I asu na oto, woro asukutu kini sumbu wa gumba! Gu nyanyaki afarasi du biama gbiati abandurii ra nayugo kpia gupai ziazia nga gu du rogo Ziazia Kekeapai! Bambata farasi ni pusi ru—gu boro naora riru na taarimo, nga vovo bakindo. Kpoto gu farasi du giiko yo wa we ni zamba ru, gu boro naora riru nadia zereda kusayo auru kpotosende dunduko. Gu biata farasi ngbe tifuo ru ni bibiri ru wakina bitimo, gu ko nasungu auru ru ki du na ũringbisaahe beko, pangbanga zingo riahe kidu ngbako. Gu biama farasi adu ni fukpere ru, Kpio na kere akaza ki peke ko. Na murö, murö arika aboro, nga gu nadia raka nga ga aboro kusayo!—Yugoti 6:1-8.

“Kina gunde nazi re ti gu bambata regbo mi agedipai tipa abandurii afarasi biama. Mi aberẽ gupai nga uru sapangbanga naye, na wa si adu nga mi ambakadanga tire te, mi abatanga te.”—Crystal.

“Kina ngbarago nazi re be pa agu aboro ni bakiakia naora rii agu afarasi nadu biama na arangi ra ni bakiakia. Fuo mi gi tire na rogo gupai gu yuguyugupai re ayugoho, si aima du na rogo yo ti ni.”—Ed.

Ya mo gamo bipai tipa agu abandurii afarasi biama du payo rogo Apokaripise re wa ga Crystal watadu gamo bipai wa ga Ed? Rogo agu apangbanga du ue re, pa ora agu abandurii afarasi re nakusa gu pangbanga aboro naima inopai tipaha wenengai rogo Yugoti, nga gu yangara kitabu nga ga Ziazia Kekeapai. Ya mo mo iningo gupai nga mo ima rengba ka gbia undo nitiro ni gia mo rogo gu yuguyugupai yo re? Ngba gini gene? Mbori nakidohe nga, mo ima rengba ka gbia ndikidi ngbarago ti geda mo agu apai du ni kekehe rogo gu buku nga ga sangbanebi re, na ni wirika mo ho na ki ni raki ringbisihe kuti agu apai du rogoho.—Yugoti 1:1-3.

Wa kura aboro avura kaa gunde be gu yuguyugupai du tipa abandurii afarasi biama vuru, i aakenga ha tipa si gundesi ro te. Nirengo, amirioni aboro bi gupai nga, gu yuguyugupai re ima nyakasa gayo idapase na si ima fu wene maabangirise fuyo tipa kumbatayo. Kina gu bangisapai re rengbe ka du tipa ro! Ani nahõpai bero mo gedinga kura kekeapai ngbefuo gere.