“Mo sana re tipa gupai mo aidaha, mi adu na ngbarago ka mangaha foro.” Mo arengbanga ka pe ngbatunga pai wa gere fu gu boro mo ainonga ni ya watadu mo naini ni tipa wiri bete regbo te. Ono tie, mo ima rengba ka pepai wa gure fu wene bakureamo. Wene abakure nidu na nyemu ka manga gupai bakureani nasana ni nimangihe funi.

Ziazia Kekeapai nayugo gupai nga Yekova dedede naaida kaa manga agu apai nika fu ngbarago fu airisiko. Ni kpiapai, Bakindo Davide naadu na wene pagume na Yekova aya: “Mo angeesi gamo iiriwo mangaapai na gamo aberã du kono du ani ni; . . . si asúsa gu ka i gedi he.” (Atambuahe 40:5) Kurigure, Yekova naamanga weneapai fu agu aboro ata inongo ko ya, ‘kini hihisi kpotoyo yo na riahe na ngbarago.’—Amokedi 14:17.

Wa duhe nga Yekova na ngbarago ka manga gupai nasa ngbarago ti kura aboro, si ruaru tie ani idi kuti gupai nga agu aboro naida kadu ni abakureako, si naida i mangi agu apai na ‘fu ngbarago ku kpotoko yo.’ (Asanza 27:11) Ono ginipai rengbe mo ka mangaha ka sa ngbarago ti Mbori? Ziazia Kekeapai na karagapai niya: “Ka bangironi gó nga ti manga wene pai na fuka ahe ya; bambiko ngbatunga gi rũhe re, si ngba ti Mbori.” (AEbere 13:16) Ya mo gere nga manga weneapai fu aboro nga gu yangarapai si aidaha tipa ka sa ngbarago ti Yekova?

Ziazia Kekeapai naya: “Zanga idapase ga boro pai arengba nga na ngba bangiri Mbori te.” (AEbere 11:6) Nirengo, fuo ‘Abarayama idipa Mbori,’ si asa Mbori ko “ya ti ko badiangba” ko. (Yakoba 2:23) Yesu Kristo anyakasipa gupai nga ani ‘idipa Mbori’ ka si du nga ani naida ko fu maku furani. (Yoane 14:1) Wai tie rengbe mo kadu na gu ngbatunga idapase Mbori aidaha be agu aboro ko ambedisa yo koyo du ko ni? Mo rengbe ka tonaha na wisigo Fugo Mbori nga Ziazia Kekeapai dedede. Ni manga mo ho wo, mo nika ‘hí be inapa sangbako’ na ki wiriki wai rengbe mo ka manga “gu pai Gbia akpi nyemu he.” Fuo gure, wa mo nikaa sona rogo ndikidi inohe tipa Yekova na kini mangi gupai mo awirikaha tipa gako ruru mangapai, gamo idapase nikaa sona na mo ki mbedi na ko bakere gbe.—AKorosaio 1:9, 10.