Pal rayopylo consej ni gacné looy par diti tzoʼlo nabann, sadzelo xidal mil, noʼ ni racné né noʼ ni yaca. Nacni scú, portín xomod ma bibiʼno, tigaaga buñ gadzé mod rioʼ nabann. Por ngú, diti toibsi midid racnéni guirá buñ.

Ná scú, noʼ tipnés cós ni ma gocné buñ ni cadudy ló galrrioʼob. Buñnan radudy consej de clas reʼca, né noʼni de acuerdo né ni ná la Biblia.

• Tipnés buñnan ná que ndeʼ ni máspa racné buñ ni cadudy ló galrrioʼob. Ná scú, pentzi rioʼ ór raniiny looy tzoʼlo toiblo né dada radzuitzlo né buñ ni ná gacné looy. Wal rasac buñ scú.

• Diti gonylo pensary que guirá ór raquiin tzoʼlo né buñ, per láaca diti guireʼlo tiplad. Pentzi después saquiinlo xcalrracnéyibu. Góoch layibu xi láani caquiinlo né xi yaca, per biyopy mod goniʼ láani.

• Bibiʼ xi láani caquiinlo, sacró pal rioladxlo tzoʼlo toiblo per láaca non gaplo ximiglo.

LA BIBLIA NÁ: «Más galán ngú chop buñ que toib [...]. Pal toibtica de layibu riab, xcompañerbu labúu gacné láabu guiásbu» (Eclesiastés 4:9, 10).

• Pal rootzaylo sacnéni looy par diti tzoʼlo nigolú nabann. Godó cuánnax, guixaʼ né stipnés cós ni labúu gacné looy gaclo buñ nasac.

• Goʼ siil nís né stipnés cós ni labúu gacné looy.

• Pal diti ralaʼnlo, godó xidal buelt nika tidxómitien. Láaca labúu guinablo doctor gaiby looy xi vitamina labúu gueʼlo. *

• Pal ronylo ejersis, ndeʼ sacné looy par diti gonygoluʼlo pensary ló cós ni labúu guisioʼob xcalnabanylo. Tipnés buñ raquiin tiemp ni rony ejersis par guisetnaladx xfamil né stipnés raquiin tiempcu par cueʼ láani ló xpensary.

LA BIBLIA NÁ: «Ni toib buñ dipa ma bianladxbu láacabu, xalagary ngú rayaʼanbu né randxiʼdotbu láacabu» (Efesios 5:29).

• Órni raisyno sacró racnéni lóono, per máspa racnéni buñ ni noʼ nabann, portín galnabann nigolú rastzagni buñ.

• Diti guegoluʼlo ni nap cafeína nili alcohol, portín rabeʼni xcaʼal buñ.

LA BIBLIA NÁ: «Más galán guisaladx buñ nika tidxó, que gonygoluʼ buñ dxiin né gacni dxiin xilaʼsi» (Eclesiastés 4:6).

• Tigaaga buñ gadzé mod rioʼ nabann, ma looy ganlo xi láani ngú ni más gacné looy.

• Tipnés buñ rabeʼ ni noʼ lainy xcalnabany par guisac sacró, per stipnés diti rony láani. Buñnan ná que tigaaga buñ gadzé mod raslooy xcalrrioʼob. Pal nainy looy cueʼlo ni noʼ lainy xcalnabanylo, per rasac naganlo gonylo láani, ¿xigony diti raninélo ximiglo né rabeʼlo láani dxoga dxoga?

• Noʼyibu raquiin cudxaʼ, per noʼ stipnés diti rony láani.

LA BIBLIA NÁ: «Tigaaga galnabany nan xi galrrioʼob nap» (Proverbios 14:10).

• Noʼ buñ ni radudy midid reʼ alcohol né raquiin drogas par guiabloo ló xcalrrioʼob. Per guirá viscu rastoʼbyni binaity. Tipratsi rasacyibu sacró né después ratudyni layibu ló xiroʼ galrrioʼob. Biyopy mod guisaclo sacró per diti guistoʼbylo looyca.

LA BIBLIA NÁ: «Guisiáno lóono de guirá ni rony buidy laidyno» (2 Corintios 7:1).

• Xidal buñ rioʼ nabann por tiprat né después ronyibu stipnés dxiinien par cueʼyibu láani ló xpensaryibu.

• Sasaclo más sacró pal rayopylo stipnés buñ ni gac ximiglo, pal radzaklo más ximiglo, pal rasuidylo ronylo toib dxiinien o pal ronylo xis cós ni coʼ nakit xcalnabanylo.

• Dxoga dxoga, sacnéni looy. Pentzi sadudylo cuent que ma diti tampa rioʼlo nabann né ma labúu ronylo stipnés dxiinien. Ndeʼ saslooy que ma caroc ló xcalrrioʼoblo.

LA BIBLIA NÁ: «Par guirá cós noʼ toib tiemp [...]: toib tiemp par cudxaʼ buñ né toib tiemp par guixiich buñ» (Eclesiastés 3:1, 4).

• Nimaca gosaló buny guirá ni bunylo nírcu.

• Pal naplo toib ór par gaisylo, par gonylo dxiin o par gonylo stipnés cós, ndeʼ sacné looy par diti tampa tzoʼlo nabann.

• Pal ronylo cós ni ragoʼ gan xcalnabanylo sacnéni looy guiroc ló xcalrrioʼoblo.

LA BIBLIA NÁ: «Diti sonygoluʼbu pensary que goxeʼsi tiemp sabanybu, portín Dios ni nigolú racné láabu gonybu pensary ló galrrabaladx ni noʼ lainy xcalnabanybu» (Eclesiastés 5:20).

• Xidal buñ nimaca ragoʼ guic gony tipnés cós ni rasac órni laʼra bisnitbu xfamilbu, né después diti rarecaani mod bunybu pensary.

• Pal labúuni, golés tidxó pal nálo guidzaʼlo de yoʼ o de dxiin, o pal ma diti nainy looy gaplo xcós xfamilo ni ma goity.

LA BIBLIA NÁ: «Buñ ni racaa cuidad gony toib cós sarebuʼ xchiimbu, per guirá ni rioob gony toib cós siabbu ló galsii» (Proverbios 21:5).

• Xidal buñ rasac sacró gony cós ni racné layibu guisetnadxyibu buñ ni ma goity.

• Gop xiretratbu né cós ni bioladxbu, o bicaʼ ló guiich cós sacróyen ni gosacloto. Ndeʼ sacné looy guiroc xcalrrioʼoblo nika tidxó.

• Goloʼtzay cós ni racné looy guisetnaladxlo láabu né bibiʼ láani órni ma noʼlo puext.

LA BIBLIA NÁ: «Bisetnaladx ni góc ló dzú ni see» (Deuteronomio 32:7).

• Buny pensary xi dzú guireʼlo par guilachbuu lólo.

• Pentzi diti labúu gonylo láani por xidal dzú, per goleʼ tiemp par gonylo láani nika toib o chop dzú. Por ejemplo, labúu saalo laidy dainy, tzeelo raguʼuc o tzeelo pasiary né ximiglo.

• Láaca pal ratzaʼlo ni ronylo guirá dzú, labúu sacnéni looy par diti tzogoluʼlo nabann.

LA BIBLIA NÁ: «Coltaʼ ronoʼya; tzoʼno toib lagary ro yadi buñ par guisaladxto tidxó» (Marcos 6:31).

• Diti guialadxlo que pal racnélo stipnés buñ, láaca sacnégoluʼni looy.

• Labúu gacnélo buñ ni cayoʼob xcalnabany portín goity buñ ni ronladxbu, xomod ximigbu o stipnés xfamilbu. Sigory layibu láaca raquiin guiniʼyibu ni noʼ lainy xcalnabanyibu.

• Pal racnélo stipnés buñ, láaca sabaladxlo né ma diti nac nacsi sabanylo.

LA BIBLIA NÁ: «Noʼ más galrrabaladx órni radudy buñ que órni racaʼ buñ» (Hechos 20:35).

• Órni raity buñ ni ronladxno, rasaló ronyno pensary xi láani más rasac.

• Goleʼ tiemp né buny pensary xi láani cayonylo né xcalnabanylo.

• Pal raquiinni, bitzaʼ mod nabanylo.

LA BIBLIA NÁ: «Más galán tzoʼno lidx buñ ni noʼ nabann xalagary tzoʼno lidx buñ ni cayony lanii, portín guiráno sadxin dzú saityno, né guirá ni nabany non gony pensary loni» (Eclesiastés 7:2).

Nanno que guirá ni ma bisetlano diti sabeʼni por tipzó guirá galrrioʼob ni rasacno. Per xidal ni ma goity xfamil náyibu que órni bunyibu guirá ni bisetlano ló revista reʼ, bialdó xcalnabanyibu. Nanno que diti nosi ndeʼ sacné looy. Per pal ronylo guirá ndeʼ, sadudylo cuent que sasialdóni xcalnabanylo nika tidxó.