1, 2. (a) Gini aba-irisombori ga Yekova amoyambu amangisunge na ni bakuru kusayo? (b) Gini bipai Yesu adu na ni tipa gu ga Yekova yekaru naadu Yerusarema yo? (d) Ndu keyo gi kekeapai re nga gine?

NAATONA bakuru kusayo, ga Mbori amoyambu aima du na aba beyo tipa ndikidi irisombori. Si nawira wa Ebere amangisunge na bamotumo ka fu gako motumo fu Mbori. (Bam. P. 4:3, 4) Noa, Abarayama, Yisaka, Yakobo na Moize aima dua bamotumo. (Bam. P. 8:20; 12:7; 26:25; 35:1; Gate 17:15) Yekova afu rugapai fu aYisaraere nga i dua banye. (Gate 25:8) Kusa, i adua yekaru tipa iriso Yekova. (1 Aba. 8:27, 29) Ho aYudo ayego ni Babera yo tingbafuo zio, i anaadunguratiyo dedede ku bambutiria yo. (Mk. 6:2; Yo. 18:20; Amo. 15:21) Agu aKristano naadu mbata anaadunguratiyo ku rogo agu akporo nga ga awirina. (Amo. 12:12; 1 Kor. 16:19) Areme, ga Yekova aboro naadunguratiyó ka wirikapai na ka irisombori rogo aBambu Kindo bangehe naima susa bawe akutu rogo zegino dũ.

² Wai Yesu adu na bakere nyemu gu ga Yekova yekaru naadu Yerusarema yo na wai ko aabihe na kikiipaha asa gu bake Kitabu Wene Pangbanga nangia Yoane ko ringbisi gu sangbanebi kutiko naya: “Nyemu ga bambu arika re arika.” (Tam. 69:9; Yo.2:17)  Bambu Kindo arẽnga i yambuhe nga “ga Yekova bambu” wa gu i anaayamba gu yekaru naadu Yerusarema yo te. (2 Peka 5:13; 33:4) Ono wa vura duhe wo, Ziazia Kekeapai na gu bangua-arugute nga gu rengbe ka undo rani ani ini wai ka mangasunge na gaani ba-irisombori na kini bihe na irisa. Gi kekeapai re, nafugöpai tipa gu bete bangua-arugute nga gu rengbe ani ka mangasunge na ni nibi wai si aida ani bi gaani Bambu Kindo, kafu marã tipaha na ka ngerafuoho. *

3-5. Sunge Bambu Kindo nga gine, na wai du si aida ani bi agu adunguratise namanga yo?

³ Bambu Kindo nga gu ba aboro adunguratiyo ku rogoho tipa ndikidi irisombori. Dagba agu ahe Yekova afuhe furani ani rihe rogo toro yo, gu dagbaha nga gu dunguratise du Bambu Kindo yo na aposo dũ. Yo du ani agbia gu nyanyakipa riahe ni nga ga toro gbiati agu arugapai naye be gako riigbu. Yekova na Wiriko du nayamba agu aboro dũ naye tipa adunguratise ku Bambu Kindo yo. Wa vura duhe nga i nayamba rani dũ ani ye ka ririahe rii “gu mbisa nga ga Gbia,” si aidanga ani bi gu yambahe re na paha taata te.—1 Kor. 10:21.

⁴ Yekova nabi gu ngbatunga adunguratise nga ga irisombori gbiati ngarasatise re na nyanyakipaha, si du ko afu gako toro ti ni fu Pauro ko ngarasi rani ka ani he nga dunguratirani na akuarani ya. (Oni gedi AEbere 10:24, 25.) Ya mo ani rengbe ka yugo irisa fu Yekova ka si du nga ani nakpa adunguratise zanga nduhe? Nirengo, ani rengbe ka yugo gaani irisa fu Yekova na gako ambakadapai ho ani ambakada adunguratise ni wenengai na kini karagapai ti aregboho.—Tam. 22:22.

⁵ Si naida gaani bipai tipa Bambu Kindo nitihe na agu apai namanga yo nga ga toro yugu ndikidi irisa ayugo. Ya mo anga gaani bipai tipa Bambu Kindo teketeke wakina wai ani naabi rimo Mbori te, nga gu nidu ti gu kekeapai nayugo bara Bambu Kindo?—Oni ringbisinga ha na 1 Abakindo 8:17.

6. Wai du kura aboro naafura tipa gaani aBambu Kindo gbiati agu aboro namanga dunguratise yo? (Oni bi gu sura du tonatonaha.)

⁶ Agu aboro angianga aDezire Yekova ya naabi gu irisa abi du ani na ni tipa gaani aba-irisombori. Ni kpiapai, kumba du rogo gu ringa nga Turkey aya: “Rago aima ngba tire ka bi wai du aboro ni gigiri yo Bambu Kindo yo na kini mangipai kina ti genehe. Agu aboro du yo navo roko ngba wene gene, kidu na ngbarago, na i afu sene fere zaaza. Gipai re aima zio ngbadure ni bakerehe.” Gi kumba re atona kaa ye tipa a adunguratise dedede, na si adianga regbo te ko ki zi bapatiza. Rogo gu kura gbata sa Indonesia yo, dungurati ayambu agu aboro namangasunge na agbia-ngbii rogo gayo dagbarago tipa i ye ka bi vovo Bambu Kindo mbata fu i kparaha fu Yekova. Gu boro nangerakurii gu gbata re aima ye a. Rago aima ngbatiko na gu bambu re, gu sunge i amehe tipaha na gu wene ambumbudo i arũkuhe yo. Ko aya, “wai du gi bambu re ni gigirihe nayugopa gaoni ndikidi idapase.”

7, 8. Gini nyanyakipa pai si aida agu aboro naye tipa agu adunguratise nga ga aKristano ini he?

⁷ Si naida gaani irisa tipa gu Mbori nayamba rani tipa agu adunguratise nga ga aKristano du ni yuguyuguhe ngba gu gene ani avo roko na kini mbakaditirani ngbaha. Yugo irisa naundo rani ka ani mangingo pai ki furii he ya. Ani bi gupai nga, baraho kura  aboro anyakasapa vo roko ni ni wenehe ti regbo adunguratise, gu kurayo navo roko ka ndu ku Bambu Kindo yo wa i kporo. Rengo nga ha nga, Yekova naida gako amoyambu gbiati agu agino naye tipa dunguratise i duadu na ngbarago yo. Ti kina gu bangisa regbo re, si aidanga ani bipa adunguratise na paha kusende ni voda ani aroko gbegberẽ, kekapai fu aboro na terefuni, fura ti regbo adunguratise watadu kaa ri riahe ti regboho gbiati manga kura apai te. Si naida avungu agude raba awiriyo tipa i ini gupai nga, anga Bambu Kindo nga gu ba du tipa otoka watadu ngimbaro te.—Batu. 3:1.

⁸ Yesu adu na bakere zinga mbiko aboro asa ga Yekova yekaru ni babagaahe na ko ki do yo kusayo. (Yo. 2:13-17) Gaani aBambu Kindo a nga ba tipa ndikidi irisombori na wirika agu apai nga ga toro. Sidu, si naida ani mangi agu apai nabipa sunge bagaahe rogo kura aba kia angianga Bambu Kindo yo ya.—Oni ringbisinga ha na Nemaya 13:7, 8.

9, 10. (a) Wai du i naagbia vovo aBambu Kindo na i naafu marã tipaha wai, sangbana gipai re nga gine? (b) Gini wene gamahe i fuhe agu adungurati adunga marã behe tipa ka meka aBambu Kindo ya?

⁹ Ga Yekova riigbu namanga bakere ome ka mbakada aBambu Kindo na kini fu marã tipaha. Agu aboro namangasunge gbaka akpiaha, mekaha na mbakada agu gberẽ, i nafu tiyo ka mangaha gbua zanga marã. Surungbaha nga gine? Naatona rogo Ngbangba 1 1999, bange agu aba ndikidi irisombori i naduaha fu adungurati rogo zegino dunduko ima susa 28,000. Gere nayugo gupai, vuru agu agarã 15 susi kusayo, i name vovo aBambu Kindo bisue rogo uru sa rogo garã yo.

¹⁰ Bakere asadatise i amangaha ka fubee tipa meka aBambu Kindo rogo agu aba du zingoho rogo. Gi wene mbakadapai re, mburuhe rii gu bangua-rugute nga ga Ziazia Kekeapai naya, agu boro du na bakere ahe, i fu gu fu aguyo adunga ha beyo ya, tipa wa ka ‘apai rengbe dagba’ yo. (Oni gedi 2 AKorindo 8:13-15.) Ni sangbana gipai re, i ima me wenewene aba ndikidi irisombori awere fu agu adungurati adunga marã beyo tipa ka meka Bambu Kindo tipa tiyo ya.

11. Ginipai kura awirina naagumbaha tipa gayo vovo Bambu Kindo, na gini bipai si asa ro mo du na ni?

¹¹ Dungurati sa Costa Rica yo naagbia undo ti gi mbakadapai re aya: “Ho ani aru ni barangba gaani Bambu Kindo, si nadu wakina pa musumo! Kina ngbarani nazera. Sunge gaani Bambu Kindo anyasi naabaha rogo aʹuru muambe gbua! Si adu taata mbiko ga Yekova maku, gu mbakadapai gako riigbu amangaha gbiati gu undo awirina afuhe. Gi wene ba-irisombori re nga wene  gamunihe nirengo, si nga gu nyanyakipa he Yekova nafuhe furani. Ani na bakere ngbarago tipaha.” Ya mo rago angbanga tiro ka gia ngbatunga afugo tambuahe wa gere tipa vovo Bambu Kindo na ka ino gupai nga kina gu bangisa ngbarago re kura awirina agbiaha rogo akutu arago rogo zegino dũ te? Gi sunge re nga ga Yekova, mbiko bara sa kindi sunge Bambu Kindo anyasa, si nahi be agu aboro du na ruru ngbaduyo yo naida ka inopai tipa Bakusirani.—Tam. 127:1.

12. Wai du rengbe mo ka fubee tipa sunge dua Bambu Kindo?

¹² Badungu awirina nga akumba na adee naima gbia bakere ngbarago ti mangasunge dua Bambu Kindo. Singia ani rengbe ka undo sunge dua Bambu Kindo ho i adua ha ni watadu wo te, ani dunduko du na gu momu nga ka undo gu sunge re na gaani agamahe. Kakaka nyemu ndikidi irisombori asa aboro i fu marã tipa agu asunge nangia ga Mbori ti gu regbo i anaake Ziazia Kekeapai, kina gu bangisapai re du areme a, na si naye na taarimo fu Yekova.—Gate 25:2; 2 Kor. 9:7.

13, 14. Gini bangua-rugute nga ga Ziazia Kekeapai du tipa banda Bambu Kindo gigiri?

¹³ Bara sa kindi i nadua vovo Bambu Kindo, si naida si du ni gigirihe ka yugo asino gu Mbori ani airisoko mbiko Mbori ruguzuruguzu apai nga ko te. (Oni gedi 1 AKorindo 14:33, 40.) Ziazia Kekeapai nakoda padu ziazia na du gigiri rogo toro yo kuti du gigiri ti borose. (Yugo. 19:8) Sidu, ka aboro aida Yekova idi nayo, si naida aida i bandatiyo be biriko.

¹⁴ Ringbisihe kuti gi bangua arugute re, si naida ani du na ngbarago kaa yamba agu  aboro du na nyemupai tipa gaani adunguratise, na ani ki du na gu maabangirise a nga wai du gaani Bambu Kindo rẽarẽ na gu wene pangbanga ani atungusaha. I nika bihe nga ani nairiso gu Mbori du ni ziazia ko na barambeda ko nika sa gi kpotosende re ni gigiri paradizo.—Yes. 6:1-3; Yugo. 11:18.

15, 16. (a) Tipagine rengbehe ti ni kadu ni kpakaraapai ka banda Bambu Kindo ni gigirihe, ono tipagine duhe ti ni na nyanyakipaha? (b) Gini ambakadapai du rogo gaoni dungurati tipa giriso Bambu Kindo, na gini momu du berani dunduko?

¹⁵ Gu kura aboro nabi girisorago na nyanyakipaha kisusi agu akurayo. Gayo bipai tipa wai si aida i girisi rago naruriipa wai i asonosi yo, aguyo rogo gu rago du na dogoro gbiati nvutu, watadu gayo agene ni bibiriko ho, na ti ni kpakara kpakaraha ka gbia ime gbiati aũ girisorago fu aguyo. Ka apai vura du wai vurũ rogo gaani dagbarago, si naida gaani Bambu Kindo du ni gigirihe na ni wene kpiapai, mbiko si na rimo Yekova kuriihe na si nga ba ndikidi irisombori.—Pa Rug. 23:14.

¹⁶ Si aidanga ani mbu Bambu Kindo zanga giriso ho te. Gu gbuu nga ga abaakumba ni basasa si aida i ringbisi regbo girisorago na ki kehe na ki ye na aũ girisorago tipa ka banda gu ba-irisombori nga ga dungurati ni wenehe. Wa duhe nga kura asunge girisorago naida i nimangihe tingbafuo adunguratise dũ, na i amanganga agu akuraha dedede te, si naida i ngerakurii gu sunge re wenengai tipa ka bangirise go nga ti gu kuraha ya. Agu aboro du rogo dungurati dũ du na gu momu nga ka giriso Bambu Kindo.

17, 18. (a) Gini akpiapai du rogo Ziazia Kekeapai tipa ngerafuo aba ndikidi irisombori? (b) Tipagine si aida i ngerefuo Bambu Kindo ti ni wenengai?

¹⁷ Ga Yekova amoyambu a namanga bakere ome ka banda gayo ba-irisombori ni wenehe. Bakindo aYudo nangia Yoasa afu rugapai fu aboromotumo nga i mangisunge na agu agamahe aboro afuhe tipa ga Yekova bambu “ki mbakadi agu aba nagberẽ ti ga Yekova bambu, ho i [ani] bi gbegberẽ ba ni ti ni.” (2 Aba. 12:4, 5) Kusa, fuo agarã naima susa 200, Bakindo Yosiya amangisunge na agu agamahe aboro anaafuhe ku yekaru yo tipa ka mbakada agu apapara yekaru nagberẽ.—Oni gedi 2 Pekapai 34:9-11.

¹⁸ Kura abe-basunge pe gupai nga, rogo kura aringara, aboro aperesanga pa ngerafuo abambu irisombori te. Isoke si wo mbiko badungu aboro rogo agu aringara re ainongo wai ka manga gu sunge re te watadu marã beyo te. Si tie ziazia nga, ka i mbu Bambu Kindo zanga ngerafuoho, si saha si gberẽ niʹipo na ka si adu nga ni wene dezirepai rogo gu dagbarago re ya. Ono ka agu aboro du rogo dungurati dũ mangi ome ka banda gayo Bambu Kindo ni wenehe, si naye na taarimo fu Yekova na ki banda gu gamahe kura awirina afuhe.

19. Gamo diaberã nga gine nibipa agu aba ani amanga ndikidi irisombori rogoho?

¹⁹ Bambu Kindo nga gu bambu du ni kparakparaha fu Yekova. Sidu tie, si arunga i ya boro watadu dungurati nga iraha te. Gu bangua-rugute nga ga aKristano naida na gupai nga bibi gu bambu re ringbisitihe na gupai i amehe tipaha. Agu aboro dunduko du rogo dungurati rengbe ka fubee ka yugo gayo irisa tipa gaani ba-irisombori, ni fuyo agamahe tipa i dua vovo aBambu Kindo na ni, na ni mangayo sunge na gayo regbo gbiati ome ka girisoho na kini bandaha. Ho ani afubee ni sa gi bakere ome i amangaha re, gure nga ani nayugo gaani bakere nyemuse tipa ga Yekova ba ndikidi irisombori a wa Yesu ayuguhe.—Yo. 2:17.