Wo du tooni degude du garãri nga 13 adu ho i afu wiri tooni ango ni furi ni gamahe. Bakere nabagiahe aya, gu kompiuta bari afuhe furi ho ri adu ni sukuru yo angia gu gamahe naˈaria gari raka. Vovo badidee abi gupai nga gu karte diako ambakadihe ti gu ramediwi i arogotiyo ti ni angia bakere pa gamahe kisusi fu ko.

Rogo agarã ni basasa, badungu aboro ni naadia regbo gbiati ome tipa kaa gbata “bawene” gamahe fu bakureani watadu gumeni ti kparakpara regbo. Na badungu yo ninaaida kaa gia karagapai wa agu i nagumba paha kuari re. Na mo tigamo, ya mo mo naakpinyemu kaa gamahe watadu kaa dia agamahe nga gu mo abihe nzunzu na nyanyakipaha?

Gupai re ima rengba ka du ni bawenehe, angianga mbiko kina gu sangbanapai gu gamahe re nika du na ni fu gu boro i afuhe funi ya ono wai si nika sa gu boro nafuhe ni du. Gu kurapai berewe nga, Ziazia Kekeapai naya: “Fu he ngba ti dia ha.” (Amokedi 20:35) Rengo ngaha nga, gu ngbarago boro agbiaha ti gamahe rengbe ka ngba berewe gbe ka si du nga gu boro fuyo ho funi nabihe na nyanyakipaha.

Wai gu rengbe mo ka sa gamo gamahe si du ni mburu ndikidi ngbarago foro gbiati gu boro mo afuhe fu ni? Na ka si du nga fu “bawene” gamahe ni mbumbuhe, ginipai rengbe mo ka mangaha tipa gamo gamahe du na nyanyakipaha?