Goniʼsa lainy toib lagary pobre gudx Montreal. Naʼ lahuin de xhoon mbiox ni gop bixiosa né xinaʼya. Órni gopa xhoop beʼo goity bixiosa, toib xinaʼya biaʼan né bisniʼsbu guirácado.

Desde dzú góca mbioxien biquiinna drogas, goyoʼya ló galrradíil né godxita por bidxiich. Pórsi buñ mal bigoo naʼ. Órni napsiya 10 íz, buni mandad xtuny buñgonaʼ yox né buñ ni rastiʼn bidxiich. Bioladxi nascúya né nabana buñ. Gocni suusi toib vis.

Órni gopa 14 íz ma gontzaʼya ximod nabana. Gosiiya xidal reloj, pulser né guipnil ni notz or né bicaʼya laidyni que nacni or de 14 quilates né bitoʼya lainy ló cay né ló ro rasagaʼ camión ló tiend xiroʼ. ¡Naguel buny gan bidxiich! Tibuelt buny gan 10.000 dólares ló tipdzúsi.

Dzú gopa 15 íz, bilaʼkyibu naʼ de reformatorio, ni nac toib lagary ro rieg mbiox ni buny toib galkié par guitzaʼ mod nac. Gotiasy ló cay, lainy parque né lidx guirá ximiga.

Policia gonás naʼ chop tzón buelt, né gonabdiitzyibu naʼ xi láani catoʼya. Per guirá ni bitoʼya diti golana láani, por ngú dipa goyaʼya lachquiip. Per godixi xiroʼ bidxiich portín biscúya buñ, né portín diti gopa permís par guitoʼya. Nipa balaquien diti bidzubi; dada buni dxiin né buñ ni rastiʼn bidxiich. Goyoʼ riesga ló dxiincu, por ngú rioʼ ór goynéya guip. Né láaca buni dxiin né buñ ni ragaity.

Primerdiguieʼ buelt ni bicadiaga ni ná la Biblia láani ngú órni gopa 17 íz. Golesnéya toib buñgonaʼ, ni gosaló bisuidy la Biblia né testigos xtuny Jehová. Per diti bioladxi guirá ni rony mandary Jehová ni sieed ló la Biblia, bisiana láabu né goyonéya stoib buñgonaʼ ni maca rasanéya.

Né gonaʼdxi reʼ láaca gosaló bisuidy la Biblia né testigos xtuny Jehová. Bidziguiaʼya ximod bitzaʼbu mod nacbu: gócbu buñ más nadaʼa né paseins. Toibtica dzú biruʼyibu naʼ ñaʼya xireuniónyibu né goyaʼya. Bidzela buñ ni nigolú gadzé mod nac; buñtzay né ni godabioo naʼ. Dipa ma goyoʼ buñ ni godabioo naʼ modreʼ. Dzú góca mbioxien diti goyoʼ chú binladx naʼ, né xfamila diti goloʼ cuent naʼ. Mod godabioo testigo xtuny Jehová naʼ ngúpa ni biquiinna. Órni gochyibu naʼ que guisudi la Biblia né layibu nimaca gosaguela.

Ni bisudi bilaani naʼ. Chop buñ gobáan né naʼ ma goloʼdo guicdo tzabando portín biquiinna 50.000 dólares par naguiixi ni nasabi por ni godxita. ¡Buenti diti goyaʼya! Chop buñ gobáan ni goyee toibtica de layibu bigaity buñ láabu né stoibcu see press.

Ni bisudi ló la Biblia bisienni naʼ que non natzaʼya más cós. Por ejemplo, ló 1 Corintios 6:​10 la Biblia ná: «Buñ gobáan, buñ ni rasobladx, buñ ni rasoch, buñ ni ronynaa stipnés né xtiitz né buñ mañós ni rahx lafuers xtuny stoib, diti sioʼyibu lainy Gobierno xtuny Dios». Órni biila versículo reʼ, gorudxaʼya. Non nasiana guirá mod naca (Romanos 12:2). Góca toib buñ ni biyopy galrradíil, góca buñ moxter né soosi nac bibani.

Per láaca bisudi que Jehová natzaaybu né rony perdonarbu lóono (Isaías 1:18). Por ngú buni oración né guidopy xcalnabani, gonaba láabu ñacnébu naʼ nasiana vis né natzaʼya mod nabani. Né xcalrracné Jehová dxoga dxoga labúu bisiana láani. Toib cós ni nigolú rasac láani ngú que xinobi né naʼ bunydo galtzeʼel.

Par ló dzúcu, napa 24 íz, ma noʼ tzón xiina. Biquiin ñapa toib dxiin tzaay par labúu nayaʼana layibu. Diti tampa goyaʼya scuel né diti goona ñoni dxiin. De ngú gonaba Jehová ñacnébu naʼ stoib né goyaʼya biyobi dxiin. Ro buny entrevistaryibu naʼ, goniya que nainy naʼ guitzaʼya mod naca né goni dxiin sacró. Goyoʼ ór goniya que casudi la Biblia par gaca toib buñtzay. Per guirá buñcu diti goloʼyibu cuent naʼ. Órni bilox goniya mod góca ló toib entrevista, buñguieeucu góoch naʼ: «Diti naana xigony, per noʼ ni raiby naʼ que gonylo dxiin né naʼ». Nandxichi que modreʼ cuapy Jehová oración xtuni. Diti xidzú después tzeʼela né naʼ gócdo testigo xtuny Jehová.

Nabani portín casoba consej ni sieed ló la Biblia né casuʼya Cristo. Goxtiguie noʼya né xfamila né xcalrriena diti ronynudy naʼ, portín nandxichi que Jehová ma buny perdonar naʼ.

Ma sanéya 14 íz de goló cayoni toib dxiin ni rasac: racnéya stipnés buñ par guienyibu ni ná la Biblia. Ló ndeʼga, tzeʼela láaca ma goyoʼ ló dxiinreʼ. Láaca ló treint íz ma gocnéya 22 buñ ni bunynéya dxiin góc testigo xtuny Jehová. Riaʼasiya lainy tiend xirop, per ma diti par guiscúya né guicaʼya xcós buñ xomod nírcu. Xidal buelt raquiinna oportunida ni napa par gaabi buñ galrrascad ni napno guiráno: esperanza de guibanyno ló toib Gudxlio copy ro ma diti sioʼ buñ gobáan (Salmo 37:​10, 11).