Buny pensary ló toib buñgonaʼ ni cayony puext xiinien par tzee scuel. Racaabu cuidad pal ma góos xiimbu né pal nayaa xhapbu né pal diti ma birésni. Pal nayaabu sacbu mbiox nasac né saslooyni a stipnés que bixiosbu né xinaʼbu rantzay láabu. Jehová, nac Bixiosno né raniiny láabu gacno buñ nayaa, láaca raniiny láabu gacno buñ nayaa ló sentido físico né moral. Pal nacno buñ nayaa racnéni lóono né láaca ronyxiroʼni Dios.

1. ¿Ximod labúu gacno buñ nayaa ló sentido físico?

Jehová raiby lóono ndeʼ: «Non gacto nigolú nayaa» (1 Pedro 1:16). Par gacno nigolú nayaa non gacno nayaa ló sentido físico né moral. Raslooyno que nacno nayaa ló sentido físico órni rásno guirá ór né órni nayaa xhapno, lidxno, xcamionno né láaca órni diti dxeretz xcósno. Láaca racnéno riá Salón del Reino. Pal nacno buñ nayaa, sigory stipnés buñ láaca sonyxiroʼyibu Jehová (2 Corintios 6:3, 4).

2. ¿Xí láani diti non gonyno par gacno buñ nayaa?

La Biblia raiby lóono ndeʼ: «Guisiáno lóono de guirá ni rony buidy laidyno né ni rony buidy espíritu xtunyno» (2 Corintios 7:1). Por ngú ronyno rutirigaʼlni lóono par diti gonyno nitisi cós ni labúu gony buidy laidyno o xpensaryno. Né, raniiny lóono que Jehová guibaladx por mod ronyno pensary, por ngú ronyno rutirigaʼlni lóono por cueʼno tiplad pensary buidy (Salmo 104:34). Láaca guirá ór racaano cuidad que guirá ni guinino gacni nayaa (bíil Colosenses 3:8).

¿Xí más labúu ñony buidy lóono ló sentido físico o ló sentido moral? Tipnés cós labúu gony buidyni lóono. Por ngú diti raquiinno gues nili raʼsno guix coca, nili radudy midid raquiinno pildra, nili ragoʼno drogas laidyno. Órni diti ronyno guirá cós reʼ, rapno lóono par diti guixoʼno né modreʼ raslooyno que napno respet vida ni biscad Dios lóono. Láaca ronyno rutirigaʼlni lóono par gacno nayaa ló sentido moral, ronyno xtem par diti kitno ro nacno buñguieeu o ro nacno buñgonaʼ, láaca ronyno xtem par diti guibiʼno pornografía (Salmo 119:37; Efesios 5:5). Labúu guisac naganno guisianno nitisi cós ni ma bisetlano, per Jehová puextca noʼbu par gacnébu lóono (bíil Isaías 41:13).

 NANOY GUISUIDYNO LÁANI

3. Gacno nayaa ló sentido físico, modcu sonyxiroʼno Jehová

Órni rolno guirá leyes ni bidudy Jehová a gudx Israel, radudyno cuent que nigolú rasac galnayaa par láabu. Colgoʼol Éxodo 19:10 né 30:17-19, né colgooy xtiitzni:

• ¿Xí rasuidy guirá versículos reʼ lóono mod rabiʼ Jehová galnayaa ló sentido físico?

• ¿Xí láani racné lóono par gacno nayaa guirá ór?

Par gacno nayaa raquiin cueʼno tiemp né gonyno xtem. Per labúu gonyno láani nac rotísi lagary ro rabésno o pal nacno buñ ric o buñ pobre. Colguibiʼ VIDEO reʼ né colgooy xtiitzni:

• Pal buñ ni rony predicarno rabiʼyibu que xcósno nayaani, ¿labúu gacnéni layibu gapyibu más respet Jehová la? ¿Xigony?

4. Bisian vis ni diti raquiin

Pal ragoblo o radudy midid reʼlo pildra o ragoʼlo drogas laidylo, sigory nanlo que nagan guisian buñ vis reʼ. Ni labúu gacné looy la, láani ngú gonylo pensary xi ni cayonyni looy. Colgoʼol Mateo 22:37-39, né colguiniʼ ximod gues né pal radudy midid raquiinlo pildra labúu gonyni mal...

• ... mod radzaklo Jehová.

• ... xfamilo né stipnés buñ.

Buny pensary xi láani sacné looy par guisianlo toib vis. a Colguibiʼ VIDEO reʼ.

Colgoʼol Filipenses 4:13 né colgooy xtiitzni:

• Xpensarylo pal rony buñ oración guirá ór, rasuidy la Biblia né riee reunión, ¿labúu guidudyni fuers láabu par guisiambu nitisi vis la? ¿Xigony ronylo pensary modreʼ?

 5. Buny rutirigaʼlni looy par guisianlo vis né pensary buidy

Colgoʼol Colosenses 3:5 né colgooy xtiitzni:

• ¿Ximod nanno que pornografía, órni raxel buñ nitisi video o retrat ro rareʼ buñyox o órni raguit buñ ro nac buñguieeu o ro nac buñgonaʼ nacni cós buidy nisló Jehová?

• Xpensarylo, ¿láani ngú que Jehová ranab lóono gacno buñ nayaa la? ¿Xigony?

Gon xi labúu gonylo par diti gonylo pensary ló cós buidy. Colguibiʼ VIDEO reʼ.

Jesús biquiin toib ejemplo par bisuidy lóono que non coʼno guicno gacno buñ nayaa ló sentido moral. Colgoʼol Mateo 5:29, 30 né colgooy xtiitzni:

• Jesús diti bidudybu diitz que gonyno mal lóocano, xalagary ngú non gonyno rutirigaʼlni lóono. ¿Xí láani non gonyno par diti gonyno pensary ló cós buidy? b

Pal ma cayonylo xtem guisianlo pensary buidy, gop confianz que par Jehová nigolú rasac xtem ni cayonylo. Colgoʼol Salmo 103:13, 14 né colgooy xtiitzni:

• Pal casac naganlo guisianlo toib vis, ¿xpensarylo guirá versículos reʼ labúu gacnéni looy par diti guireʼganlo la? ¿Xigony?

 ¿XÍ BISUIDYLO?

Labúu coʼ nakitno xcalnabany Jehová pal nacno buñ nayaa tanli xpensaryno né ni ronyno.

Repas

• ¿Xigony rasac gacno buñ nayaa?

• ¿Xí raquiin gonyno par gacno buñ nayaa ló sentido físico?

• Mod ronyno né mod ronyno pensary, par labúu gacni nayaa guirá ór, ¿xí láani non gonyno?