«Sofía * né naʼ ma sanédo más de 39 íz de goló bitzñado órni goitybu. Guirá ximiga nigolú gocnéyibu naʼ, né goyogoluʼ dxiin ni buni. Per por tobiz nigolú bisioʼobni naʼ; goyoʼ dzú gosaca sacró né goyoʼ dzú yaca. Ná ma godudy tzón íz de goló goitybu, rioʼ ór tisintiempsi nigolú rasioʼobni xcalnabani» (Kostas).

¿Ma goity toibtica buñ ni ronladxlo la? Pal scú láani, pentzi ma gosaclo xomod Kostas. Toibtica cós ni más rasioʼob xcalnabanyno láani ngú órni raity tzeelno, xfamilno o ximigno. Buñnan ni rasuidy de galrrioʼob raniʼ que scú nacni. Toib artículo ni bireʼ ló revista The American Journal of Psychiatry náni que «órni raity buñ ni ronladxno, ronyno pensary que ma bisnitno láabu por tipzó né ngú ni rasioʼob lóono». Órni cadudyno ló galrrioʼob de clas reʼ, labúu nanabdiitzno ndeʼ: «¿Por balac tiemp sasaca modreʼ? ¿Sioʼ dzú sabaladxi stoib la? ¿Ximod guialdó xcalnabani?».

Revista reʼ racapy guirá galrranabdiitz reʼ. Artículo ni sieed rasetlani tipnés galnagan ni sigory cacalólo pal ma goity toibtica buñ ni ronladxlo. Ló stipnés artículos ni sieed sienlo xi labúu gonylo par guiroc ló xcalrrioʼoblo tidxó.

Raniiny lóodo que revista reʼ guisialdóni né gacnéni guirá buñ ni cadudy ló galrrioʼob xtol galgoity.