Goola lainy toib ranchen ni gop bixiosa né xinaʼya lainy toib gudxyen ni laa Galicia, ni riaʼan niis lad noroeste de España. Góca toibtica xhoon de mbiox ni gop bixiosa né xinaʼya. Sacró golésa né xfamila. Par ló dzúcu gocni toib costumbre que toibtica mbiox nasuidy par labúu nadxin ñac xobal o monja. Lainy xfamila tzóndo goyoʼdo scuel cu.

Órni gopa 13 íz goyaʼya scuel lainy gudx Madrid ro ma noʼ toibtica beela casuidy. Lagarycu diti goyoʼ ni goloʼ cuent buñ. Nili goyoʼ ximig buñ, nosi raniʼyibu xi láani gonylo né ronyibu oración. Rosildiguieʼ bidopdo lainy capilla par ñonydo pensary, ná gosac nagana ñoni láani. Después buny cantardo canción de xireligiondo né goyoʼdo mix. Diti bienna xitcal portín gocni ló diitz latín né gosaca suusi noʼ Dios sit de naʼ. Ni toib diti noʼ chú labúu ñony ruid. Órni beela né naʼ radzaglodo saʼdo nosi labúu gochdo saʼdo: «Ave María purísima». Nosi labúu bidudybu lóodo galaʼ ór par labúu naninédo saʼdo órni ma bilox godódo. ¡Diti goyoʼyacu xomod goyoʼya lidxi! Portín lidxi nakit bibani né xfamila. Gosaca que goyoʼya tobi né guirá ór gorudxaʼya.

Ná dipa gosaca que goyoʼya gaxt de Dios, órni gopa 17 íz góca monja. Buni láani portín ngú ni goniiny buñ ñoni, diti xidzú después gonabdiidza naʼca pal ngú raniiny naʼ ñoni. ¡Guirá monjascu gochbu lóodo que pal diti ronydo crer sanitlódo! Per ná scú diti tampa buni crer. Naʼ gondxichi que Jesús diti goyoʼbu galrrasaʼ por láasibu, xalagary ngú biquiimbu xtiempbu par bisuidybu né gocnébu buñ (Mateo 4:​23-25). Órni gopa 20 íz diti goyoʼ razón par ñacriya monja. Bidziguiaʼya órni toib ni rasanir lad guirá monjascu góoch naʼ que pal diti roni crer, más galán nareʼya nimaca de convento cú. Né bireʼyacu. Buni pensary que bidzuibybu que stipnés ñony scúca.

Órni bidxina lidxi bixiosa né xinaʼya godabioyibu naʼ, per como diti goyoʼ dxiin lainy gudxcu la, por ngú goyaʼya Alemania ro golés stoib bisana. Láabu goyoʼbu lad toib grupo comunista. Nigolú sacró gosaca goyoʼya lad buñ ni godíil por guirá buñ ni rony dxiin né ni rony que guisac buñgonaʼ toibsi né buñguieeu. Góca comunista né diti xidzú después buni galtzeʼel né toibtica ni goyoʼ lad grupo cú. Bikiʼtza guiich né goyaʼya marcha ro riee guirá buñcu. Gosaca que noʼ ro raquiinna.

Per bidxin midid bireʼgana. Ralooyni que guirá comunistas cu diti ronyibu ni rasuidyibu. Ló íz 1971 más gosaca modcu, órni tipnés mbioxhlas ni noʼ lad grupo xtunydo bicaʼyibu guii consulado español de Francort portín diti bioladxyibu mod cayony mandary gobierno gudx España. Diti bioladxi mod buny mbioxhlas reʼ.

Órni gool primer xiindo, goodxi tzeʼela que ma diti sadopa né grupo cu. Gosaca que noʼya tobi, portín ni toib de ximiga goyguen naʼ né xpadaʼya. Gonabdiidza naʼca: ¿Xigony noʼno ló Gudxlio? ¿Rasac gony buñ xtem par guidzaʼ Gudxlio reʼ la?

Íz 1976, toib galtzeʼel de testigos xtuny Jehová de gudx España bidxinyibu lidxi né bisianyibu tipnés libros né guiich ni rasuidy la Biblia. Órni bibiguetyibu, buni xidal galrranabdiitz layibu: ¿Xigony nogoluʼ galrrioʼob, né xigony diti rac xinésni? Bidziguiaʼya mod cuapyibu né la Biblia guirá galrranabdiitz ni gopa. Órcuca gosaguela nasuidyibu naʼ ni ná la Biblia.

Primer la, nosi goniiny naʼ ñaana xi ná la Biblia, per después ma diti buny xpensari modcu, órni tzeʼela né naʼ gosalódo goyoʼdo reunión ni rony Testigos lainy Salón del Reino. Par ló dzúcu ma napdo chop xiindo. Testigos goyné lóodo lainy Salón xtunyibu né gocnéyibu lóodo gonyibu xiindo ló reunión. Nigolú bianéya layibu.

Ná scú, diti tampa buni crer. Órni goyguenna xfamila España, bixoya ni góc sacerdote, biyopybu mod nabeʼganbu naʼ par ma diti nasudi, per Testigos de lagarycu gocné naʼ. Xomodca buny xcompañeryibu ni noʼ Alemania, guirá galrranabdiitz ni gopa cuapyibu láani né la Biblia. Goloʼya guica órni nabiguetta lidxi nasudi stoib. Ná tzeʼela diti goniiny nasuidyra la Biblia, naʼ goloʼya guica ñoni ni ma goniya. Íz 1978 goyonisa né bidxin góca testigo xtuny Jehová.

Ni ma bienna ni ná la Biblia ma gocnéni naʼ guienna que diti nac nacsi nabani né que noʼ xi portín noʼya ló Gudxlio. Por ejemplo, 1 Pedro 3:​1-4 raibyni buñgonaʼ que guisobyibu tzeʼelyibu, gapyibu respet tzeʼelyibu né gacyibu buñ nadaʼa, portín ndeʼ «nigolú rasac nisló Dios». Texto reʼ né stipnés textos ni sieed ló la Biblia ma gocnéni naʼ, par labúu gony cumplir né dxiin ni rony toib buñgonaʼ ni ma tzeʼel né xiin.

Ma de goloʼ treinta y cinco íz naʼca testigo xtuny Jehová. Nigolú nakit noʼya cayonyni xchiin Dios, né ni naca de xfamil Dios né nakit noʼya portín tap de gáay xiina nac testigo xtuny Jehová.