rugapai gbiati zogarago. Si nafu kina gberãrago nga, bambata avungu rani nangia Adamu na Eva amangipai kuti gi ga Satana ziree re na ki koditiyo na ko rogo gako samungu kuti ga Mbori zogarago.—Bambata Pai 3:1-6; Yugoti 12:9.
Adamu na Eva azanga gu kpuyo nga Paradizo gbiati gu maabangirise nga ga raka nyeanye kindi ni rengberengbe yo tiibe ga Mbori zogarago mbiko i aká gupai nga Mbori du ni gayo Bazogo. (Bambata Pai 3:17-19) Gayo diaberã aima du na maapai kurii agu agude i avungura kusa. Ziazia Kekeapai nagumba gupai nga, mbiko wa Adamu aingipai, ‘gbegberẽpai akuru ku zegino na kpio ki du mbiko gbegberẽpai.’ (ARomo 5:12) Ingapai ima ye berewe na kura gbegberẽ sangbanaha: “Boro nidu ni gbia ku ri kurani ka imisa ni.” (Batungusipai 8:9) Ka pehe rogo kura afugo, ho wiri aboro azoga tiyo ni, kpakaraapai du wa ka si du ti aregbo dunduko.
GU ZOGARAGO NGA GA WIRI ABORO ATONA
Nimeroda asamungu kuti Yekova
Gu bambata bazogo ni wiri boro i agumba pa ni rogo Ziazia Kekeapai yo angia Nimeroda. Ko aima samungu na ki yugu gupai nga ko aidanga Yekova zogorago kurii aboro te. Naatona ti gu regbo nga ga Nimeroda kada ku awere, agu aboro du na ome tiyo ima mangasunge na gayo pagbia ka rungosi aboro. Agarã wa 3,000 bakuru kusayo, Bakindo Soromo akepai nga: ‘Mi ki bi aume ami ni gbadi bangiri agu yo yo i arungosi yo, boro adu nga ho sa ka ngarãsi yo te! Ono tandu adu kina ho tipa abarungosi yo, ono boro adu nga ho ka ngarãsi yo te.’—Batungusipai 4:1.
Kina gu bangisa kpakarapai re du ani na ni areme. Rogo 2009, waraga sa nga ga Yu-eni (UN) ape gupai nga, gbegberẽ zogarago nga “pai sa dagba gu ndu apai gbegberẽ apai amanga ti ni rogo zegino areme.”
REGBO TIPA MANGAPAI!
Zegino naida na wene abazogo gbiati wene gene nga ga zogarago. Na si nga gupai Bakusirani nakidohe tipaha!
Zavura gu wene zogarago nga ga aboro ima zanga ka nyasa riipa gu kere akpakarapai nga ga aboro
Mbori ima sigira Kindo watadu zogarago, nga gu nika diaba gu zogarago nga ga wiri aboro na fuoho, “si ki nye anye kindi.” (Daniere 2:44) Gi Kindo re du amirioni aboro adigi nimangi kparakpee tipaha. (Matayo 6:9, 10) Ono Mbori nika zogarago rogo gi Kindo re nitiko te. Kuba gure, ko ima sia Bazogo nga gu ko naaima raka ni boro mbata. Da Mbori nasia ni?
Gere Ima Rengba a ka Ngba Tiro
AGU ASANAHE BAIBIRI AKARAGAPAI KUTI NI
Wai du Zereda Nika ye ku Auru Kpotosende?
Mo wiriki wai Mbori nakidohe ka ye na zereda rogo zegino vurube gako Kindo.
AGU ASANAHE BAIBIRI AKARAGAPAI KUTI NI
Ya Mo ga Mbori Kindo Ngbaduro Yo?
Ginipai Baibiri aida ka pehe ho si aya ni wẽ “ga Mbori ngbi du kpotoroni yo”?
