1. Tipagine rẽarẽ ti ni ani tambua Yekova?

YEKOVA nga gu boro nafu “ziazia ũgamahe dunduko,” rẽarẽ tipa ko gbia tambuahe berani. (Yak. 1:17) Wadu ko nga wene babanda akandoro, ko nangerafuo gaani azingo nga ga borose na ga toro. (Tam. 23:1-3) Ko ima yugoho nga ko nga “gaani bagbuko nga gaani ome” gbe ti regbo kpakara apai! (Tam. 46:1) Nirengo, ani na dungu nduapai berani ka ida kuti gupai bake papara atambuahe akehe nga: “Oni fú atambuahe fu Yekova, bambiko ko du ni wene ko; gako weneringise nye anye kindi!”​—Tam. 106:1.

2, 3. (a) Gini kerepai du ti bi agu amaku du berani na taata paha? (b) Gini asanahe ani nika wisigoho rogo gi kekeapai re?

² Tipagine nyakipa gupai ti ni nga ani berẽpa gupai nga ga fu tambuahe? A wa i aima gumbaha, dungu aboro rogo gi yangara arame re atambuanga he te. (2 Tim. 3:2) Dunguyo nabi agu amaku du beyo na taata paha. Nibi wai abagi ahe atakapande pa ahe, dungu amirioni aboro naasada ka gbia dungu ahe  kuba gupai nga i du na ngbarago kina be agu ahe du beyo. Gipai re ima rengba ka sarani ka ani du nga na tambuahe ya. Wakina aYisaraere, ani ima rengba ka zanga du na tambuahe na ka ani abingo gaani pagume na Yekova gbiati agu amaku ani agbiaha beko na nyanyakipa ha ya.​—Tam. 106:7, 11-13.

³ Ani berẽnga pa gupai rengbe ka mangaha ka si du nga ani nagbia tirani na akpakarapai. Ti ngbatunga agu aregbo re, ome apai ima rengba ka fu rirani bangirani ki go ti agu amaku ani agbiaha. (Tam. 116:3) Sidu tie, wai rengbe ani ka sonosa gu toro nga ga tambuahe? Na ginipai nika undo rani ani du na wene bipai ti gu regbo ani agbiatirani na akpakarapai? Ani bingoho.

4. Wai rengbe ani ka banda gu ngbaduseyo nga ga tambuahe?

⁴ Ka ani aida ka sonosa gu ngbaduseyo nga ga tambuahe, si naida ani inipa agu amaku ani nagbiaha be Yekova na kini berẽkuriihe na kini makiapa gako ruru mangapai nga ga nyemuse. Ho bake papara atambuahe amangi gipai re ni, kina iriworago nazi ko be gu iriwo mangapai nga ga Yekova.​—Oni gedi Atambuahe 40:5; 107:43.

5. Ginipai rengbe ani ka wirikaha be gu mokedi nangia Pauro tipa du na tambuahe?

⁵ Ani ima rengba ka wirika dungu apai be gu mokedi nangia Pauro tipa du na tambuahe. Si ziazia tie nga, ko anaaberã aberã kuriipa agu amaku ko agbiaha, bambiko ko anaatambuahe dedede. Pauro aima inoho wenengai nga ko adu “mbata ni iragberangba yo ni irarungosi boro, ni iragbarasapai.” Sidu, ko adu na tambuahe mbiko wa ko avura angia boro ingapai mbata, Mbori gbiati Kristo aima inopai fuko na ki fu sunge tungusapai fuko. (Oni gedi 1 Timoteo 1:12-14.) Pauro anaatambua akurako aKristano na kini tambua Yekova dedede tipa gayo wene asino na padu yo ni ruruyo fu Yekova. (Frp. 1:3-5, 7; 1 Tesa. 1:2, 3) Na ho Pauro agbiatiko ni na akpakarapai, ko atambua Yekova tipa gu undo ko agbiaha be agu awirinako nga ga toro yo. (Amo. 28:15; 2 Kor. 7:5-7) Anga iriwopai ngaha te ka bi gupai nga afugo Pauro nangarasa aKristano kini ya: ‘Oni ki nitambua he kini yugupai fu akuaroni ki ni rugupai rogo abia tambuahe yo.’​—Koro. 3:15-17.

6. Gini apai mo atambua Yekova tipaha?

⁶ Wai rengbe ani ka wirika ga Pauro wene kpiapai tipa du na tambuahe? A wa si adu tipa Pauro, si naida ani berẽkurii gupai Yekova namangihe furani. (Tam. 116:12) Ka i sana ro nga, ‘Gini amaku mo naatambua Yekova tipaha?’ gamo karagapai ngia gine? Ya mo mo pepa gamo wene pagume na ko? Watadu gu mbupai mo nagbiaha mbiko gamo idapase kuti gu motumo nga ga Kristo? Mo rengbe ka tangara rimo agu awirina naaundo ro ti regbo kpakarapai? Rengo ngaha nga, bangiro arengbanga ka go ti gamo badiarogatise na awiro te. Dia regbo ka berãkurii gi wene amaku re be gu wene Bamo nga Yekova nika hiiso ngbaduroyo na tambuahe na ki saro mo ni tambuako na aˈuru dunduko.​—Oni gedi Atambuahe 92:1, 2.

7. (a) Tipagine ani afu gu kparakpee nga tambuahe ti ni? (b) Wai rengbe ani ka gbia undo ti fu gu kparakpee nga ga tambuahe?

⁷ Ho ani aberãpa agu amaku ni ani  agbiaha dedede na si kidu ngbadurani yo, ani ima rengba ka kpara fu Yekova na kini tambua ko. (Tam. 95:2; 100:4, 5) Gu kura aboro nabi kparakpee nga si nga gu gene boro asana Yekova tipa ahe ngbaha. Ono tie, ani ima ino gupai nga Yekova na ngbarago ho ani atambua ko ni tipa guhe du berani. Ziazia Kekeapai na dungu wene akparakpee rogoho nga ga tambuahe, kodihe na gu Ana na Izikiya amangihe. (1 Sam. 2:1-10; Yes. 38:9-20) Oni wiriki gu ruru amoyambu naadu na gu toro nga ga tambuahe tiyo. Oni tambua Yekova tipa agu amaku du beroni. (1 Tesa. 5:17, 18) Dungu amaku oni ka gbiaha ti mangaha wo. Oni nika du na ngbarago, gaoni nyemuse tipa Yekova nika kio, na oni ki mbedi na ko.​—Yak. 4:8.

8. Gine rengbe ka sarani ani zanga du na tambuahe tipa agu apai dunduko Yekova namangihe furani?

⁸ Tipagine si aida ani du ti ni na rubangirise ani ka zanga du na tambuahe tipa ga Yekova wene mangapai? Si wo mbiko ani na gu sino tirani nga ga zanga tambuahe. Oni kparianga gipai re: Mbori amoi bambata avungurani nangia Adamu na Eva rogo gu wene ati nangia paradizo. Agu ahe i aidaha adu kina beyo, na i adu na maabangirise ka raka nyeanye kindi rogo zereda. (Bam. P. 1:28) Ono i aadunga na tambuahe tipa agu amaku naadu beyo re te. I adu na angbu na kini idi kina kura ahe berewe. Ni sangbana gipai re, i azanga agu ahe naadu beyo dunduko. (Bam. P. 3:6, 7, 17-19) Wa ani araka rogo gu zegino adu nga na tambuahe ya, ani ima rengba ka tona zanga du na tambuahe tipa agu ahe Yekova namangihe furani. Ani ima rengba ka tona bipa gaani pabakure na ko taata. Ani ima rengba ka zanga du na tambuahe tipa gu momu du ani na ni kadu ni papara agu awirina du rogo zegino dũ. Ani ima rengba ka maa berãni kina fuo agu ahe du rogo gi zegino re nga gu nika go ago awere kusayo. (1 Yo. 2:15-17) Tipa ka ne gi kerepai re, si naida ani berẽpa agu amaku ani nagbiaha na kini tambua Yekova dedede tipa gu momu du ani na ni nga kadu ni gako aboro.​—Oni gedi Atambuahe 27:4.

9. Ho ani agbia tirani ni na kere aˈasada, tipagine si aida ani berẽ ti ni kuriipa gaani amaku?

⁹ Ho du ani ni na tambuahe si rengbe  ka undo rani ani hi kere aˈasada. Omerani ima rengba ka bata ka ani gbiatirani na kerepai wa gu nga, gaani badiarogatise ni ruru ni te, kere kaza, kpio boro, watadu ho gberãngo namangi ni rogo gaani dagbarago. Ti ngbatunga regbo wa gure, ka ani berẽkuriipa gaani amaku, si rengbe ka fu wasa na ki ngarasi rani. Oni makianga gi ndikidi apai namangi re.

10. Wai Irina agbia undo mbiko berãkurii agu amaku ri agbiaha?

¹⁰ Irina *, nga nazaki gene Amerika yo, angia dia bakumba rogo dungurati ono ka ko adunga ni ruruko furi ya na ko ki mburi na agude. Ginipai naundo ri ri nye ni ruru ri fu Yekova? Ri aya: “Mi na tambua Yekova tipa wai ko angerafuo re. Pa berã mi na aˈuru dũ kurii agu amaku Yekova nafuhe fere nasa re mi naabihe ni pa momu nga Yekova ini re na kini kpinyemu re. Mi ima inoho nga ko ambunga re te.” Wa vura duhe nga ri ima gbia tiri na dungu kpakaraapai rogo gari raka yo, padu ri na ngbarago naundo ri na kini sari ri ni ngarasi kura aboro.

11. Ginihe naundo Kyung-sook ri hi gu kere kaza namanga ri?

¹¹ Kyung-sook, naraka Asia yo amangisunge abazakigene na kumbari tipa agarã 20. Wakina ikpirogumba, i abi gu kere kaza nga kenisa tiri na ki pe gupai furi nga ri nika raka tipa adiwi biata watadu sita ri ki kpi. Wa vura duhe nga ri gbiati kumba ri aima gbiatiyo na dungu kpakaraapai, i adu na kido tipa kpotoyo. Ri aya: “Gi kaza re aima ba kere gberãrago tire, mi aberẽhe nga mi ima zanga ahe dunduko, na mi adu na bakere gunde.” Ginihe naundo ri ri du na hipai? Ri aya: “Mi anaakura ku zegiyo na ayuru dunduko mbata fu mi pi ka kpara fu Yekova na fugo re kuari tipa apai bisue mi anidu na ngbarago mbikoho rogo gu uru re. Si anaafu kido fere, na kini sare mi yugu gimi tambuahe fu Yekova.” Wai ri agbia undo be gi kparakpee ri anaamangaha? Ri aya: “Gupai ini mi he nga Yekova naundo rani ti regbo kpakarapai na dungu amaku gu duho furani susi agu aˈasada nagbia rani.”

12. Wai Jason agbia wasa tingbafuo kpio diako?

¹² Jason, namangasunge rogo kura gaani be-basunge sa vuru Afrika, mangisunge kindo ti aregbo dũ tipa agarã 30. Ko aya: “Diare akpi agarã saba kusayo, na gipai re nga kere imisiri. Ho mi aberã ni kurii wai ri ambu be gu kaza nga kenisa, si narungosi re ni kerehe.” Ginipai naundo Jason? Ko aya: “Ti kura regbo sa, mi aatingidapa gu wene regbo ani anaadiaha na diare, na mi ki tambua Yekova tipaha rogo kparakpee yo. Wiri zereda aye ku kpotore yo na mi ki tona ka tambua Yekova tipa gu wene aregbo ani anaadiaha na diare re. Du na tambuahe ima manga bakere ariapai ti gi bipai. Mi na rungo kindi tipa kpio ri, ono pa tambua mi Yekova tipa gu wene rogatise mi amangihe na gu momu nga ga mangasunge fuko na gu boro naima kpinyemuko gbe ima aria gimi bipai.”

13. Gine na nyakasi Sheryl ho dungu gari aborokporo akpiki ni?

¹³ Sheryl garãri adu nga 13 ti gu regbo kere bavugumo i aayambaha nga Haiyan amangi ni Philippines rogo 2013, pa gayo ahe agbere dunduko. Ri aya: “Mi azanga kpurani na dungu gimi aborokporo.” Bari na nari gbiati awirinari biata akpi be gi kere bavugumo re. Ginihe naundo ri ti gi kere regbo re ri du na hipai? Ri adu na tambuahe tipa agu amaku naadu beri. Ri aya: “Mi abi gupai nga awirina aye naundo  na ki fu gu ngarasaro ani aaidaha. Mi aini gupai nga awirina rogo zegino dunduko anaamanga kparakpee amanga tipa re.” Ri ape kurapai nga: “Mi na bakere tambuahe nga Yekova nga gimi Mbori. Ko naafu agu ahe furani dedede ani aidaha.” Rengo du ngaha nga, berẽpa agu amaku du berani nga ziga tipa diabe bakere gberãrago. Du na tambuahe naundo rani ani ndu kindi ku mbatayo ani ki vura ka gbiatirani na akpakarapai vurũ.​—Ef. 5:20; oni gedi AFiripoio 4:6, 7.

14. Gini wene maabangirise ani asungudoho? (Oni bi gu sura du ti tonatonaha.)

¹⁴ Kuru apangbanga nayugoho nga ga Yekova aboro nagbia ngbarago mbiko gayo amaku. Ni kpiapai, ho Yekova abatasi aYisaraere ni be Faro na gako abanzengere Zamba Baime yo, i abi abia tambuahe fuko. (Gate 15:1-21) Areme, dagba agu amaku ko nafuhe furani gu nyakipaha gbe nga gu maabangirise du tipa ka batasa rani be ima na fudifudi apai. (Tam. 37:9-11; Yes. 25:8; 33:24) Oni berẽnga kina wai ani nika du ho Yekova nika nyasa ni riipa avurako na ki di rani kugume ku rogo vovo zegino nga ga zereda na rurupai. Gu uru re nika ngia uru tambuahe nirengo!​—Yugo. 20:1-3; 21:3, 4.

15. Ginipai oni nadi berã tipa ka mangaha rogo gu garã nga 2015?

¹⁵ Ani namaabangirani tipa ka gbia dungu amaku nga ga toro be Yekova rogo gi garã nga 2015 re. Rengo ngaha nga, ani ima rengba ka gbiatirani na akpakarapai. Ka kina ginipai vura manga vurũ, ani ima ino gupai nga Yekova ambunga rani te. (Pa Rug. 31:8; Tam. 9:9, 10) Ko nika fu agu ahe afu furani ani aidaha ka irisoko ni ruru rani. Sidu tie, ani dinga berã adia kindi kadu na gu toro naadu ti gu nebi nangia Abakuka, naya: “Ka vurumo avura nga mbumbo ya, ka zuzu bakakue adu nga ti ni ya, zuzu aeraya ki kpa, ka aati azu nga riahe ya, rimbasa akandoro ki du ni bafubafu ra ku sa yo ti ndugu ra ka zogozogo anya adu nga rogo bambu ra yo a ya, ono mi tigimi, mi angí rogo Yekova yo, mi adú na ngbarago rogo Mbori yo nga gi bata.” (Abak. 3:17, 18) Nirengo, rogo gi garã re, ani berẽnga aberã kuriipa gaani amaku na kini mangipai kuti gu gaani veresi nga ga gu garã nga 2015 naya: “Oni fú atambuahe fu Yekova, bambiko ko du ni wene ko.”​—Tam. 106:1.