Hulda Ada ti Gari Sásá
INDONESIA yo, adawirani biata naraka rogo gu wiri tooni kisanga nga Sangir Besar. Bete agarã kusayo, i aamangasunge kina sa pangba baime. Aboro ima ino yo wenengai rogo gu kisanga re mbiko gayo sunge tungusapai—nga kaa undo aboro tipa i gi rogo Baibiri yo. Ono ti gu regbo re, i aamanga kura ngbatunga sunge kia.
Gu kisanga nga ga Sangir Besar Indonesia yo ku nodiyo
Ni bambataha, i anaandu ku rogo ime, kini gbia rõrõi ambia na kini tindihe ku pangba ime yo. Bete agu ambia re adu ni kikindigihe wakina agu akandi i angihe na ndue. Fuo gure, agi adee re anaasungo rii rukutu wiri ambata na kini mangisunge na abande tipa ka fõ ambia ni wiri arukutuhe susi para kondo. Fuo gure, i anirogo gu zorozoro ambia re ki moihe ku rogo bakandi na ki tindihe ku ariyo ku rogo gu ba i aaraka rogoho. Na i animoi agu ambia re ku rogo kindigi amangu nga gu i anirengbe ka maaha na ni ku rogo tarambiri tipa i mangisunge na ni tipa meka gene.
Hulda, nadungura ambia pangba baime
Boro sa dagba agi awirina re rimori angia Hulda. Agu apai nadu tipa ri ambu gene furi tipa ri di bakere regbo kuti gi sunge re kisusi akurari. Dedede, ri anaamangasunge na gu marã naabaru ri anigbia ha tipa ka tumo tipa agu ahe gari aborokporo anaaidaha. Ono bara gere, ri aaida ka banda bete kura marã tipa kurahe kia. Ri aaida taburet tipa wa ka ri moi JW Library® ku rogoho. Hulda aaima ino gupai nga agu avidio na kura ahe du rogo JW Library® aima rengba ka undo ri tipa ri tungusipai fu kura aboro, ki wisigipai na ri ki gi rogoyo wenengai.
Hulda anaamangasunge dungura ambia dedede, ono tipa bete regbo, ri atona dia kura asaa wiso ue kuriihe kaa mangasunge fõ mbia tipa ka kada ti gari sasa. Ni yangaraha, ri agbia marã tipa ka ngbe taburet.
Hulda na gari taburet
Hulda aya, “Wa omere avura ka bata na mi kini igirã be fõ mbia, bangire ago ni wiri ipo ti agu aigirã mi adu na ni ho mi adu ni na rengba ka mangasunge na gi vovo taburet re tipa si undo re wenengai gene tungusapai yo na si kidu fere taata tipa mi mbakadi adunguratise nga ga aKristano.” Ri ape gupai nga, gu taburet re aundo ri ti regbo ririkaza tipa ri ni kodi tiri na awirina ti regbo adunguratise na kaa tungusapai ti regbo ririkaza. Ani nangi wa sa na Hulda tipa pa da ri ti gari sásá.
