Ga Yesu motumo nga gu gene Mbori akusa watadu ka batasa aboro rogoho be ingapai na kpio. Baibiri nafura tipa gu kure Yesu nauka nga, si nga gu he ko afuhe ka ngbe rani na ni. (AEfeso 1:7; 1 Petero 1:18, 19) Rogo gi gene re, Yesu aya ko aye “ka tumo dungu yo ni ungako.”​—Matayo 20:28.

Tipagine si aaida i ‘tumo dungu aboro’ ti ni?

 Gu bambata kumba nangia Adamu, i akusi ko ni rengberengbe ko watadu zanga ingapai tiko. Ko adu na rengba ka raka nyeanye kindi ono ko azanga gu momu re mbiko ko asia ka basasangba Mbori. (Bambata Pai 3:17-19) Ho ko atona ka batika agude ni, i adi ingapai tiko. (ARomo 5:12) Mbiko gi ndupai re, Baibiri nayugo gupai nga Adamu “abagi tiko” gbiati awiriko kutiibe sunge kanga fu ingapai na kpio. (ARomo 7:14, NW) Nidu ani ni aboro ingapai, boro ho narengbe ka ngbe guhe berewe kubaha Adamu azangaha te.​—Atambuahe 49:7, 8.

 Nunga atita Adamu azi Mbori mbiko i aadunga berewe na maabangirise te. (Yoane 3:16) Ono tie, Ga Mbori ruru gene sarangbanga aaida gupai nga ka ko bingo gupai nga gu ingapai i amangihe adu na paha taata ya, si asako ko a ko fu kura momu fuyo. (Atambuahe 89:14; ARomo 3:23-26) Mbori ima kpinyemu aboro, ko afu gu ndikidihe i aaidaha angianga i mbupai fuyo sa kina tipa gayo ingapai ya ono si di gayo ingapai kusayo a. (ARomo 5:6-8) Ga Yesu motumo nangia guhe nzunzu i aaidaha re.

Waigu ga Yesu motumo amangasunge?

 Rogo Baibiri yo, gu fugo nga “motumo” nakoda agi apai du biata re:

1.   Si nga gu marã i atumoho tipa he.​—Pa Geda Aboro 3:46, 47.

2.   Si nga guhe nasa gupai nga i kusi boro kusayo tii zio, watadu ka bape dunga berewe kurii boro ya.​—Gate 21:30.

3.   Si na nyanyakipaha teketeke wakina guhe i atumo tipaha watadu si ima rẽ tipaha. *

 Mo bingo wai du agi apai re sa na gu motumo Yesu Kristo afuhe.

1.   Gu marã i atumoho tipa he. Baibiri naya “i angbe” aKristano dunduko ni marã. (1 AKorindo 6:20; 7:23) Gu marã re nga kure Yesu, nga gu ko ‘angbe aboro ni kureko na ni fu Mbori dagba angbatungayo, na angbatunga afugoyo, na aboro, na arikaaboro dunduko.’​—Yugoti 5:8, 9.

2.   Guhe nasa gupai nga i kusi boro kusayo tii zio. Ga Yesu motumo asa gupai nga “i tumo” rani watadu ka kusa rani kusayo be ingapai.​—1 AKorindo 1:30; AKorosaio 1:14; AEbere 9:15

3.   Si na nyanyakipaha teketeke wakina guhe i atumo tipaha. Ga Yesu motumo aima rẽ nzunzu na guhe Adamu azangaha​—rengberengbe raka zanga ingapai. (1 AKorindo 15:21, 22, 45, 46) Baibiri naya: “Bambiko wa i amoi dungu aboro ni aboro ingapai mbiko ga gu boro basapai sa [Adamu], kina wo i ka maa dungu aboro ni ruru aboro bangiri Mbori mbiko ga gu boro giasangba sa [Yesu Kristio].” (ARomo 5:19) Gipai re nasakapai tipa wai pa kpio bangisa kumba sa narengbe ka tumo dungu aboro ingapai. Ka pe rengo, ga Yesu motumo “tipa aboro dũ” agu aboro namanga agu adiandue si aidaha tipa ka gbia undo ti ni.​—1 Timoteo 2:5, 6.