¿Xigony nogoluʼ galrrianladx?
Buñgudxlio nigolú rianladx saʼ. ¿Xigony rianladxyibu saʼyibu? Par ganno láani, raquiin guientzaayno xi láani ngú galrrianladx, xigony noʼ galrrianladx né ximod rac xiroʼ galrrianladx.
¿Xí láani ngú galrrianladx?
Galrrianladx láani ngú órni rabixladxno o rabeʼno tiplad toib o tipnés buñ. Diti láacani ngú órni noʼ ni diti tampa riab lóono galán.
¿XIGONY NOʼ GALRRIANLADX?
Noʼ xidal razón por ni ralainy galrrianladx lainy xcalnabany buñ. Casi guirá ór, rianladxyibu buñ diti por ni ronyibu, sino por mod nacyibu. Sigory rabiʼyibu buñ xomod buñ mal o ni labúu gony cós mal, o ronyibu pensary que buñcu ma diti nap remeidy. O pentzi ronyibu pensary que goxeʼ buñcu, que noʼ ni nainy gonyibu o que xtolyibu rioʼ galnagan. Láaca, xidal buñ rianladx stipnés portín ma goyoʼ ni bianladx layibu, diti góc xinésni né layibu o goyoʼ ni gosacloyibu.
¿XIMOD RAC XIROʼ GALRRIANLADX?
Rioʼ ór noʼ ni rianladx buñ ni diti rimbu. Por ejemplo, toib buñ sin nadudybu cuent nacacuentbu mod rony pensary stipnés buñ. Né órni xidal buñ rony pensary toibsi mod, galrrianladx tiptisi rac xiroʼni.
Órni rienno ximod tiptisi rac xiroʼ galrrianladx ló Gudxlio, radudyno cuent xigony xidal buñ nap galrrianladx lainy xcalnabany. Per par guichocno ló galrrianladx, primer raquiin guienno pu golainy galrrianladx. La Biblia rabexa láani.
LA BIBLIA RABEXA PU GOLAINY GALRRIANLADX
DITI BUÑGUDXLIO BIANLADX SAʼ PRIMER. Galrrianladx gosalóni lainy guibá né toib ángel ni rimbuno xomod Buñdzab, ni cualó Dios. Órni gosaló cualóbu Dios bigaitybu buñ. Nacbu toib ni «rascú né bixios galrrascú», xtolbu rioʼ galrrianladx né galrradíil (Juan 8:44; 1 Juan 3:11, 12). La Biblia rasuidy que nigolú malbu, ragoʼbu galrradíil né nigolú cadzuitzbu (Job 2:7; Apocalipsis 12:9, 12, 17).
DESDE DZÚ RÁLNO MACA RALNÉNO GALRRIANLADX. Primer buñgudxlio, Adán, bunybu ni bunyca Buñdzab, né por ngú guirácano nacno buñ galkié (Romanos 5:12). Né Caín, xiin lagol Adán bianladxbu Abel, dada bigaitybu buchbu (1 Juan 3:12). Ná ronladxno saʼno né rioʼobni lóono órni rabiʼno stipnés cadudy ló galrrioʼob, guirácano nacno buñ galkié, por ngú más naguel rioʼno galrrasaʼ por lóosino, rapno galenvidy né nacno buñ farmay, guirá ndeʼ rabeʼni ñeʼ galrrianladx (2 Timoteo 3:1-5).
RAC XIROʼ GALRRIANLADX ÓRNI BUÑ DITI RIOLADX MOD NAC STIPNÉS. Gudxliogoxreʼ rakíilni buñ gony o guiniʼ cós ni rabeʼ ñeʼ galrrianladx. Nanno que «gudxliogoxreʼ noʼni xan xomandary Buñdzab» por ngú guirá lad noʼ xidal buñ ni diti rioladx mod nac stipnés, ni rabeʼ saʼ tiplad, ni raninaa saʼ, ni ratzaldaʼ saʼ né ni rony galnadxiʼin lidx stipnés (1 Juan 5:19).
Per la Biblia diti nosi raiby lóono pu golainy galrrianladx, láaca raibyni lóono ximod guinitlóni.
