• Dios golú láabu. «Naʼca ma golúya ni gac rey xtuni [...;] né sadudi looy gudxrop xomod herencia né sadudi looy dada ro radopy gudxlio» (Salmo 2:6, 8).

• Buny mandarybu xalagary rey David. «Ma gool xiinno, ma noʼ toib xiinno [...]. Xcalmandarybu sioʼni guirá lagary né paz xtunybu diti saloxni ló trono xtuny David né ló gobierno xtunybu, par tzoʼni dxich» (Isaías 9:6, 7).

• Golbu gudx Belén. «Né looy, Belén [...], ronoʼlo sabeʼya toib ni guidxin gony mandary [...,] xcalmandarybu sadxinni dada ro radopy gudxlio» (Miqueas 5:2, 4).

• Buñ bibixladx né bigaity láabu. «Buñ bibixladx láabu, né diti gosacbu par lóono [...], goyoʼ ni bidxiʼt láabu por xcalkiéno; goyoʼ ni bitach láabu xtolno» (Isaías 53:3, 5).

• Biásbu né Dios bunyxiroʼ láabu. «Diti sasianlo naʼ lainy Baʼ. Diti sadudylo lagary que naʼ ni rasoba looy guibiʼ garió [...]; niis ladbuʼlo sioʼ galrrabaladx por tipzó» (Salmo 16:10, 11).

Nosi Jesucristo rony cumplir guirá ni ritlaa reʼ. Dada toib ángel gochbu María: «Dios sadudy trono xtuny David ni nac bixiosbu [...]. Gobierno xtunybu dipa sanitlóni» (Lucas 1:31-33).

Jesús diti buny mandary laʼga goyoʼbu ló Gudxlio. Per sony mandarybu Gudxlio desde guibá xomod Rey de Gobierno xtuny Dios. ¿Xigony diti noʼ stoib Rey xomod Jesús? Guienno xi bunybu órni goyoʼbu ló Gudxlio.

•   Jesús goyoʼ galrrasaʼ por buñ. Gocnébu buñguieeu, buñgonaʼ, mbioxhlas né buñgox. Godabiobu buñ pobre né buñ ric (Mateo 9:36; Marcos 10:16). Órni toib ni caxoné lepra góoch láabu: «Naʼ naana que pal nainy looy labúu sasiálo naʼ», Jesús binladx né bisial láabu (Marcos 1:40-42).

• Jesús bisuidy lóono ximod guioladx Dios ni ronyno. Láabu goniʼbu: «Diti labúu gacto xomós Dios né gacto xomós Bidxiich». Goniʼbu que non cobiono stipnés, mod rioladxno cobioyibu lóono, ndeʼ laa Regla de Oro. Láaca bisuidybu que Dios racaabu cuidad ni ronyno, ni rasacno né ni ronyno pensary. Por ngú, par guicacuent Dios ni ronyno, non gapno cuidad xi noʼ lainy xcalnabanyno (Mateo 5:28; 6:24; 7:12). Jesús goniʼ que par guibanyno goxt, non ganno ni rioladx Dios gonyno né non gonyno láani (Lucas 11:28).

• Jesús bisuidy lóono xi radudy diitz gandxiʼno. Ni goniʼbu né ni bunybu bidxinni lainy xcalnabany buñ. La Biblia ná: «Xidalguixo buñ bidziguiaʼ mod rasuidybu portín rasuidybu xomod toib buñ ni nap galmandary» (Mateo 7:28, 29). Por ejemplo, gochbu xpiimbu: «Gonladxto buñ ni rianladx lóoto». Né láacabu gonabbu lóo Dios por tipnés buñ ni bigaity láabu: «Bixiosa, bitudy scásiʼ xcalkiéyibu, portín diti nanyibu ni ronyibu» (Mateo 5:44; Lucas 23:34).

Diti noʼ stoib Rey xomod Jesucristo. Nanbu rony mandarybu, nadxiʼbu lóono né raniiny láabu gacnébu buñ. Per ¿pu dzú saló gony mandarybu?