Gu bake Ziazia Kekeapai re aima bi gu bakparakparapai du dagba gu wiri guru raka nga ga aboro na pa nye kpotosende kindi. Nirengo, tipa dungu akutu agarã, arikaaboro naaye na kini go, ono kpotosende nyeanye kindi na si ni wenehe tipa aboro naaraka rogoho da ku awere.

Fuo Ue Vura Nga ga Zegino nga gu nanyasi rogo 1945, ariapai ima manga ni bakerehe rogo zegino. Vuru agarã 70 gbua, aboro ima sona ku mbatayo rogo mbakada aũnduge, aũfugo, na birĩ-ino-mangaahe, nga gu ye na bakere ariapai rogo gu mosoro nga ga aringara. Dungu aboro naraka gu bawene raka i aaberãnga ha mbata nga i arakaha ya. Tona ti gu regbo re kada ku awere, aboro ima nge auru kpotosende ki susi wai i adumbata wa bara biata.

Ono tie, gi wene apai mangi re amanganga zanga gbegberẽ asangbanaha te. Gu mangaapai nga ga aboro nasa gupai nga apai nimangi auru kpotosende susi wai si aida si naamanga. Nirengo, kura aboro birĩ-inohe naya ani naraka ti gu regbo na gu garã ga aboro mangaapai naima du na bakere ome kurii zegino.

Ziazia Kekeapai aima gumbapa gu regbo aboro nika ‘gbarasa kpotosende’ ti ni. (Yugoti 11:18) Kura aboro nabakabangiriyo singia ani naraka ti gu regbo re ke. Aboro nika gbarasa kpotosende ku mbatayo wai? Ya mo regbo ho si nika da nga ka i mbakadingo ho berewe te? Ya mo aboro agbarasa kpotosende nyeanye kindi?

Ya mo kpotosende nika gberã nyeanye kindi? Kura aboro-birĩ-inohe nabihe nga si ima mbu ka ino gupai nika manga ni sangbana agu aʹariapai namanga. Mbiko gipai re, i nabakabangiriyo nga si ima rengba kadu nga ani nambeda kuti gu regbo tunguotunguo ariapai nika manga ti kpotosende, na si ki ye na gbegberẽ sangbanaha.

Ni kpiapai, bazezere rago gu duho digida sende yo ku sudiyo, na ime yo ni kina kputakputaha. Kura aboro nabihe nga, ka gu bakere faarago namanga awere rogo kpotosende akio kindi ku mbatayo, gu kputakputa ime re zaraga azaraga abaime ki hiki na ki ye na bakere fudifudipai fu dungu akama amirioni aboro.

Dungu ambakadapai i namangihe tipa ka sovura kuti gupai namanga kpotosende awere. Gu kuraha adu tipa wai rengbe aboro kaa manga apai kini raki wenengai auru kpotosende ono zanga gbarasaha. Sangbana gu mbakadapai re nga gine?

Wa i avura manga gi mbakadapai re, sende nagberã kina ku mbatayo. Aboro nagberesa pa aũ kpotosende niipo susi gu rengbe sende ka kusaha kubaha. Ya mo pai ho rengbe ka undo? Bawirikipai tipa kpotosende sa ape gupai nga: “Ani ainongo wai rengbe ani ka ngera wenengai fuo gaani sende te.” Ziazia Kekeapai nape kina rengo kini ya: “Gu boro nata, pa ruga gani apai si rogo ni yo te.”—Yeremaya 10:23.

Ono Ziazia Kekeapai nakido rani a na gupai nga, Bakusiahe nga Yekova, ko ambunga aboro i gberesi kpotosende si ki gberẽ ki nye koyo te. Atambuahe 115:16 naya: “Kpotosende [Mbori] afu fu awiri aboro.” Nirengo, gaani sende nga “wene gamahe” be gu Barani du ngbangbaturũ yo. (Yakoba 1:17) Ya mo Mbori afuhe furani si undo rani tipa bete regbo gbua si ki gberẽ kusayo? Wagusa te! Ani naino gipai re ti gu gene Mbori ambakadi gaani sende ngbaha.

Gu kitabu nga Bambata Pai nape gu gene Mbori akusi kpotosende ngbaha. Ti tonatonaha, kpotosende adu ‘ni ku he ni kina kungba ha, kina bitimo ki du auruhe.’ Si fura a tipa “aime” nga nyanyakipa he tipa gu rakiraki ahe du auru kpotosende. (Bambata Pai 1:2) Fuo gure, Mbori aya: “Imarago dú adu.” (Bambata Pai 1:3) Si tie ziazia nga, gure nangia gu bambata regbo uru akuru ki fu imarago ku auru kpotosende. Fuo gure, ugu rago akuru gbiati abaime. (Bambata Pai 1:9, 10) Fuani, “agu angua nazuka zuzuhe du na tungaha rogo ho” akuru. (Bambata Pai 1:12) Agu ahe nga nyanyakipa ahe tipa raka aima kura. Tipagine Mbori ambakadi apai ti ni wa gere?

Gu nebi nangia Yesaya afura tipa Mbori ya ko nga gu ‘Mbori nambakadi kpotosende ki mangi he, ko anyakasihe; ko amanganga ha ni kungba he te, ko ambakadihe aboro niraki rogoho!’ (Yesaya 45:18) Nirengo, ga Mbori ringbisapai nga aboro raki auru kpotosende nyeanye kindi.

Si nafu kina gberãrago nga, aboro ima gbarasapa gi ga Mbori bawene gamahe re. Wa vura duhe wo, ga Bakusiahe ringbisapai ata arianga tihe te. Kumba sa naraki bakuru kusayo aya: “Mbori wa boro te, ka gumba zire, watadu wa wiri boro a te, ka sa gako berã. Gu pai gumba ko, ko amánga nga ha te?” (Pa Geda Aboro 23:19) Kuba gupai nga Mbori mbu kpotosende aboro gbarasihe, regbo ima mbeda tipa ko ‘gbarasi aguyo nagbarasa kpotosende.’—Yugoti 11:18.

Yesu Kristo aya rogo gu gako tungusapai naadu rii bagangara yo wẽ: “Aboro maku nga bayee aboro, bambiko i adú ni adikumbo zegino.” (Matayo 5:5) Kina rogo gu ga Yesu tungusapai re, ko ayugu gu gene i nika banda kpotosende ngbaha ka si gberẽnga ya. Ko arugu apefuoko i nikpari nga: “Ga ngbi yé, Ani mángi rogo kpotosende wa mo akpi nyemu he, wa du he ngbangbaturũ yo.” Nirengo, ga Mbori Kindo watadu zogarago nika  digiso gako ringbisapai tipa kpotosende.—Matayo 6:10.

Nibipa agu aʹariapai ga Mbori Kindo nika ye na ni, ko aya: “Oni ngére, mi nambakada ahe dunduko ni vovo ho.” (Yugoti 21:5) Ya mo gipai re nayugo gupai nga Mbori nika gbarasa gi kpotosende re ki ye na vovoho? Oó, bambiko pai ho gberẽ ti gi gaani kpotosende re te. Kuba gure, Mbori nika nyasariipa “agu yo nagbarasa kpotosende” nga agu aboro du awere na gayo azogarago. “Vovo ngbangbaturũ na vovo kpotosende” nika diabaha, si nga ga Mbori Kindo ngbangbaturũ yo nika zogarago ku auru kpotosende no.—Yugoti 21:1.

Mbori nika mbakada agu ahe du auru kpotosende si du ni wenehe tipa raka berewe. Ga Mbori toro adu kugii bake papara Atambuahe ko kepai tipa gupai Mbori nika mangaha ki ya: “Mo nangera ku kpotosende no ki nikedi mai ku auru he, mo ninakumukosi he gbe.” Kurigure, Mbori nika fu maku kurii kpotosende si ki sa tihe ni paradizo na riahe kidu kpaima, na awege agbarasanga ahe berewe te.—Atambuahe 65:9-13.

Pyarelal nangia bakeapai nga ga Mohandas Gandhi nangia bangbembatayo rogo gu pambori nga ga India aya: “Kpotosende nambiisa agu azingo nga ga aboro dunduko ono angianga agu aboro du na bakere nyemuahe ya.” Ga Mbori Kindo nika aria kpoto aboro yo tipa ka nyasariipa agu apai nasa aboro i naagbarasa kpotosende. Gu nebi nangia Yesaya agumba gupai nga, tii gu zogarago nga ga ga Mbori Kindo, “i aímisa nga aboro watadu gbarasa” kpotosende te. (Yesaya 11:9) Areme, amirioni aboro rogo angbatungayo dunduko nawirikapai tipa ga Mbori arugute. I nawirika wai ka kpinyemu Yekova na gayo amurakporo, kadu na tambuahe, ka ngerafuo kpotosende na agu ahe du rogoho, na ka raka ringbisihe kuti ga Bakusiahe ringbisapai. I nambakada yo tipa raka rogo paradizo auru kpotosende.—Batungusipai 12:13; Matayo 22:37-39; AKorosaio 3:15.

Gu pangbanga du tipa kusaahe rogo Bambata Pai digi na agu afugo nga: “Mbori ki bi agu ahe dunduko ko amangi he, oni ngére, si ki du ni wene he gbe.” (Bambata Pai 1:31) Nirengo, Mbori ambunga gako bawene kpotosende i gbarasihe nyeanye kindi te. Ani nagbia wasa mbiko ino ani gupai nga gaani Bakusiahe nga Yekova Mbori nika banda gaani kpotosende abanda. Ko nakidohe nga: “Ruru aboro adía kumbo ringara, ki nye anye kindi.” (Atambuahe 37:29) Oni dunga adu dagba gu “ruru aboro” nika yamba kpotosende nga gayo nyenye kporo.