“Wene gamahe dunduko, na ziazia ũgamahe dunduko i nagama ha, si naye ari yo du Ba ni, nga Bafu aimarago.” (Yakoba 1:17) Gu veresi re nafura tipa gu Barani du ngbangbaturũ yo nga Yekova Mbori, nga bakere bagamu ahe. Ono tie, dagba agu agamahe dunduko Mbori nafuhe fu ngbatunga aboro dunduko, gu kuraha sa kii kisusi agu akuraha dunduko. Gini gamahe du ngaha? Agu afugo Yesu aboro naima inoho wenengai du rogo Yoane 3:16, naya fu rani: “Bambiko Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.”

Gu gamahe nga ga Mbori nga bangisa wiriko, nga gu bakerepa gamahe kisusi ani ni basasa agbiaha, si kini sa gupai nga ani kuru tii ingapai, gbinza gbiati kpio. (Atambuahe 51:5; Yoane 8:34) Ka ani vura asada asada wai vuru, pai ho rengbe ani ka mangaha ngba gaani ome tipa ka kura tii sunge kanga te. Ono tie, rogo ga Mbori bakere nyemuse yo, ko aima fu guhe si aaidaha ka kusa rani tii sunge kanga. Yekova afu bangisa wiriko nga Yesu Kristo ni motumo, tipa ka fu gu maabangirise nga ga nyenye unga fu agu aboro nagiasangba. Ono ginihe tie nzunzu nga motumo tumorii? Tipagine duhe ti ni na nyanyakipaha? Na wai rengbe ani ka gbia undo ti ni?

Motumo nga guhe i afuhe tipa ka ngbe guhe berewe naima inga watadu ka kusa boro tii sunge kanga. Ziazia Kekeapai naya, i akusi bambata avungurani nga Adamu na Eva zanga ingapai, na gu maabangirise nga i raki wenengai rogo paradizo auru kpotosende na agu awiriyo ka i avunguyo. (Bambata Pai 1:26-28) Si nafu kina gberãrago nga i ambu agu apai re dunduko kini diberã ka basasangba Mbori—rogo gi gene re, i kini da ni aboro ingapai. Sangbanaha angia gine? Ziazia Kekeapai naya: “Were, wa gbegberẽpai akuru ku zegino mbiko boro sa, kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.” (ARomo 5:12) Kuba gupai nga Adamu fu gu raka naadu zanga ingapai fu atitako, ko afu kina ingapai gbiati sangbanaha nga, kpio.

Nibipa motumo tumorii, guhe i atumoho adu ni rengberengbehe kuti gu naingi. Ho Adamu ata inoaino ni kini basasangba Mbori, ko aingipai na sangbanaha angia ko aingisi gu raka nadu zanga ingapai—gako raka. Ringbisihe kuti Ziazia Kekeapai, si naasa ati Adamu i da ni akanga fu ingapai na kpio. Sidu, si aidi kura rengberengbe raka—ga Yesu raka—tipa i fuhe ni motumo tipa ka kusa aboro tii sunge kanga. (ARomo 5:19; AEfeso 1:7) Ga Mbori nyemuse du nasako ko fu gu motumo re, sidu du ngbatunga aboro ti ni dunduko na maabangirise tipa ka gbia gu raka Adamu na Eva aingisihe—ka raka nyeanye kindi rogo paradizo auru kpotosende.—Yugoti 21:3-5.

Nibipa agu apai si namangihe, kapa ho ti gupai nga ga Mbori gamahe nga motumo tumorii, nga gu saha taata tipa ka gbia nyenye unga nga bakere gamahe kisusi te. Tipa ka yugo tambuahe tipa gu “ziazia ũgamahe” re, ani bingo ngba gini agene gi gamahe re aringbisa agu apai ani asakipai tipaha rogo gu kekeapai nasusi nga gu naundo rani tipa ani fu wene gamahe.

Mbisa gaani nyemupai. I akusi rani nga aboro na gu nyemupai nga kaa raka araka kindi. (Batungusipai  3:11) Wa vura duhe nga ani arengbanga ka mbisa gu nyemupai re ngba gaani ome te, motumo tumorii nasaha taata furani tipa ani mbiisihe. Ziazia Kekeapai naya: “Bambiko mosoro ingapai nga kpio; ono ga Mbori gamunihe gbua nga nyenye unga rogo Kristo Yesu yo gaani Gbia.”—ARomo 6:23.

Ringbisa gaani zingo. Aboro aarengbanga ka fu motumo tumorii te. Ziazia Kekeapai naya: “Bambiko tumo mbisimoni du ni kikiipa he, gasi pa ha agasa kindi.” (Atambuahe 49:8) Sidu tie, ani aaida ga Mbori undo ni ipiipihe tipa ka kura tii ingapai na kpio. Ono “rogo gu tumori yo du rogo Kristo Yesu yo,” Mbori aima fu guhe si aaidaha.—ARomo 3:23, 24.

Ti wene regbo. Ziazia Kekeapai naya furani: “Mbori amoi dezire gako nyemuse fu rani nikpi Kristo tipa rani.” (ARomo 5:8) Bambiko i afuhe “wa ani adu ni aboro ingapai,” motumo tumorii nayugo ga Mbori dudunguro nyemuse furani ani ki vura ngia aboro ingapai vurũ. Na si nasa gupai nga ani ngere kumbatayo tipa badungu apai wa vura duhe vuru nga ani nahi gu sangbanapai nga ga ingapai.

Du na wene ndupai, angianga tipa ka gbia undo ya. Ziazia Kekeapai nagumba ndu gupai naasa Mbori ko fu Wiriko ni motumo: “Gi i ayugu ga Mbori nyemuse tipa rani ti ni re, nga Mbori akedi bangisa Wiriko ku zegino, ani du ni ungarani mbiko ko. Gi nga nyemuse re, nga nyemu Mbori adu nga ti rani te, kina rani du nyemurani ti ko.”—1 Yoane 4:9, 10.

Wai rengbe mo ka yugo gupai nga mo na bakere tambuahe tipa gi bakere gamahe re? Gu fugo Yesu du rogo Yoane 3:16 nayugo gupai nga kina agu aboro “idi pa ko” i nika gbia nyenye unga. Kuti Ziazia Kekeapai, idapase nga “ndikidi he, du aboro na maabangirise mbiko ho.” (AEbere 11:1) Tipa ka du na gu ndikidi he re, si naida ndikidi inohe. Mbiko gi ndupai re, ani nazungodi ro mo di regbo tipa ka wirikapai tipa Yekova Mbori, nga Bafu gi “ziazia ũgamahe” re, na ka gbia ngbarago ti gu nyenye unga ga Yesu motumo tumorii nasaha taata furani ani gbiaha.

Mo ima rengba ka wirika agi apai re dunduko ni wisigo mo agu apai nga ga Ziazia Kekeapai rogo gaani bangiriba nga ga Internet nga, www.mt1130.com/zne. ADezire Yekova na ngbarago tipa ka undo ro. Ani na gu kido nga wa mo nikaa wirikapai tipa gi bakere gamahe re gbiati agu aundo du ti ni, si nika sa ro mo poi kuari ki ya: “Mi natambua Mbori mbiko Yesu Kristo gaani Gbia!”—ARomo 7:25.