Rogo Baibiri, gu fugo i nasaha nga “zingabekpio ” i adihe rogo gu pa-Giriki nga a·naʹsta·sis, du rogoyo nga ka “tumba he kuari” watadu “ka ru kuari berewe.” Gu boro zingi be kpio ni na guari kuari gani raka ki karagatihe berewe kina wai ni anidu mbata.​—1 AKorindo 15:12, 13.

 Wa vura duhe nga gu fugo nga “zingabekpio” si rogo Kuru Ndiko te, gu yugopai re ima kura yo. Ni kpiapai rogo Daniere 12:2, Mbori akidohe nga: “Dungu agu yo naakpiki ku nvutu sende yo azínga berewe.”​—Osea 13:14; Eyobo 14:13-15; Yesaya 26:19; Daniere 12:2, 13.

 Wari i nika zingisa aboro kuhoni? I nika zingisa kura aboro ku ngbangbaturũ yo i zogorago ni abakindo na Kristo. (2 AKorindo 5:1; Yugoti 5:9, 10) Baibiri nayamba ha nga “bambata zingabekpio” na gi fugo re nayugo gupai nga zingabekpio kinaho nika ngbefuo gure. (Yugoti 20:6; AFiripoio 3:11)) Gi zingabekpio ngbefuoho re, nika manga auru kpotosende no, gu rimbasa aboro i nika zingisayo nika gbia ngbarago ti ni.​—Atambuahe 37:29.

 Waigu i nika zingisa aboro? Mbori ima fu gu pagbia fu Yesu nga ga zingisa kangba aboro. (Yoane 11:25) Yesu nika karaga aguyo “dunduko du rogo amurã yo” i raki berewe, ai boro ki du kina wai ni anidu, asino ni, gbiati gani aberã. (Yoane 5:28, 29) Agu aboro i nika zingisa yo ku ngbangbaturũ yo nika gbia gu kpoto nga ga toro, agu aboro i nika zingisa yo ku auru kpotosende no nika gbia gu kpoto nga ga aboro nga gu wiri kpakarapai nikaa dunga ti ni ya.​—Yesaya 33:24; 35:5, 6; 1 AKorindo 15:42-44, 50.

 Ada i nika zingisa yo? Baibiri naya “ruru aboro azinga be kpio na iraira yo a.” (Amokedi 24:15) Ruru aboro nakoda aboro wa, Noa, Sara, na Abarayama. (Bambata Pai 6:9; AEbere 11:11; Yakoba 2:21) Iraira aboro nakoda agu aboro naagbianga momu tipa ka wirikapai tipa Mbori gbiati gako arugute ya.

 Ono tie, agu aboro naima da ni kere amangi gbigbitapai kaa sanga berãyo berewe ya i azingisa nga yo te. Ho ngbatunga agu aboro re akpi ni, i nagbia nyenye gbarasahe zanga na maabangirise tipa ka raka berewe.​—Matayo 23:33; AEbere 10:26, 27.

 Gini regbo zingabekpio nika manga? Baibiri agumba gupai kumbatayo nga gu zingabekpio du ku ngbangbaturũ yo nika manga ti rago Kristo nga gu naatona rogo 1914. (1 AKorindo 15:21-23) Gu zingabekpio nika du ku auru kpotosende nika manga ti Regbo ga Yesu Kristo Zogarago Tipa Agarã Kutu, ho i nika sa kpotosende ni ni paradizo.​—Ruka 23:43; Yugoti 20:6, 12, 13.

 Tipagine rẽhe arẽ ti ni ani idi kuti zingabekpio? Baibiri ima fu futufutuapai tipa azingabekpio ribua, si ni basasa adezire adu kina pati ni. (1 Abakindo 17:17-24; 2 Abakindo 4:32-37; 13:20, 21; Ruka 7:11-17; 8:40-56; Yoane 11:38-44; Amokedi 9:36-42; Amokedi 20:7-12; 1 AKorindo 15:3-6) Pa wai Yesu azingisi Razaro nga gupai naima du ni kparakparaha gbe, mbiko Razaro akpi ki ima manga arame biama ku murã yo na Yesu amangi gi iiriwopai re ku bangiri rimbasa aboro. (Yoane 11:39, 42) Zavura asogo Yesu, i aarengbanga ka tikango gupai re te, kuba gure, i aagbata gene tipa ka imo aYesu na Razaro.​—Yoane 11:47, 53; 12:9-11.

 Baibiri nayugo gupai nga Mbori na rengba gbiati gu nyemupai nga ga zingisa agu aboro naima kpiko. Ai gu futufutuapai dunduko du tipa ai boro, si kina berã ko yo, ko nika zingisa aboro vurube gako tanduapai. (Eyobo 37:23; Matayo 10:30; Ruka 20:37, 38) Mbori na nyemu ka karaga aboro i raki berewe, na ko na ida aida ka mangaha wo! Ho Baibiri afura ni tipa gu zingabekpio naye, si nape gupai tipa Mbori nga: “Mo akpi nyemu gu he bero amangi.”​—Eyobo 14:15.

Iraira bipai tipa zingabekpio

 Iraira bipai: Zingabekpio nga mbisimo nakodatihe berewe na kpotoboro.

 Rengo: Baibiri nayugo gupai nga mbisimo narukuba boro naabani, angianga gu kura papara ni kinaho tigaha nga gu akpingo ya te. (Bambata Pai 2:7; Yezekere 18:4) Gu boro i azingisa ni, anga si nga kpoto ni nakodatihe berewe na gu mbisimo naguari te; i nakusa ni berewe ni unga mbisimo.

 Iraira bipai: I nika zingisa aboro ka si aimanga ya i ki gbarasi yo kusayo.

 Rengo: Baibiri naya “agu yo nanamanga gbegberẽpai” nika gbia “gu zingabekpio nga ga sapangbanga.” (Yoane 5:29) Ono tie, gi sapangbanga re mburuhe nika du rii agu apai i nika mangaha tingbafuo i zingisiyo angianga rii mburu agu apai i amangihe mbata fu i kpiki ya. Yesu aya: “Ho kangba aboro ka gia fugo Wiri Mbori ni; agu yo ka gi he i du adu ni ungayo.” (Yoane 5:25) Agu aboro nika ‘degatuyo’ kuti, watadu ka giasangba, agu apai i nika wirikaha tingbafuo i zingi be kpio, i nika ke arimoyo ku rogo “kitabu unga.”​—Yugoti 20:12, 13.

 Iraira bipai: Ho i nika zingisa aboro ni, agu aboro i nika zingisa yo nika du na kina boro gu bangisa kpoto ni adu na ni mbata fu ni kpi.

 Rengo: Tingbafuo kpio boro, si nawira wa kpoto ni nazirã paha ki ima gberã kusayo.​—Batungusipai 3:19, 20.