AGU APAI NANDU NA GUPAI DU TI KPOTOHO | WAI KA SOVURA KUTI BAKABANGIRISE
Bakabangirise Rogo Arago Dunduko!
Paul du Zimbabwe yo aya: “Mi andu ka ngbe riahe ki bi kina bisikuiti genoho naima gu ni kerehe! Fuo girorago, riahe aadunga berewe rogo ababagaahe te.”
Janet du Amerika yo aya: “Kumbami ayambu re na ki pe gupai fere nga ko ima mbu rani na kporo. Mi aabaka kina bangire nga ginipai mi ka mangaha ka hi gi gbegberẽpai ko amangihe re? Ginipai nika manga tipa awire?”
Alona du Israel yo aya: “Ho mbanya anaapa ni, mi ani oro ka gbu na ki pi sande, fuani woro he ki poi wa bundu. Fuo susa asa kusa, bere anaakio kindi.”
Ani naraka ti gu regbo nga ga bakabangirise, nga kere “gbegberẽ rago.” (2 Timoteo 3:1) Badungu aboro nasota na zingo marã, pa gburuwa aramukporo, avura, kere akaza, gbiati agu agberãngo naye be gu ome mangapai nga ga zegino watadu be aboro. Kurii agi apai re, boro rengbe ka baka bangirini nga: ‘Ya mo guhe na hi ti kpotore re nika da nga kenisa?’ ‘Gini ngbatunga zegino atita re nika sona ku rogoho?’
Anga abakabangirise dunduko du ni gbegberẽhe te. Ani nidu adu ni fudifudi rani ho ani amanga asada ni, sunge, watadu ho i asasana rani ni tipa ka fu sunge furani. Na gunde be gu kereapai rengbe ka gbia rani naundo rani ka ani imisinga tirani ya. Ono du na bakere bakabangirise ima rengba ka manga rani gbegberẽ. Wisigopai mangiyo ho barambeda akodi sosono aboro bangeyo naima susa 68,000, na si ayugu gupai nga ka boro du ni fudifudi ni tooni, si ima rengba ka sa ni nikpi ni agba ni. Sidu, wene ndupai kinaho Yesu asanahe ti ni nga: “Da dagba roni ka moi bagiza be sa ku ri gani sona ti wisiga pa ha?” Nirengo, bakabangirise asanga boro ni raki ni gbangaha te. Si du Yesu afu gu rugute ti ni nga: “Ka oni wisigi nga pai tipa ungaroni ya.” (Matayo 6:25, 27) Wai rengbe gipai re kadu taata?
Gu karagapai du tipa gipai re nakoda mangapai na tatamana, du na idapase kuti Mbori, na du na ndikidi maabangirise tipa ku mbatayo. Ka si vura du nga ani agbianga tirani awere na kere abakabangirise te, si agbia rani agbia ku mbatayo. Ani bingo wai mangapai kuti agi apai re aundo Pual, Janet, na Alona i sovura kuti abakabangirise.
