¿XÍ NIGOLÚPA LABÚU GANLO XÍ GAC NÉ LOOY LÓ DZÚ NI SIETRA LA? Tipnés buñ ná que destino xtunyibu raniʼ xi gac né layibu, né noʼ stipnés ni ná que Dios ngú ni raniʼ ni guisacloyibu. Por ngú, órni diti rigaʼlyibu ni nainy layibu, rioʼyibu conforma né nayaasi raniʼyibu: «Ma sieedni que scá gacni».

Tipnés buñ rareʼgan órni rabiʼyibu que diti rac xinésni né nogoluʼ galrrioʼob ló Gudxlio. Sigory náyibu guibanyibu más sacró, per diti rarebuʼni portín maca rioʼ guerr, galrradíil, galguitz o stipnés desgrasy. Radxin midid raniʼyibu, diti noʼ xilaa goni xtem.

Nigolú, ni guisaclono labúu guitzaʼni ni raibyno gonyno (Eclesiastés 9:11). Per guirácano labúu cuuno guibanyno tipzó. La Biblia rasuidy que ladxñacano noʼ ximod guirecaano. ¿Xigony ranino ngú?

Órni gudx Israel mápa mer guioʼyibu lainy Layoo ni Dios Bidudy xtiitz guicaʼyibu, Dios biquiin Moisés par ñaiby layibu ndeʼ: «Ma goloʼya nislóto galnabany né galgoity, galnasác né cós mal. Né, par guibanyto tanli lóoto né xiinnto, raquiin cuuto galnabany gonladxto Jehová Dios xtunyto, guicadiagto ni raibybu lóoto né dipa guisianto láabu» (Deuteronomio 30:15, 19, 20).

«Ma goloʼya nislóto galnabany né galgoity, galnasác né cós mal. Né […] raquiin cuuto galnabany» (Deuteronomio 30:19).

Scú láani, Dios goleʼ layibu xan xomandary Egipto né ma diti ñoʼ ni ñony mandary layibu né nabanyibu nakit lainy layoo ni nadudy Dios layibu. Per galnasác cu diti nadxinni stipláacani. Noʼ ni biquiin ñonyibu: «nabúyibu galnabany». ¿Ximod? Ñonladxyibu, nacadiagyibu né dipa nasianyibu Dios.

Looy ngúca non gonylo, né ni coʼlo guiclo gonylo saguiñani ni guisaclolo ló dzú ni sietra. Pal rabúlo gonladxlo, guicadiaglo né dipa guisianlo Dios, sabúlo toib galnabany tipzó ló toib Gudxlio móz. Per ¿xí raguiña tigaaga cós reʼ?

Né xcalrracné espíritu santo apóstol Juan bicaʼbu «Dios ngú galnadxiʼ», né cualidad reʼ más rareʼ loguiaʼni (1 Juan 4:8). Jesús gon láani, por ngú órni goyoʼ ni gonabdiitz láabu xi láani más rasac, láabu cuapybu: «Gondxiʼ Jehová Dios xtunylo né guidopy xcalnabanylo, né guidopynaclo né guidopy xpensarylo» (Mateo 22:37). Por ngú, ni gacné lóono guibigaxno Dios láani ngú galnadxiʼ, diti por ni guidzuibyno láabu o por cuenunysi guisobno. Per ¿xigony gonladxno Dios?

Galrronladx ni rasac Jehová por buñgudxlio nacni xomod galrronladx ni rasac toib buñ por xiin. Ná nacyibu buñ galkié, ronyibu xtem por guisuidyibu, gacnéyibu né guisniʼsyibu xiinyibu né galrronladx portín racladxyibu que xiinyibu guibany nakit né tzeeni galán layibu ló xcalnabanyibu. ¿Né xí rabésyibu gony xiinyibu? Que xiinyibu gonladx, guisobdiitz né guienyibu que guirá ni ronyibu nacni par guibanyibu sacró. ¿Diti láani ngú que Bixiosno ni noʼ guibá ni diti nap galkié, guinab lóono gonladxno né guidudyno guixquix láabu por guirá ni ma bunybu por lóono la?

Ló diitz ni cuá la Biblia nirdiguié, diitz guicadiag xidal buelt birexani «guisobdiitz». ¿Xí diti ngúca ni rabés toib buñ órni raibybu xiimbu «Bicadiag naʼ» la? Por ngú órni racadiagno xtiitz Dios, radudyni diitz ganno ni nábu né guisobno. Ló naareʼ ma diti laʼpabu raninébu lóono, por ngú par guicadiagno láabu napno xi de golno Xtiitzbu, la Biblia, né guisobno ni náni (1 Juan 5:3).

Par guireʼ loguiaʼ balaati rasac guicadiag buñ xtiitz Dios, toibtica buelt Jesús goniʼ ndeʼ: «Diti de páasi rabany buñ, láaca de guirá diitz ni rareʼ roʼ Jehová» (Mateo 4:4). Rasac guáno, per ni más rasac ngú guistzano xpensaryno de xcalnan Dios. ¿Xigony? Toib buñnan ni góc laa Salomón golexa láani scareʼ: «Buñ ni noʼ xcalrrien rapni láabu xomodca bidxiich rapni buñ, per galnan más rasac: portín buñ ni noʼ xcalrrien ralaani láabu» (Eclesiastés 7:12). Pal ragoʼno xcalrrienno né napno xcalnan Dios labúu sapni lóono nigoreʼ né sacnéni lóono cuuno toib néz galán: ni siné lóono guibanyno tipzó.

Ló artículo ni godudy, bisetlano tipnés diitz ni bisetlaa Jesús: «Nabé nac puert né nabé nac néz ni riné buñ ló galnabany, né goxeʼsi buñ radzel láani» (Mateo 7:13, 14). Par labúu saano ló nézcu, nabaladxno ñoʼ toib ni ñacné lóono nadxinno ro labúu nabanyno tipzó. Por ngú, dipa guisianno Dios (Salmo 16:8). Per ¿ximod labúu gonyno ngú?

Guirá dzú noʼ ni ronyno né noʼ más cós ni ñoladxno ñonyno. Nogoluʼ xchiinno o ronyno pensary ló stipnés cós, dada ma diti napno tiemp gonyno pensary ló ni raniiny Dios. Por ngú la Biblia raiby lóono ndeʼ: «Colgap cuidad diti gonyto xomod rony buñ ngaʼal, xalagary ngú xomod buñ ni noʼ xcalrrien, colguiquiin xtiempto galán portín dzú ni nabanyno naganni» (Efesios 5:15, 16). Par dipa guisianno Dios, raquiin coʼno xchiimbu primer lagary (Mateo 6:33).

Diti labúu gonylo xitcal par guitzaʼlo ni ma góc, per noʼ ni labúu gonylo modreʼ xfamilo né looy guibanyto sacró ló dzú ni sietra. La Biblia rasuidy que Bixiosno Jehová ni noʼ guibá ronladxgoluʼ lóono, né raibybu lóono xi ni gonyno. Guicaano cuidad diitz ni bicaʼ profeta Miqueas:

«Láabu ma gochbu looy, buñguieeu, xí ngú ni natzaay. ¿Né xí canab Jehová looy? ¡Nosi canabbu looy gonylo xinésni, gaplo galrronladx ni nigolú né gaclo buñdxo órni saalo né Dios xtunylo!» (Miqueas 6:8).

¿Né looyga? ¿Sasanélo Dios la? Pal racacuentlo invitación xtunybu, sacaʼlo xiroʼ galnasác por tipzó ni guidudybu guiránac ximigbu. Ma looy ganlo xi gonylo.