Gonyno xinésni: Ni non coʼlo guiclo gonylo
Guirá ni coʼno guicno gonyno labúu sacnéni lóono o gonyni mal lóono. Jehová nan láani, por ngú raniiny láabu guisobno ni rony mandarybu.
Jehová raniiny que guibanyno goxt né nakit
«Naʼ, Jehová, naca Dios xtunylo, ni rasuidy looy par tzeeni looy galán, ni ragonés looy ló néz ro non saalo. ¡Pal looy nasoblo ni rony mandary looy! Órcu paz xtunylo nadxin ñac xomod toib guʼuc, né justicia xtunylo ñac xomod xcuann nisdaʼ» (Isaías 48:17, 18).
Noʼ xidal mod ni labúu guibany buñ. Per Jehová, Bisaʼ lóono, por ngú nanbu xi laani ngú ni más galán. Raniiny láabu guisobno ni ragonésbu portín nanbu que ngú ni más galán par lóono. Pal rasobno ni rony mandary Dios, labúu gapno confianz que guirá ni gonyno sarebuʼni. Guirá ni coʼno guicno gonyno sácni xinésni né gonyni que guibanyno goxt né nakit.
Jehová diti ranab lóono ni diti labúu gonyno.
«Portín ni cayoni mandary looy dzureʼ diti nagangoluʼni par looy, nili noʼni sit» (Deuteronomio 30:11).
Par guibanyno mod rony mandary Dios, sigory non guitzaʼno mod ronyno pensary né mod ronyno. Per Jehová diti ranab xiroʼgolu lóono. Láabu Bisaʼbu lóono, por ngú diti noʼ stoib ni nan xipa midid labúu gonyno. Órni rimbutzaayno láabu radudyno cuent que «diti nagan ni rony mandarybu» (1 Juan 5:3).
Jehová radudy xtiitz gacné guirá ni rabú guisob ni rony mandarybu.
«Naʼ, Jehová Dios xtunylo, nanaʼsa ñalo niis ladbuʼ; naʼ raabi looy: Diti guidzuibylo. Naʼ sacnéya looy» (Isaías 41:13).
Labúu guibanyno mod rony mandary Dios, portín racnébu lóono. Raquiimbu la Biblia par gacnébu, gony animarbu né guidudybu esperanza lóono.
Ló guidopynac Gudxlio xidal millón de buñ ma gonyibu que órni rasobyibu ni rony mandary la Biblia ma gocnéni layibu guibanyibu más sacró. ¿Nainy looy ganlo pal scú rony la Biblia la? ¿Ñoladxlo nimbutzaaylo consej ni radudyni la? Labúu goʼolo follet ni laa Bibany goxtiguie. Diti quiixlo xitcal né noʼni ló jw.org. Napni tzón lesiony reʼ:
-
«¿Ximod labúu gacné la Biblia looy?».
-
«La Biblia radudy esperanza lóono».
-
«¿Labúu gaplo confianz ni ná la Biblia la?».
Órni guisuidylo Xtiitz Dios, sanlo que xconsejni diti radudy xtzúni né «labúu gap buñ confianz láani guirá ór, nigoreʼ né dada por tipzó» (Salmo 111:8). Ni guisob buñ ni rony mandary Dios ló la Biblia, nacni mod ni más galán par guibany buñ. Per Dios diti rony lafuers lóono gonyno láani (Deuteronomio 30:19, 20; Josué 24:15). Tigaaga buñ non coʼ guic xi láani gony.
