Boro ho du na ndikidi sura Yesu te. Ko aarunga i dekpia ko te. Wa vura duhe wo, tipa badungu kama agarã, badungu asura ko wene abambakadiahe akusaha.

Sidu, gu wene abambakadiahe re ainongo wai nzunzu Yesu adu te. Sino mangaapai nga ga aboro, aida nga ga apambori, gbiati gu nyemupai nga ga agu aboro narũ ndiko fu wene abambakadiahe na maapai kurii agu aboro nambakada kpia Yesu. Wa vura duhe wo, agu asura ko i akusaha re na maapai kurii aboro tipa wai ko adu na gako yugopai.

Kura wene abambakadiahe nake sura Yesu wa gu boro naadu ni rurungbura ni na mangeriko ni gbangaha gbiati maingbako ni wiri nzaranzara ha watadu wa gu boro nangera na bakere gberãrago. Rogo kura asura, Yesu nangera ni iiriwo ko wa toro, na imarago bariko, watadu wa gu boro du kia ti agu aboro du patiko. Ya mo agu asura re nayugo wai nzunzu Yesu adu? Wai gu rengbe ani ka ino wai ko adu? Gene sa nga ka wisigo agu apai du rogo Ziazia Kekeapai nga gu rengbe ka undo rani ani ini wai ko adu. Si rengbe ka undo rani a ani du na wene bipai tipa ko.

Gure nga agu afugo Yesu agumbaha rogo gako kparakpee ti regbo gako bapatiza. (AEbere 10:5; Matayo 3:13-17) Wai gu gu boroboro re adu? Agarã 30 kusayo, gu maraika nga Gaburere ayugu gupai fu Maria nga: “Mo nikadu na mobara rukumburo yo, ki batika gude, . . . Wiri Mbori.” (Ruka 1:31, 35) Sidu, Yesu angia rengberengbe kumba, kina wai Adama adu ti gu regbo i akusi ko. (Ruka 3:38; 1 AKorindo 15:45) Yesu aima du ni wene kumba, na si nangera wa kpiako adu wa ga nako nangia Yudo, Maria.

Yesu adu na maingbako tini, kina wai aYudo adu angianga wa aRomo naadunga na maingba ya. Gu maingba re anaasa yo i du na kiki gbiati irisa; si aadunga ni gbangaha te, i anaambakadaha ambakada. Zanga kapa, Yesu anaangera angerafuo maingbako na riko adu ni wene mbakadimbakadihe. Kina agu aboro i anaasia yo ni aboro Nazara, wa Samusona, i naakpenga mangeriyo ya.—Pa Geda Aboro 6:5; Abasapungbanga 13:5.

Tipa agarã 30, Yesu adu ni basekengua, kini mangisunge zanga gu wene aũsunge du areme. (Marako 6:3) Sidu tie, kpotoko aima susuko. Ti tonatona gako sunge tungusapai, ko ‘abafu yo dunduko ku zegi yo tii yekaru yo, akandoro na abaabagara a. Ko ki ukaga ga abaundaamarã marã, ki vavagadi gayo ambisa,’ nisako. (Yoane 2:14-17) Si naida gu kumba naima nyaka na du na ome ka manga gipai re. Yesu amangisunge na gu boroboro Mbori afuhe fuko ka digiso gu sunge Mbori afuhe fuko: “Mi nandu ka tungusa gu wene pangbanga nga ga ga Mbori ngbi rogo kura akporo a; bambiko si du i akedi re tipa ha.” (Ruka 4:43) Si aaida gu boro du na bakere ome tipa ni ta rogo ringara Paresitina ni ndue tipa ka takapande gu pangbanga re.

Padu Yesu na ngbarago kpakpuko yo na wai ko aazungadi aboro naasa gako yambahe si ngba ti  agu aboro “nambu dunduko, ki du na rõrõi tindiro.” (Matayo 11:28-30) Padu ko na wene sino na padu ko zaaza na aboro na gako kidohe tipa kafu ongoda fuyo naasaha taata fu agu aboro naaida ka wirikapai be ko. Zavura rukutu agude aaida aida ka du mbembedi na ko, mbiko Ziazia Kekeapai naya: “Ko ki aka yo beko.”—Marako 10:13-16.

Wa vura duhe nga Yesu aima mbu ni kerehe mbata fu kpioko, ko aadunga ni gu boro naanidu na gberãrago te. Ni kpiapai, ko afubee kuti pumbo dia dee naadu Kana yo ni ariako ime ku rogo imekakue. (Yoane 2:1-11) Ti regbo kura dunguratise sa, ko ayugupai nga gu aboro awirikipai ti ni ka bangirise agonga ti ni ya.—Matayo 9:9-13; Yoane 12:1-8.

Gu susi gbe nga, Yesu atungusipai ngba gu gene naasa aboro dunduko i du na ngbarago tipa gu maabangirise nga ga nyenye unga. (Yoane 11:25, 26; 17:3) Ho gako amokedi 70 aye ni na pangbanga gayo tungusapai fuko, ko “angi” na ki poi kuari ki ya: “Oni ngí angi bambiko rimoroni du ni keke he ngbangbaturũ yo.”—Ruka 10:20, 21.

Agu abarumbatayo rogo pambori naadu ti rago Yesu anaagbeberã aboro kutiyo na kuti gayo pagbia. (Pa Geda Aboro 15:38-40; Matayo 23:5-7) Yesu aadunga wa yo te, ko ayugupai fu gako amokedi ka i ‘zogo’ nga aboro ya. (Ruka 22:25, 26) Nirengo, Yesu afu zahe nga: “Oni bánda tironi be abakeapai, agu yo nakpi nyemu ka ata na gbanga aremu, i nipoi kuti yo bangbeahe yo.”—Marako 12:38.

Gu kparakparapai naadu ti Yesu nga ko anaakoda tiko na ndurumo aboro, ti kura aregbo ka i ainongo ko ya. (Yoane 7:10, 11) Zavura dagba gako ruru amokedi naadu 11, ko aadunga kia tiyo te. Gu boro nakusi ko nga Yuda anyoro kina pangba ko, ka “ringbisa ha fu yo,” ka kusa Yesu fu ndurumo aboro-zuũ.—Marako 14:44, 45.

Sidu, wa vura duhe nga badungu futufutu apai ani ainongo ho ya, si ima du gbaiga nga Yesu aadunga wa gu i amanga sura ko te. Gu nyakipaha kisusi nga wai ani abiko awere ti wai ko adu nzunzu.

Yesu akpi na i ki kpisidi ko kina rogo gu uru ko agumba agu afugo re. (Yoane 14:19) Ko afutiko “ka tumo dungu yo ni ungako.” (Matayo 20:28) Rogo biata uru, Mbori azingisi ko “rogo toro” na “ki yugu ko ayugo gbayaga” fu bete gako amokedi. (1 Petero 3:18; Amokedi 10:40) Wai gu Yesu adu ho ko ayugu tiko ni fu gako amokedi? Ko adu kia ti wai ko aanidu mbata, mbiko zavura gako mbembedi amokedi aainongo ko nibasa te. Maria Magadara abi ko wa basopobino; na amokedi ue ngbagene Emau, abi ko wa kungbo boro.—Ruka 24:13-18; Yoane 20:1, 14, 15.

Wai gu rengbe mo kaa bi Yesu areme? Agarã 60 tifuo kpio Yesu, gu mokedi nangia Yoane abi Yesu rogo yuguyugupai. Yoane aabingo sura kangba ti wagiwagi ngua te. Kuba gure, ko abi “Bakindo ri abakindo, Gbia ri agbia,” gu Bakindo nga ga ga Mbori Kindo, nga gu ko nika diabe avurako barambeda, aguyo nga adaimona gbiati aguyo nga aboro, na ki ye na nyenye amaku fu ngbatunga aboro dunduko.—Yugoti 19:16; 21:3, 4.