La Biblia bitzaʼ mod bibanyibu

¿Xí láani más bioladx toib buñ de negosy escocés que xchiimbu? ¿Ximod toib buñguieeu de Brasil labúu bisian galyoxh né vis de cocaína? ¿Xí láani gocné toib mbioxhlas esloveno nasian galrrasoch? Guibiʼno ni bisetlayibu.

«Ralooyni que galán nabani» (JOHN RICKETTS)

ÍZ NI GOLBU: 1958

GUDX: ESCOCIA (REINO UNIDO)

TIPNÉS CÓS NI BUNYBU: BUÑ DE NEGOSY

NI BUNI LÓ DZÚ NI SEE: Dzú góca mbiox diti noʼ chú góc falt naʼ. Bixiosa góc toib soldad británico, por ngú xfamila né naʼ guirá ór bitzaʼdo de lagary. Diti nosi bibanydo Escocia, láaca goyoʼdo Inglaterra, Alemania, Kenia, Malasia, Irlanda né Chipre. Órni gopa xhoon íz goyaʼya xidal scuel de gudx Escocia, né bistubylagaʼya universidad xtuni lainy Cambridge.

Órni bisaʼya 20 íz, gosaló buni dxiin de petróleo. Primer buni dxiin lainy América del Sur, de ngú África né último, Australia Occidental, ro buni toib empresa de inversiones ni bitoʼya después.

Por guirá bidxiich ni cuaʼya órni bitoʼya láani, labúu bisiana de buni dxiin órni gopa 40 íz. ¿Xí labúu ñoni nigoreʼ né xiroʼ tiemp ni napa? Buni viaj. Goyaʼya xidal lagary de gudx Australia chop buelt laidy motociclet né gosaaya por guidopy Gudxlio. Ralooyni que galán nabani.

¿XIMOD BITZAʼ LA BIBLIA MOD BIBANI?: Dada antes ni nareʼya ló dxiin, gosaca que caquiin guidudy guixquix Dios por mod bibani. Por ngú gosaló goyaʼya Iglesia Anglicana, ro goniʼsa, per cu diti tampa bisuidybu de la Biblia. Después bisudi né mormón, per diti bioladxi que diti tampa rasac la Biblia par layibu.

Toibtica dzú, testigos xtuny Jehová godan xitz puert. Órcuca bidudi cuent que guirá ni ronyibu crer sieedni de Xtiitz Dios. Toibtica de textos ni sieed ló la Biblia ni bislooybu naʼ ngú 1 Timoteo 2:3, 4, ro náni que Dios raniiny que «guirá clas buñ guilaa né guimbutzaay galnan ni nigolú». Bidziguiaʼya que par testigos xtuny Jehová diti nosi rasac gap buñ conocimiento xtuny la Biblia, láaca rasac gacni ni nigolú.

Órni bisudi né layibu, labúu gopa conocimiento cu. Lad guirá cós ni bisudi, bibaladxi ni goona que Dios né Jesús gadzé nacyibu né diti nacyibu toib trinidad (Juan 14:28; 1 Corintios 11:3). Buni pensary balaati tiemp bisnita ro biyobi mod ñenna doctrina cu. ¡Diti nagan guieen buñ galnigolú!

Diti xidzú gosaló goyaʼya reunión xtuny Testigos. Nigolú bidziguiaʼya ximod ragobioyibu buñ né guirá principios ni napyibu. Guirá buñcu ralooyni buñ dioxh nacyibu. Galnadxiʼ ni bislooyibu saʼyibu bunyni que ñoni crer que napyibu religión ni rasuidy xinésni (Juan 13:35).

¿XÍ GALNASÁC MA CUAʼYA?: Después ni goyonisa bimbuya Diane, toib gonaʼ galán ni goniʼs xomod testigo xtuny Jehová. Bioladxi guirá cualidades ni napbu, por ngú bidxin midid bunydo galtzeʼel. Mod radzaʼga láabu né xcalrracnébu nacni toib galnasác ni cadudy Jehová naʼ.

Goniiny né guidopy xcalnabanydo ñoodo toib lagary ro caquiin herman ni guiniʼ xtiitz Dios, por ngú íz 2021goyoʼdo Belice, Centroamérica. Reʼ raninédo buñ ni naniiny gandxiʼ Dios né ni nigolú nainy guisuidy más de láabu.

Nigoreʼ ni ma naana galnigolú de Dios né la Biblia, rasaca sacró. De goló nodieʼya ló xchiin Dios, ma cayacnéya xidal buñ guimbu la Biblia. Diti noʼ stoib cós ni más ragoʼ nakit buñ xomod guibiʼ que la Biblia labúu guitzaʼni mod rabany buñ xomod bitzaʼni mod bibani. Nigoreʼ bidzela toib galán mod ni labúu guidudi guixquix Jehová por galnabany xtuni.

«Godabioyibu naʼ sacró» (MAURÍCIO ARAÚJO)

ÍZ NI GOLBU: 1967

GUDX: BRASIL

TIPNÉS CÓS NI BUNYBU: GÓCBU BUÑYOX

NI BUNI LÓ DZÚ NI SEE: Goniʼsa lainy Avaré, toib gudxyen ni riaʼan São Paulo ro casi guirá buñ de gudxyen cu ronyibu dxiin par stipnés.

Bixiosa goity antes ni ñaala. Dzú góca mbioxien bioladxi ñoca xhap xinaʼya órni diti goyoʼbu rioʼ. Guirá mod buni gocni xomod buñgonaʼ, né buñ gosaló goniʼ que góca buñ moxh. Después gosaló gotnéya stipnés mbioxhlas, láaca gotnéya buñguieeu gohx.

Órni góca mbioxhlas gosaló goyaʼya clubes nocturnos, cantin né dada goyaʼya guidaʼ par biyobi buñguieeu né buñgonaʼ ni labúu ñatnéya. Órni goyoʼ carnavales, goctzaya xomod buñgonaʼ né biyaʼya ló desfiles xtuny scuel ni rasuidy samba. Birebuʼ guirá ni buni.

Bidzaga buñ moxh, gonaʼ yox né buñ ni raquiin drogas. Tipnés bikíilyibu naʼ nagóba crack (cocaína ni nac xomod guiee), diti xidzú ma gocni toib vis par naʼ. Goyoʼ ór godóba guidopy goxin né layibu; né ro dzú nosi naʼ godóba. Nigolú ma nirosondi ximod góc lóoya por ngú buñ goniʼ que gopa sida.

¿XIMOD BITZAʼ LA BIBLIA MOD BIBANI?: Órcu bimbuya testigos xtuny Jehová. Layibu godabioyibu naʼ. Bilnéyibu naʼ diitz ni sieed ló Romanos 10:13, ro ná que «guirá ni raniʼ laa Jehová salaa». Né bienna que nigolú rasac guiquiin buñ laa Dios. Casi guirá ór después ni godóba crack guidopy goxin, bixala bentan, bibiʼya guibá, gorudxaʼya né gonaba Jehová ñacné naʼ.

Bidudi cuent que nigolú ragoʼya xinaʼya ló galrrasaʼ por ni caxin galnabany xtuni, por ngú goloʼya guica nasiana drogas. Diti xidzú gosaguela nasudi la Biblia né Testigos. Layibu gochyibu naʼ que ni guisudi sacnéni par nasiana vis cu né scú gocni.

Laʼga casudi más cós ni sieed ló la Biblia, bienna que non natzaʼya xidal cós. Ni más gosac nagana láani ngú nasiana galyoxh, portín buni láani desde dzú goyoʼ xcalrriena. Toib cós ni nigolú biquiin natzaʼya ngú buñ ni radzaʼga, por ngú bisiana guirá ximiga né ma diti goyaʼya clubes nocturnos nili cantin.

Ná nagan gocni par naʼ, bialdó xcalnabani órni buni pensary que Jehová rioʼ galrrasaʼ por naʼ né que rasac par láabu guirá xtem ni buni (1 Juan 3:19, 20). Par ló íz 2002 ma bisiana guirá galyoxh cu, né labúu goyonisa xomod testigo xtuny Jehová.

¿XÍ GALNASÁC MA CUAʼYA?: Xinaʼya nigolú bidziguiaʼ mod bitzaʼya mod góca né gosaló bisuidybu la Biblia. Per nabanni, portín goity tigalaʼ guicbu. Ná scú, cayonyrabu por gandxiʼbu más Jehová né la Biblia.

De goló xhoon íz caquiinna casi guirá xtiempa par guisudi buñ galnigolú ni sieed ló la Biblia. Ma xidal buelt roni xtem par diti guiaba ló cós mal ni buni nírcu, per ni racné naʼ ngú ni naana que pal diti goni láani, Jehová sabaladx né naʼ.

Ni rabigaxa Dios né nabani xomod nainy láabu ronyni que gapa respet naʼca. Nigoreʼ ma labúu guiniya que naca toib buñguieeu nakit.

«Góca xomod toib barril ni diti radza» (LUKA ŠUC)

ÍZ NI GOLBU: 1975

GUDX: ESLOVENIA

TIPNÉS CÓS NI BUNYBU: GODUDY MIDID GOʼBU NÍS NI NOTZ ALCOHOL

NI BUNI LÓ DZÚ NI SEE: Goola lainy Liubliana, capital xtuny Eslovenia. Sacró bibani dzú góca mbiox dada órni gopa tap íz, bixiosa bigaitybu láacabu. De goló dzúcu, xinaʼya nadip buny dxiin par nasniʼsbu buchi né naʼ.

Órni gopa 15 íz golésa né soiscola. Bioladxi bibani né láabu portín xidal ximiga gaxca golésyibu né más labúu gosadxeya que órni goyoʼya né xinaʼya. Órni gopa 16 íz bidzaga buñ ni rasoch guic xomal. Bidudi lagary nagaʼ guitzguica, godoca lairy ni godoc buñ ni diti rasob, né bidxin midid gosaló godóba.

Buni prueby xidal clas drogas, per ni más bioladxi láani ngú nís ni notz alcohol. Diti xidzú ma diti nosi chop cop vino gooya, ma gooya más de tip botell tobi. Gontzaya ximod non goni par diti guieen que casodxi. Goyoʼ ór buñ nosi bidudy cuent por xpú alcohol, ná scú, buñ diti labúu ñan pal gooya xidal litros de vino o cerves ni notz né vodka.

Xidal buelt naʼ gocnéya ximiga par diti ñap después ni goyoʼdo cantin guidopy gueʼel, ná naʼ más gooya que layibu. Toibtica dzú bicadiaga toib ximiga gochbu a stoib de ximiga que góca xomod toib barril ni diti radza. Diitz cu nigolú bisioʼobni naʼ, portín ngú toib diitz feo ni raiby buñ de Eslovenia a buñ ni reʼgolu.

Né ngú buny, que ñoni pensary xi cayoni né galnabany xtuni. Gosaca que diti noʼ púti raquiinna. Gosaca que ni toib cós ni buni diti raquiin.

¿XIMOD BITZAʼ LA BIBLIA MOD BIBANI?: Moda ló dzúcu bibiʼya que toibtica xcompañera ni rinéya scuel bidzaʼ mod góc, gócbu más buñdzuu. Goniiny naʼ ñaana xigony, por ngú biruʼya láabu ñeedo café né ñooydo diitz tiprat. Golexabu naʼ que gosaló bisuidybu la Biblia né testigos xtuny Jehová. Láaca gochbu naʼ tipnés cós ni ma casuidybu. Diti goona xitcal de religión, por ngú guirá ni gochbu naʼ nicopy gosaca láani. Gosaló goyaʼya reunión né Testigos né bisudi la Biblia né layibu.

Modcu bisudi galnigolú ni gocné naʼ. Por ejemplo, goona que ma rabanyno ló ni la Biblia rabeʼ laa «dzú ni ma guidubylagaʼ» né que mápa mer Dios sanitló guirá buñ mal ni noʼ ló Gudxlio, per sadudybu buñtzay oportunida de guibanybu tipzó ló toib Gudxlio móz (2 Timoteo 3:1-5; Salmo 37:29). Órcu goniiny naʼ nasiana galnabany xtuni para ñoʼya lad buñtzay cu.

Órni goodxi ximiga ni casudi, casi guiráyibu bixiichyibu naʼ. Per, ngú gocné naʼ, portín bidudi cuent que diti nacyibu toib buen amig. Láaca, bidudi cuent que galrrasoch cu gosalóni portín bidzaga buñ ni diti non nadzaʼga. Ni nosi rabés guic xomal par guisoch.

Goloʼya guica nasiana layibu né nayobi ximiga lad testigos xtuny Jehová. Layibu diti nosi gocnéyibu naʼ, láaca gondxiʼyibu Dios né guidopy xcalnabanyibu né bunyibu rutirigaʼlni layibu por guibanyibu mod ná Dios. Ni bidzaga layibu nigolú gocnéni naʼ, né después labúu bisiana galrrasoch.

¿XÍ GALNASÁC MA CUAʼYA?: Radudi guixquix Jehová portín ma diti raquiinna alcohol par tzoʼya nakit. Diti naana ximod narecaaya pal diti nasiana láani. Ni naana ngú que nigoreʼ ma más galán noʼya.

Ma de goló gatz íz napa privilegio cayoni dxiin lainy sucursal de testigos xtuny Jehová gudx Eslovenia. Por ni rimbuya Jehová né roni xchiimbu ma diti nac nacsi nabani.