Amirioni aboro rogo zegino dunduko nairiso Krisimasi tipa anduhe ni bakiakia. Aguyo nidu na ngbarago ka sungo na gayo aborokporo na abakureayo tipa ka gbia ngbarago. Aguyo naberãpa Mbori watadu i nafu gayo regbo tipa ka undo rungorungo aboro. Agi amangapai re agberãnga te. Ono tie, agi amangapai re ni kodikodihe na gu kura gbegberẽpai nagbarasapa gi uru ongoda re.

Bambataha nga, dungu agu aboro nairiso Krisimasi nabihe nga si nga gu uru i abatika Yesu ti ni. Ono tie, abakeke kuru apangbanga rogo zegino dunduko nape gupai nga boro ho ini gu uru i abatika ko ti ni te. Buku sa nape gupai nga, “agu aKristano naadu mbata aaidanga ka sia uru tipa batika Yesu te” mbiko i aaida “ka ne gu mangapai nga ga apagano naabaha.” (The Christian Book of Why) Ziazia Kekeapai ayugongo gupai nga Yesu airisi uru batika ko watadu ga kura boro te. Gupai ko azinahe tipaha fu apefuoko nga i ni tingidi uru pakpio ko.—Ruka 22:19.

Uehe nga, dungu wene abawirikipai idi kuti gupai nga, dungu agu asino du rogo ga aKristano pambori, tarãha aenge ti agu sino nga ga apagano. Gipai re nakoda ngbeka vovo ahe fu agude, mangasunge na akpembiro, fuka agamahe, ziziga awe, namaa ambumbudo ti akporo. Buku sa nafura tipa agi asino re niya: “Ho ani afuka gamahe ni watadu ho ani adia agu agamahe ni nga ga Krisimasi, na kini moi akpe ti gaani akporo na akanisa, ada dagbarani ini gupai nga ani nairiso gu mangapai nga ga apagano?”—The Externals of the Catholic Church.

Ono tie, mo rengbe ka bakabangiro nga ginihe gberẽ ti manga agi asino re wa adu ngaha ni gbegberẽhe ya. Mo bingo gi biata pai du wa karagapai re. Mbori aidanga i kodi gu sino mangapai nga ga apagano na ndikidi irisombori te. Yekova Mbori aya fu gu nebi nangia Amosa ko ya fu agu airisiko nangia aYisaraere naadunga ni ruruyo fuko ya ki ya: ‘Mi sogo gaoni apumbo, mi gindiga ha a. Oni dí woro gaoni abia ture yo kusayo.’—Amosa 5:21, 23.

Nairiwo gu nyanyaki afugo re! Mo bingo gupai agu aboro naadu rogo gu kindo nangia ga aYisaraere naadu ku nodiyo anaamangaha. Gayo bambata bakindo nangia Yerobama amoi kpia wiri bagara rogo dahabu rogo agu agbata nangia Dana na Betere na ki sa aboro i niirisihe kuba ndu kaa iriso Yekova Mbori ngba wene gene rogo gu yekaru naadu Yerusarema yo. Gu bakindo re asigira pumbo a na ki sia aboromotumo i niundo aboro i niirisihe.—1 Abakindo 12:26-33.

Boro rengbe ka bi gupai agu aYisaraere re amangihe nga si agberãnga te. Anga i aamanga agi apai re ni rimo irisombori na ka fu ngbarago fuko te? Gu nyanyaki afugo Mbori apehe ku ngba Amosa na gu kura anebi nayugo gupai ziazia nga rago aangbanga ti Mbori na gupai re te. Mbori apepai ku ngba gu nebi nangia Maraki ki ya: “Mi nga Yekova mi asa nga pa re wa sa te.” (Maraki 3:6) Ya mo gipai re ayugongo wai Mbori abi gu ­dungu apumbo Krisimasi aboro airisoho areme te?

Fuo amirioni aboro wisigi agi arengo re, i diberã ka zanga iriso Krisimasi. Kuba gure, i nagbia ngbarago na kini di regbo na abakureayo gbiati gayo aborokporo na kini undo rungorungo aboro na agu aboro du nazingo ti agu regbo i aida ka mangaha wo vura garã yo.