Goola né goniʼsa toib lagarien niis roloo gudx Roma, nigolú nagan mod bibani. Diti bimbuya xinaʼya, né diti bidzaga bixiosa sacró. Goniʼsa locay.

Dzú gopa 10 íz gosalóya buni galgobáan, dzú gopa 12 íz bisiana lidxi primerdiguieʼ buelt. Más de tibuelt bixiosa goleʼ naʼ ladxña buñchiin. Casi guirá ór gonidala né buñ, né nigolú bidzutzi. Dzú gopa 14 íz bisiana lidxi par ma diti nabiguetta. Bibani locay né biquiinna drogas. Órni rioʼ gueʼel, raxala toib camión né cú raasi dada tayoo de cú riása né rayobi toib lagary par quiiba ñaya né lóoya.

Bidxina góca toib buñ gobáan. Golaana nitisi cós: gooxa boxh ni sané buñ locay né goxin bixala lidx buñ par golaana xcósyibu. Nigolú gontzaya ximod cuaana por ngú biruʼyibu naʼ par tzoʼya lad toib grupo de buñ ni rabann. Ngú bidudy oportunida naʼ nabaana más, né gosalóya golaana lainy bank. Góca buñ nadox por ngú guirá buñ ni gosanéya gop respet naʼ. Guirá ro goyaʼya goynéya xquiba; pórsi galrradíil, drogas, galgobáan, galyoxh né goniya diitz yox. Cuanal policia naʼ né gonásyibu naʼ xidal buelt. Xidal íz gosaaya locay né goyoʼya lachquiip.

Toibtica buelt ni bireʼya lachquiip goyguenna toibtica soosi. Diti goona pal láabu né chop prim xtuni ma nacyibu testigos xtuny Jehová. Biruʼyibu naʼ toibtica xireuniónyibu né goyaʼya par nabiʼsiya. Órni bidxindo lainy Salón del Reino goodxi layibu nabúya nís roʼpa puert par nabiʼya chú cayoʼ né chú careʼ. Né xquiba goynéya cú.

Reunióncu bitzaʼni mod bibani. Rasetnaladxi mod buni xpensari: «¡Noʼya ló stoib Gudxlio!». Guirá lad bibiʼya buñ ni noʼ nakit xcalnabany né ni ragobioo saʼ. Dada ló naareʼ rasetnaladxi mod bibiʼyibu né mod godabioyibu naʼ. ¡Gosaca que noʼya sitgoluʼ de Gudxlio ro golésa!

Goloʼya guica guisudi la Biblia né Testigos. Conforma casudi bidudi cuent que non guitzaʼya mod nabani. Por ejemplo, goloʼya cuent diitz ni sieed ló Proverbios 13:20 ro ná: «Buñ ni rasané buñ ni noʼ xcalrrien sadxin sac buñ ni noʼ xcalrrien, per ni radzak buñ ngaʼal sarecaa mal». Bienna que non nasiana buñ ni gosanéya. Gosac nagana ñoni láani per né xcalrracné Jehová labúu buni láani.

Láaca bisiáya ladi, buni xiroʼ xtem par nasiana de nagoba né par nasiana drogas. Bichoga guitzguica, goleʼya ni gool guidiaga né ma diti goniya diitz yox. Ndeʼ primerdiguieʼ buelt ni gosaca que labúu nasiana guirá cós mal ni buni.

Dipa bioladxi ñoola né nasudi, por ngú gosac nagana nasudi ni ná la Biblia. Dxoga dxoga gosaló gondxiʼya Jehová. Tiptisi noʼ ni gosaca: gosaló bisioʼob xcalrriena naʼ guirá ór gosac mala né buni pensary que Jehová diti natudy scásiʼ guirá cós mal ni ma buni. Órcu gosaló biila historia xtuny rey David mod bitudy Dios scásiʼ guirá galkié ni bunybu né ngú bisialdó xcalnabani (2 Samuel 11:​1–12:​13).

Toib galnagan ni cualóya láani ngú ni naniya xtiitz Dios yoʼ por yoʼ (Mateo 28:19, 20). ¡Nigolú bidzubi nadzela toibtica buñ ni buni mal ló dzú ni see! Dxoga dxoga ma diti bidzubi né ma bioladxi goninéya buñ de Bixiosno ni noʼ guibá ni ratudy scásiʼ ni ma bunyno.

Ni bimbuya Jehová bilaani naʼ. Casi guirá ximiga ma goityibu o noʼyibu lachquiip. Naʼ la noʼya nakit né nandxichi que noʼ ni guicaʼya ló dzú ni sietra. Ma bisudi gaca buñdxo, guisoba né guichoga ló xcalnadzutzi, por guirá ndeʼ ma sacró radzaʼga buñ ni nagoo naʼ. Né nigolú noʼya nakit portín buni galtzeʼel né toib buñgonaʼ ni natzaay xcalrrien ni laa Carmen. Guiropcado racnédo xpesindo guimbu ni ná la Biblia.

Nanto la nigoreʼ ma diti naʼca buñ gobáan. Rioʼ ór ronysaya dxiin lainy bank, per diti par cuaana, xalagary ngú rasiáya lagarycu.